1Dii ehpet oaččo oaffaruššat Hearrái, Ipmilasadet, dakkár vuovssá dahje sávzza mas lea juoga vihki dahje mihkkege máinniid, danin go dan Hearrá, din Ipmil, fasttáša.
2Jos din gaskkas, muhtumis dain gávpogiin maid Hearrá, din Ipmil, didjiide addá, lea dievdu dahje nisson gii dahká dan mii lea bahá Hearrá, din Ipmila, čalmmiin, ja rihkku su lihtu, 3soamis gii su gohččuma vuostá bálvala eará ipmiliid ja rohkadallá daid dahje beaivváža, mánu ja oppa almmi veaga, 4ja dat dieđihuvvo didjiide, de dutket dan ášši dárkilit. Jos lea duohta ja vissis ahte dakkár fastivuohta lea dahkkojuvvon Israelis, 5de dat dievdu dahje nisson gii lea dahkan dan bahás dagu, galgá dolvojuvvot gávpotportii ja geađgáduvvot jámas. 6Jos muhtin olmmoš ráŋggáštuvvo jápmimiin, de áššis galget leat guokte dahje golbma duođašteaddji. Ii ovttage oaččo heakkahuhttit ovtta duođašteaddji duođaštusa vuođul. 7Duođašteaddjit galget bálkestit vuosttaš geđggiid, ja dasto oppa álbmot galgá dahkat seammá láhkái. Duššadehket bahá álbmoga gaskkas.
Alimus duopmostuollu
8Jos din gávpogiin bohtet ovdan ilá váttis riekteáššit – leaš dat dal goddinášši, riidoášši dahje cápminášši – de mannet dan báikái maid Hearrá, din Ipmil, vállje. 9Mannet levilaš báhpaid lusa ja dan olbmo lusa gii dalle lea duopmárin; sii almmuhit didjiide duomu. 10Dahket dasto dan mearrádusa mielde maid sii leat almmuhan didjiide dan báikkis maid Hearrá vállje. Dollet oskkáldasat buot sin rávvagiid. 11Jeagadehket sin rávvagiid ja duomu maid sii celket. Allet spiehkas olgeš alletge gurut beallái dan mearrádusas maid sii almmuhit didjiide.
12Muhto jos soamis lea nu nággár ahte ii guldal dan báhpa gii doaimmaha bálvalusa Hearrá, du Ipmila, luhtte, iige duopmára, de son galgá jápmit. Duššadehket bahá Israelis. 13Oppa álbmot gullá dan ja ballá, iige oktage leat šat nie nággár.
Gonagasláhka
14Go dii lehpet boahtán dan eatnamii maid Hearrá, din Ipmil, addá didjiide, ja go lehpet váldán dan oapmineattet ja ássán dohko, de dii veadjibehtet jurddašit: “Mii dáhttut alcceseamet gonagasa, nugo buot min birasálbmogiinge lea.” 15Bidjet dalle alcceseattet gonagassan dan olbmá gean Hearrá, din Ipmil, vállje. Bidjet gonagassan iežadet álbmoga olbmá; dii ehpet oaččo bidjat gonagassan olgoeatnama olbmá gii ii leat din viellja. 16Muhto gonagas ii oaččo háhkat ollu heasttaid; son ii oaččo vuolggahit olbmáidis Egyptii háhkat doppe heasttaid, Hearráhan lea cealkán didjiide: “Allet šat goassege máhca dan geainnu.” 17Gonagas ii oaččo váldit alccesis máŋga áhká, vai su váibmu ii gáidda Hearrás, iige son oaččo čoaggit alccesis beare ollu silbba ja golli.
18Go gonagas lea čohkánan truvdnosis, de son galgá čálihit geardduhusa dán lágas mii lea levilaš báhpaid hálddus. 19Son galgá atnit dan alddis ja lohkat dan nu guhká go eallá, vai son oahppá ballat Hearrás, Ipmilisttis, ja doallat oskkáldasat buot mii lea čállojuvvon dán láhkii, buot dáid mearrádusaid. 20Dalle son ii alit iežas vieljaidis badjel iige spiehkas lágas, ii gurut iige olgeš beallái. Dalle son ja su bártnit ožžot ráđđet guhká Israelis.
