Josua 1

₁Go Moses, Hearrá bálvaleaddji, lei jápmán, de Hearrá celkkii Josuai, Nuna bárdnái, Mosesa bálvái: ₂“Mu bálvaleaddji Moses lea jápmán. Doalvvo dál oppa Israela álbmoga Jordana rastá dan eatnamii maid mun attán sidjiide. ₃Juohke báikki gosa dii duolmmastehpet, mun attán didjiide, nugo mun lohpidin Mosesii. ₄Din eanan ollá meahci rájes ja Libanona rájes gitta Stuorramerrii gosa beaivváš luoitáda. Dasa gullá maid oppa hetlaččaid eanan gitta stuorra Eufrateanu rádjái. ₅Ii oktage biđe dus oppa du eallináiggis. Mun lean duinna nugo mun ledjen Mosesiin. Mun in hilggo du inge guođe du. ₆Leage roahkkat ja gievra! Don oaččut juogadit israellaččaide dan eatnama: Mun lean lohpidan dan sidjiide opmodahkan váliin maid vurdnon sin áhčiide. ₇Leage fal roahkkat ja gievra! Doala dárkilit dan lága maid mu bálvaleaddji Moses attii dutnje. Ale gáidda das olgeš alege gurut beallái, dalle dutnje menestuvvá buot maid riemat dahkat. ₈Ane álo dán lága sániid baksamiinnát. Guorahala dan ijatbeaivái, vai máhtát doallat dárkilit visot mii dasa lea čállojuvvon. Dalle dutnje menestuvvá visot, dalle don ovdánat. ₉Munhan lean gohččon du: Leage roahkkat ja gievra, ale suorgan alege bala, dasgo Hearrá, du Ipmil, lea duinna buot das maid dagat.”

₁₀Josua gohčui álbmoga njunušolbmáid ₁₁mannat siidda čađa ja cealkit álbmogii: “Ráhkadehket alcceseattet niestti, dasgo golmma beaivvi geažes dii mannabehtet Jordana rastá váldit oapmineattet dan eatnama maid Hearrá, din Ipmil, addá didjiide.” ₁₂Rubena ja Gada čearddaide ja Manasse čeardabeallái Josua dajai: ₁₃“Muitet rávvagiid maid Moses, Hearrá bálvaleaddji, attii didjiide. Sonhan celkkii ahte Hearrá, din Ipmil, addá didjiide dán eatnama ja diktá din ássat deike. ₁₄Din áhkát, mánát ja oamit ožžot báhcit dán eatnamii maid Moses attii didjiide Jordana nuorttabealde, muhto buot jálus soahteolbmát galget ráhkkanit soahtan láhkái ja rasttildit Jordana vieljaideattet njunnošis ja veahkehit sin, ₁₅dassážii go Hearrá lea diktán din vieljaid beassat ráfái nugo dinge, ja sii leat váldán oapmineaset dan eatnama maid Hearrá, din Ipmil, addá sidjiide. Dasto dii oažžubehtet máhccat iežadet eatnamii, dan eatnamii maid Moses, Hearrá bálvaleaddji, attii didjiide Jordana nuorttabealde.” ₁₆Sii vástidedje Josuai: “Mii dahkat buot maid don leat gohččon, ja mii mannat gosa ihkinassii don vuolggahat min. ₁₇Aiddo nugo mii jeagadeimmet Mosesa, nu mii jeagadit duge. Vare Hearrá, du Ipmil, livččii duinna, nugo son lei Mosesiin! ₁₈Juohkehaš gii vuostálastá du gohččumiid iige jeagat du juohke dáfus, goddojuvvo. Leage fal roahkkat ja gievra!”