1Guldal, albmi, maid mun sártnun,
gullos eanan mu sániid!
2Golgos mu oahpahus arvin,
goikos mu sárdnun suoldnečalmmiid láhkái,
dego arveoakti ruonas rássái,
nugo savda buot dan ala mii šaddá.
3Mun gulahan Hearrá nama.
Addet min Ipmilii gudni!
4Son lea min bákti,
su dahku lea ollis,
buot su geainnut leat vuoigadat.
Son lea oskkáldas Ipmil, ii son beahte.
Son lea vanhurskkis ja vuoiggalaš.
5Dát juonalaš ja vearálaš buolva behtii su,
dat geat eai šat leat su mánát.
6Dán láhkáigo don mávssát Hearrái,
don doavkkes ja dáidemeahttun álbmot?
Iigo son leat du áhčči ja sivdnideaddji?
Son ráhkadii du ja attii dutnje hámi.
7Muitet dološ áiggiid,
jurddašehket vássán buolvvaid beivviid.
Jerret áhčiineattet, de sii muitalit,
gahčet vuoras olbmuin,
de beassabehtet gullat.
8Go Alimus attii álbmogiidda eatnamiid
ja sirrii olbmuid olbmuin,
go son mearridii sin guovlluid
Ipmila bártniid logu mielde,
9de Jakob šattai Hearrá oassin,
Israel su árbin ja opmodahkan.
10Son gávnnai su ávdin eatnamis,
meahcis gos dušše holvvas gullui.
Son suodjalii su ja anii sus fuola,
son várjalii su nugo čalbmegáhkás.
11Nugo goaskin giktala čivggaid beasis
ja sattáhallá daid bajábealde,
nu son lebbii sojiidis
ja guttii iežas álbmoga.
12Aivve Hearrá oahpistii iežas olbmuid,
ii oktage vieris ipmil ovttas suinna.
13Son divttii sin riidet alážiid badjel
ja borrat bealddu šattuid,
njammat honnega bávttis
ja oljju garra geađggis.
14Son attii sidjiide gusalávcca
ja sávzzamielkki,
sii borre lábbáid buoiddi,
Bašana vierccaid ja bohkáid,
álbmámus nisuid.
Viidnemuorjevarra šattai sin viidnin.
Jakob borai ja gallánii.
15Nu Ješurun buoiddui ja riemai čiekčat,
son šattai buoidin, gassagin ja váfin.
Son hilggui Ipmila, sivdnideaddjis,
badjelgeahčai iežas bestojumi bávtti.
16Israel moaráhuhtii su
vieris ipmiliiguin,
suhttadii su fastivuođaidisguin.
17Dat oaffarušai bahás vuoiŋŋaide
mat eai leat ipmilat,
ipmiliidda maid ii dovdan,
ođđa ipmiliidda maid easkka lei gávdnan,
mat ledje apmasat áhčiide.
18Dii hilggodeiddet bávtti
mii attii didjiide eallima,
vajáldahtiidet Ipmila
gii lei din riegádahttán.
19Go Hearrá oinnii Israela daguid,
son moaráhuvai bártniidasas ja nieiddaidasas
ja hilggui sin.
20Son celkkii:
Mun čiegan sis muođuidan
ja geahčan mo sidjiide geavvá loahpas,
dasgo sii leat jorggu buolva,
mánát geaidda ii sáhte luohttit.
21Sii leat moaráhuhttán mu vearri ipmiliiguin,
suhttadan mu duššálaš govaideasetguin.
Danin mun moaráhuhtán sin álbmogiin
mii ii leat álbmot,
bijan jierpmehis olbmuid hárdit sin.
22Mu moarri lea buolláhan dola,
dat šloavvá gitta jábmiidáimmu čiekŋalassii.
Dat boaldá eatnama ja dan šattuid,
loaktá váriid vuođđudusaid.
23Mun čohkken lihkuhisvuođaid sin badjelii,
buot njuolaidan mun anán sin vuostá.
24Sii vuoimmehuvvet nealgái,
roahppánit rohttudávdii,
jápmet bávččas buozalvassii.
Mun vuolggahan sin vuostá
boraspiriid bastilis bániid,
gišvvardeaddji mirkogearbmašiid.
25Olgun sin mánáid goddá miehkki,
viesus garra ballu sorbme
sihke nuorra olbmá ja nieidda,
sihke njuoratmáná ja čurgesvuovttaga.
