5. Mosesgirji 33

Hearrá boahtá Sinajis,

Seiras son badjána čuovgat álbmogasas,

báitimis son almmustuvvá Paranváris.

Son boahtá Kadešmeahci guovllus,

son manná Moaba vilttiid guora.

₃Hearrá ráhkista čearddaidis,

buot su bassi olbmot leat su gieđas.

Sii čohkánit su julggiid ovdii

ja váldet vuostá su sániid.

₄Moses attii midjiide lága

opmodahkan Jakoba searvegoddái.

₅Hearrá šattai Ješuruna gonagassan

go álbmoga oaivámuččat čoagganedje,

go buot Israela čearddat ledje čoahkis.

₆Ruben galgá eallit iige jápmit,

muhto su olbmát eai šatta eatnagin.

₇Juda birra son celkkii:

Hearrá, gula Juda čuorvasa,

divtte su boahtit iežas álbmoga lusa

man ovddas son lea soahtan.

Veahket su su vašálaččaid vuostá!

₈Levi birra son celkkii:

Du tummim galgá Levii,

du urim iežat oskkáldas olbmái,

sutnje gean don geahččalit Massas,

gean don hástet Meribačázis.

₉Son celkkii iežas áhči ja eatni birra:

“Mun in leat oaidnán sudno goassege.”

Son ii dovddastan vieljaidis vielljanis

iige dáhtton dovdat mánáidis.

Levi čearda doalai du sáni

ja bealuštii du lihtu.

₁₀Sii oahpahit Jakobii du báhkkomiid,

Israelii du lága.

Sii diktet suovvasa badjánit du ovdii

ja buktet ollesoaffariid du áltára ala.

₁₁Hearrá, buressivdnit su fámu,

suova su gieđaid daguid dohkket dutnje!

Cuvke su vuostálastiid alimiid,

vai su vašálaččat eai šat čuožžil.

₁₂Benjamina birra son celkkii:

Dat gean Hearrá ráhkista, ássá oadjebassan.

Hearrá várjala su álohii,

son ássá Benjamina dieváid gaskkas.

₁₃Josefa birra son celkkii:

Hearrá buressivdnida su eatnama

buoremusain mii boahtá almmis,

sulnniin ja čáziin mii boahtá

eatnama čiekŋalasas,

₁₄buoremus šattuiguin

maid beaivváš láddada

mánus mánnui,

₁₅dološ váriid láhjiiguin,

agálaš alážiid attáldagaiguin,

₁₆eatnama valljivuođain,

su buressivdnádusain

gii ásai bastilislátnjámiestagis.

Bohtos dat Josefa oaivvi badjelii,

su oaivečohka badjelii

gii lea vieljaidis oaivámuš.

₁₇Goargat son lea,

vuovssá vuosttašriegádeaddji.

Dego meahcivuovssá čoarvvit

leat su čoarvvit,

daiguin son doarru buot álbmogiid

gitta eatnama ravddaid rádjái.

Dakkárat leat Efraima logiduháhat,

Manasse duháhat.

₁₈Sebulona birra son celkkii:

Illut, Sebulon, go vuolggát,

leage ilus, Isaskar, iežat gođiin!

₁₉Sii rávket álbmogiid várrái

gos sii oaffaruššet rivttes oaffariid.

Sii ellet meara valjis

ja ártnain mat leat čihkkojuvvon sáddui.

₂₀Gada birra son celkkii:

Buressivdniduvvon lehkos son

gii viiddida Gada eatnama!

Gad lea ássansajistis nugo ledjon,

son gaikkoda gieđa ja oaivvi.

₂₁Son geahčadii alccesis buoremus oasi,

eatnama mii dohkke ráđđejeaddjái.

Go álbmoga oaivámuččat čoahkkanedje,

de son ollašuhtii Hearrá vanhurskkisvuođa

ja su duomuid Israelis.

₂₂Dana birra son celkkii:

Dan lea nuorra ledjon

mii boahtá ruohta Bašanis.

₂₃Naftali birra son celkkii:

Naftali lea valjit árpmihuvvon,

Hearrá lea buressivdnidan su valljugasat,

son oažžu eatnama oarjin ja lullin.

₂₄Ašera birra son celkkii:

Buressivdniduvvon ovdalii

eará bártniid lea Ašer.

Ehccoset su su vieljat,

buonjostehkos son julggiidis oljjus.

₂₅Lehkoset du smarttit

ruovddis ja bronssas,

nugo du beaivvit leat,

nu lehkos du fápmu.

₂₆Ii oktage leat nugo Ješuruna Ipmil!

Son riide almmi badjel veahkehit du,

allatvuođastis son riide balvvaid alde.

₂₇Du ássansadji lea agálaš Ipmil,

deike vuolás ollet Agálačča gieđat.

Son ájii du vašálaččaid du ovddas

ja gohčui du duššadit sin.

₂₈Nu Israel oažžu ássat oadjebassan,

Jakoba nálli beassá orrut ráfis

dan eatnamis mas lea gordni ja viidni,

doppe gos almmis goaiku suoldni.

₂₉Lihkolaš leat don, Israel,

gii lea nugo don?

Don leat álbmot maid Hearrá beastá.

Son lea du suodjaleaddji galba,

du miehkki mii vuoitá.

Du vašálaččat dohkkestuvvet dutnje,

sin alážiid don duolmmat.