5. Mosesgirji 11

₂Dihtet ahte mun in dál sártno din mánáide, danne go sii eai dovdda eaige leat oaidnán mo Hearrá, din Ipmil, bagadii din. Sii eai leat vásihan su stuorisvuođa ja su gievrras ja bajiduvvon gieđa fámu. ₃Sii eai leat oaidnán daid mearkkaid ja oavdduid maid son dagai Egyptas faraoi, Egypta gonagassii, ja oppa su eatnamii, ₄eaige dan maid son dagai egyptalaččaid soahtevehkii, dan heasttaide ja soahtevovnnaide, go son divttii Ruksesmeara čáziid šávggihit sin ala go sii doarridedje din, ja duššadii sin agibeaivái. ₅Sii eai leat oaidnán maid Hearrá dagai didjiide meahcis, ovdal go bođiidet deike, ₆dahje maid son dagai Datanii ja Abiramii, Rubena bártni Eliaba bártniide, go eanan rabastii njálmmis Israela álbmoga oaidnut ja njielastii sin ja sin bearrašiid ja gođiid ja buot heakkalaččaid sin fárus. ₇Dušše din čalmmit leat oaidnán buot daid stuorra daguid maid Hearrá lea dahkan. ₈Dollet dan dihte oppa dán lága maid mun odne attán didjiide. Dalle dii šaddabehtet gievran ja oažžubehtet váldit oapmineattet dan eatnama gosa lehpet mannamin, ₉ja dalle dii beassabehtet eallit guhká dan eatnamis maid Hearrá vuordnumiin lohpidii addit din áhčiide ja sin nállái, eatnamis mas golgá mielki ja honnet.

₁₀Eanan maid dii lehpet mannamin váldit oapmineattet ii leat nugo Egypta eanan gos dii vulggiidet. Doppe dii gárttaidet iežadet gieđaiguin láktadit eatnama nugo urttasgárddi. ₁₁Muhto dan eatnamis maid mannabehtet váldit oapmineattet, leat várit ja leagit, ja doppe almmi arvvit čáhccejit eatnama. ₁₂Dat lea eanan mas Hearrá, din Ipmil, atná fuola; son áimmahuššá dan álo, jagi álggus gitta jagi lohppii.

₁₃Jos dii doallabehtet Hearrá báhkkomiid, maid mun attán didjiide odne, nu ahte ráhkistehpet Hearrá, din Ipmila, ja bálvalehpet su oppa váimmus ja oppa sielus, ₁₄de son addá din eatnamii rivttes áigái čakčaarvvi ja giđđaarvvi, ja dii beassabehtet rádjat iežadet gortni, viinni ja oljju. ₁₅Son addá din omiide rási guohtut, ja dii beassabehtet borrat gallás. ₁₆Muhto váruhehket fillehallamis, nu ahte jorralehpet ja rohkadallabehtet eará ipmiliid ja bálvalehpet daid. ₁₇Dalle Hearrá moaráhuvvá didjiide ja dahppá almmi, nu ahte ii arvve iige eanan atte šattu, ja dalle dii duššabehtet johtilit dan buori eatnamis maid Hearrá addá didjiide.

₁₈Dáid mu sániid dii galgabehtet oahppat ja muitit. Čatnet daid mearkan gihtii ja atnet daid mearkan gállus. ₁₉Oahpahehket daid mánáidasadet, sárdnot daid go čohkkábehtet ruovttus ja go vázzibehtet olgun, go veallánehpet ja go lihkkabehtet. ₂₀Čállet daid viesuideattet uksastoalppuide ja gávpogiiddádet poarttaide. ₂₁Dalle dii ja din mánát oažžubehtet eallit guhká dan eatnamis maid Hearrá vuordnumiin lohpidii addit din áhčiide nu guhkes áigái, go albmi allána eatnama badjel.

₂₂Jos dii oskkáldasat doallabehtet oppa dan lága maid Hearrá addá didjiide, jos dii ráhkistehpet Hearrá, Ipmileattet, vádjolehpet álo su geainnuid ja lehpet su lahka, ₂₃de son ádjá din ovddas álbmogiid mat leat stuoribut ja gievrrabut go dii. ₂₄Juohke báiki gosa dii duolmmastehpet, gullá didjiide. Din eanan ollá luli meahcis Libanonii ja Eufrateanus oarjemerrii. ₂₅Ii oktage biđe dis. Hearrá, din Ipmil, diktá hirpma ja balu din dihte boahtit oppa dan eatnamii gosa dii boahtibehtet, nugo son lea lohpidan.

₂₆Mun divttán din dál válljet buressivdnádusa dahje garuhusa. ₂₇Dii oažžubehtet buressivdnádusa jos jeagadehpet Hearrá, din Ipmila, báhkkomiid, maid mun odne attán didjiide, ₂₈muhto garuhusa jos ehpet jeagat Hearrá, din Ipmila, báhkkomiid, ja gáidabehtet dan geainnus maid mun odne gohčun din vádjolit, ja bálvalehpet eará ipmiliid maid ehpet dovdda.

₂₉Go Hearrá, din Ipmil, doalvu din dan eatnamii maid lehpet mannamin váldit oapmineattet, de dii galgabehtet gulahit buressivdnádusa Garisimváris ja garuhusa Ebalváris. ₃₀Diihan diehtibehtet ahte dat várit leat Jordana oarjjabeale geainnu duohken Gilgala lahka More áikkaid guoras eatnamis mii gullá daidda kanaanlaččaide geat ásset Jordanleagis.

₃₁Mannet dál Jordana rastá dan eatnamii maid Hearrá, din Ipmil, addá didjiide, ja váldet dan oapmineattet. Go dii lehpet váldán dan ja ássabehtet doppe, ₃₂de galgabehtet doallat oskkáldasat buot daid lágaid ja njuolggadusaid maid mun odne attán didjiide.