26Mun sáhtášin cuvket sin,
sihkkut áibbas sin muittu olbmuid gaskkas,
27juos in balaše vašálačča bilkkus,
das ahte vuostálastit ipmirdivčče boastut
ja dajašedje: Min giehta lea gievra,
ii Hearrá leat dahkan dán.
28Dát lea ráđehis álbmot,
das váilu áddejupmi.
29Jos sii livčče viisát,
de sii ipmirdivčče,
árvidivčče makkárin sin loahppa šaddá.
30Mo sáhttá okta olmmái doarridit duháha,
mo guovttis ádjit báhtui logiduháha,
jos Hearrá ii livčče vuovdán sin,
jos sin bákti ii livčče addán sin
vašálačča gihtii?
31Min vašálaččaid bákti
ii leat nugo min bákti,
dan sii ieža sáhttet dubmet.
32Sin viidnemuorra boahtá Sodomas,
dat lea šaddan Gomorra stelliin.
Sin viidnemuorjjit leat mirkomuorjjit,
sin muorjegihput rihččagat.
33Sin viidni lea gearbmašmirko,
kobraid hirbmatlaš sáhppi.
34“Buot dát lea mus áimmuin,
seilejuvvon mu vuorkkáide
35gitta mávssaheami beaivvi rádjái,
ráŋggáštusa beaivvi
go sin juolggit jurbot.
Sin heavahusa beaivi juo lahka,
dat mii sin vuordá, boahtá fargga.”
36Hearrá bealušta iežas álbmoga,
son árpmiha bálvaleddjiidis
go oaidná ahte sii leat nuondan,
sihke stuorrát ja smávvát
leat vuoimmehuvvan.
37Dalle son jearrá:
“Gos dál leat din ipmilat,
gos bákti masa dorvvasteiddet?
38Čuožžilehkoset dál din veahkkin
ipmilat maidda boraheiddet
njuovvanoaffariiddádet buoiddi,
jugaheiddet juhkanoaffariiddádet viinni!
Lehkoset dat din suodjin!
39Dihtet ahte mun lean Ipmil,
mun, ii oktage eará.
Mun vuolggahan jápmima ja attán eallima,
mun hávváduhtán ja dálkkastan,
ii leat oktage gii gádju mu gieđas.
40Mun bajidan gieđa almmi guvlui
ja cealkkán:
Nu duohta go mun ealán agálaččat,
41de mun saján álddagasti miehkkán,
dohppen iežan njuollaskuohpu.
Mun mávssahan vašálaččaidasan,
ráŋggáštan daid geat vašuhit mu.
42Mu njuolat juhkaluvvet varas,
gahččan olbmuid ja fáŋggaid varas,
mu miehkki borrá oačči,
vašálačča hoavddaid oivviid.”
43Ávvut, albmi, ovttas su álbmogiin!
Son mávssaha bálvaleddjiidis vara,
ráŋggášta vašálaččaidis.
Son buhtista iežas álbmoga eatnama.
44Moses sártnui dán lávlaga sániid ovttas Josuain, Nuna bártniin, oppa álbmoga gullut.
Mosesa loahpahansánit
45Go Moses lei geargan sárdnumis israellaččaide buot dán, 46de son celkkii vel sidjiide: “Váldet vuhtii buot várrehussániid maid mun odne lean sárdnon didjiide. Gohččot mánáideattet doallat visot mii lea čállojuvvon dán láhkii. 47Dat eai leat guoros sánit; dat leat din eallin. Jos dii doallabehtet dáid sániid, de dii oažžubehtet eallit guhká dan eatnamis maid mannabehtet váldit oapmineattet Jordana don bealde.”
48Dan seammá beaivvi Hearrá sártnui Mosesii: 49“Mana Abarimváriide ja goarkŋo Nebo čohkkii mii lea Moabis Jeriko buohta. Geahčat doppe Kanaana eatnama maid mun attán israellaččaide opmodahkan. 50Don jámát dan várrái ja váldojuvvot olbmuidat lusa, nugo vielljat Aron jámii Horvárrái ja váldojuvvui olbmuidis lusa. 51Ná dáhpáhuvvá danin go doai leidde oskkáldasmeahttumat munnje Meriba čáhcebáikkis Kadešis Sinmeahcis eahppige atnán mu bassin israellaččaid čalmmiin. 52Don oaččut geahčadit dan eatnama gáidagasas, muhto it beasa dan eatnamii maid mun attán israellaččaide.”
