5. Mosesgirji 34

₁Moses goarkŋui Moaba jalgadasas Nebovárrái, Pisga čohkkii mii lea Jeriko buohta. Hearrá čájehii sutnje oppa eatnama: Gileada gitta Dana rádjái, ₂oppa Naftali, de Efraima ja Manasse eatnamiid ja oppa Juda eatnama gitta oarjemeara rádjái ₃ja Negeva ja Jordana duolbadasa, dan leagi mii ollá Jerikos, Pálbmagávpogis, gitta Soara rádjái. ₄Hearrá celkkii sutnje: “Dát lea dat eanan maid mun vuordnumiin lohpidin Abrahamii, Isakii ja Jakobii addit sin nállái. Mun divttán du oaidnit dan iežat čalmmiiguin, muhto don it beasa dohko.”

₅Moses, Hearrá bálvaleaddji, jámii Moaba eatnamii, nugo Hearrá lei cealkán. ₆Hearrá hávdádii su muhtun leahkái Moaba eatnamii, Bet-Peora buohta; ii oktage dieđe vel otná beaivvige gokko su hávdi lea. ₇Moses lei čuođiguoktelogijahkásaš go jámii, muhto su čalmmit eai lean sevnnjodan iige son lean vuoimmehuvvan. ₈Israellaččat čirro Mosesa Moaba jalgadasain golbmalogi beaivvi, dassá go moraštanáigi nogai.

₉Viissisvuođa vuoigŋa devddii Josua, Nuna bártni, danin go Moses lei bidjan gieđaid su ala. Israellaččat jeagadedje su ja dahke daid rávvagiid mielde, maid Hearrá lei addán Mosesii.

₁₀Israelis ii šat čuožžilan dakkár profehta go Moses geainna Hearrá sártnui muođus muhtui, ₁₁gean Hearrá vuolggahii Egyptii dahkat mearkkaid ja oavdduid faraoi ja buot su bálvaleddjiide ja oppa su eatnamii, ₁₂ja buot daid stuorra ja hirbmatlaš daguid maid Moses dagai gievrras gieđain oppa Israela oaidnut.