Stuorra basit
1Abibmánus dii galgabehtet doallat beassážiid Hearrá, Ipmileattet, gudnin, danne go dan mánus Hearrá buvttii din ihkku Egyptas. 2Oaffaruššet beassášoaffarin smávvaoami dahje stuorraoami dan báikkis maid Hearrá vállje namas ássanbáikin. 3Allet bora maidege suvrásiid oktan dainna; čieža beaivvi dii galgabehtet borrat suvrutkeahtes láibbi, áŧestusa láibbi, danin go hoahpus dii šattaidet vuolgit Egyptas. Nu dii muitibehtet oppa din eallináiggi dan beaivvi go dii vulggiidet Egyptas. 4Čieža beaivái ii oaččo leat suvrradáigi gostege din eatnamis, iige oaččo báhcit mihkkege iđidii dan bierggus maid oaffaruššabehtet vuosttaš beaivvi eahkeda. 5Allet oaffaruša beassášoaffara gos fal dain gávpogiin maid Hearrá, din Ipmil, addá didjiide, 6muhto mannet dan báikái maid Hearrá, din Ipmil, vállje namas ássanbáikin. Oaffaruššet doppe beassášoaffara eahkedis go beaivváš lea luoitádeamen, aitto dan bottus go dii vulggiidet Egyptas. 7Vuššet ja borret dan dan báikkis maid Hearrá, din Ipmil, vállje, ja vulget maŋit iđida. 8Guhtta beaivvi galgabehtet borrat suvrutkeahtes láibbi, muhto čihččet beaivvi lea bassi čoagganeapmi Hearrá, Ipmileattet, gudnin. Dalle dii ehpet oaččo bargat maidege.
9Diktet gollat čieža vahku dan áiggi rájes go čuohppagoahtibehtet gortni. Dan čieža vahku geažes 10dii galgabehtet doallat vahkkobasiid Hearrá, Ipmileattet, gudnin. Buktet eaktodáhtolaš oaffarattáldagaid nu ollu go suitibehtet, dađe mielde go Hearrá, din Ipmil, lea buressivdnidan din. 11Bohtet buohkat Hearrá, Ipmileattet, muođuid ovdii, dii ja din bártnit ja nieiddat, din šlávat ja šlávvanissonat ja din gávpogiid levilaččat, vierrásat, oarbásat ja leaskkat, ja lehket buohkat ilus dan báikkis maid Hearrá, din Ipmil, vállje namas ássanbáikin. 12Muitet ahte dii ieža leiddet šlávvan Egyptas. Dollet danin dárkilit dáid mearrádusaid.
13Go lehpet geargan čohkkemis dan maid lehpet ožžon gordneráidnensajis ja viidnebohčingáris, de dollet lastagoahtebasiid čieža beaivvi. 14Lehket ilus daid basiid, dii ja din bártnit ja nieiddat, din šlávat ja šlávvanissonat ja din gávpogiid levilaččat, vierrásat, oarbásat ja leaskkat. 15Čieža beaivvi dii galgabehtet doallat basiid Hearrá, Ipmileattet, gudnin, dan báikkis maid son vállje. Hearrá, din Ipmil, buressivdnida din ja buot din šattu ja buot din bargguid, ja danin dii galgabehtet ávvudit ja leat ilus.
16Golmma geardde jagis, suvrutkeahtes láibbi basiid, vahkkobasiid ja lastagoahtebasiid, buot din dievddut galget boahtit Hearrá, din Ipmila, muođuid ovdii dan báikkis maid son vállje. Ii oktage oaččo boahtit Hearrá muođuid ovdii guoros gieđaid, 17muhto juohkehaš galgá addit dan maid suitá dan mielde maid Hearrá, din Ipmil, lea addán sutnje.
Njuolggadusat duopmáriidda
18Bidjet čearddaideattet várás duopmáriid ja sidjiide veahkeheddjiid buot gávpogiidda maid Hearrá, din Ipmil, addá didjiide, ja sii galget dubmet álbmoga vuoigatlaččat. 19Allet bonja vuoigatvuođa alletge geahča olbmo hápmái. Allet váldde duolgguid, danne go duolggut čuovggahuhttet viisá čalmmiid ja botnjet dan olbmo ášši gii lea vuoigadis. 20Váinnuhehket vuoiggalašvuođa, aivve vuoiggalašvuođa. Dalle dii beassabehtet eallit ja váldit oapmineattet dan eatnama maid Hearrá, din Ipmil, addá didjiide.
Rievttes ipmilbálvalus
21Allet cegge ašeračuoldda dahje eará muorraáđa áltára báldii maid ráhkadehpet Hearrái, Ipmilasadet, 22alletge makkárge geađgebácci, danin go Hearrá, din Ipmil, vašuha dakkáriid.
