Velggiid sihkkuma jahki
1Juohke čihččet jagi galgabehtet sihkkut velggiid. 2Sihkkun dáhpáhuvvá ná: Juohkehaš gii lea lonen nubbái juoidá, galgá sihkkut iežas gáibidepmoša, dan maid lea lonen nubbái. Go velggiid sihkkun lea gulahuvvon Hearrá gudnin, de olmmoš ii oaččo šat gáibidit maidege vieljastis ja lagamuččastis. 3Olgoeatnama olbmos dii oažžubehtet gáibidit vealggi, muhto dan maid din viellja lea velggolaš, dii galgabehtet sihkkut. 4Dattetge din gaskkas ii galggaše leat oktage geafi, danin go Hearrá, din Ipmil, buressivdnida din dan eatnamis maid son addá didjiide opmodahkan ja diktá din váldit oapmineattet, 5jos dii fal gullabehtet Hearrá, Ipmileattet, nu ahte oskkáldasat doahttalehpet oppa dán lága maid mun odne attán didjiide. 6Go Hearrá, din Ipmil, buressivdnida din nugo lea lohpidan, de dii lonebehtet máŋgga álbmogii, muhto dii ieža ehpet goassege dárbbaš váldit loanas. Dii ráđđebehtet máŋggaid álbmogiid, muhto dat eai goassege ráđđe din.
7Jos muhtun gávpogis dan eatnamis maid Hearrá, din Ipmil, addá didjiide, lea geafes olmmoš, soamis din vieljain, de allet leage nu garraváimmogat ahte dahppabehtet gieđa geafes vielljaseattet. 8Dii galgabehtet baicce rabastit gieđa sutnje ja lonet sutnje maid son dárbbaša. 9Váruhehket dan gudnehis jurdagis ahte čihččet jahki, velggiid sihkkuma jahki, lea lahka, ja nu geahččabehtet ustitmeahttumit geafes vielljaseattet ja biehttalehpet lonemis sutnje maidege. De son čuorvu Hearrá, ja dii šaddabehtet sivalažžan suddui. 10Addet sutnje árvasit alletge ane unohassan addit. Dalle Hearrá, din Ipmil, buressivdnida din buot das maid dahkabehtet ja doaimmahehpet. 11Geafit eai goassege noga din eatnamis. Dan dihte mun gohčun din rabastit gieđa vielljaseattet, iežadet eatnama geafái ja váivvášii.
12Jos du viellja, hebrealaš olmmái dahje nisson, gártá vuovdit iežas dutnje ja bálvala du guhtta jagi, de čihččet jagi don galggat luoitit su vuolgit. 13Go don luoittát su vuolgit, de ale bija su mannat guoros gieđaid, 14muhto niste su bures iežat sávzagárddi, gordneráidnensaji ja viidnebohčingári attáldagaiguin. Atte sutnje dan mainna Hearrá, du Ipmil, lea buressivdnidan du. 15Muitte ahte don ieš ledjet šlávvan Egyptas, ja ahte Hearrá, du Ipmil, lonistii du. Dan dihte mun odne attán dutnje dán gohččuma.
16Muhto jos du šlávva dadjá ahte son ii dáhto vuolgit du luhtte, danin go son liiko dutnje ja du bearrašii ja sus lea buorre dilli du luhtte, 17de váldde sivllu ja čugge dan su bealji čađa uksii. De son lea du šlávva agibeaivái. Daga seammá ládje maiddái šlávvanissonasat. 18Ale ane váivin luoitit šláva vuolgit. Donhan leat guđa jagis seastán guovtte geardái beaivebálkkolačča bálkká, go son lea bargan dutnje. Ja Hearrá, du Ipmil, buressivdnida du buot das maid dagat.
Omiid vuosttašriegádeaddjit
19Basuhehket Hearrái, Ipmilasadet, buot stuorraomiid ja smávvaomiid varis vuosttašriegádeddjiid. Allet barggat vuosttašriegádeaddji burrogálbbi alletge beaskit vuosttašriegádeaddji viercalábbá. 20Juohke jagi dii oktan bearrašiinnádet galgabehtet borrat dakkár elliid Hearrá, Ipmileattet, muođuid ovddas dan báikkis maid son vállje. 21Muhto jos eallis lea muhtun vihki, jos dat lea skierbmá, čalmmeheapme dahje das lea eará bahás vihki, de dii ehpet oaččo oaffaruššat dan Hearrái, Ipmilasadet. 22Borret dan ruovttus iežadet gávpogiin, ja dalle sihke buhtismeahttumat ja buhttásat ožžot searvat, seammá ládje go dalle go olbmot borret gasella dahje sarvaga bierggu. 23Muhto ealli vara dii ehpet oaččo borrat; golggahehket dan eatnamii nugo čázi.
