5. Mosesgirji 4

₁Ja dál, Israel, gula daid lágaid ja njuolggadusaid maid mun oahpahan didjiide. Dollet daid, de dii oažžubehtet eallit ja sáhttibehtet váldit oapmineattet dan eatnama maid Hearrá, din áhčiid Ipmil, addá didjiide. ₂Allet lasit maidege dáidda gohččumiidda alletge váldde dain maidege eret. Dollet Hearrá, din Ipmila, báhkkomiid maid mun attán didjiide. ₃Dii lehpet iežadet čalmmiiguin oaidnán maid Hearrá dagai Baal-Peoris. Hearrá, du Ipmil, duššadii din gaskkas juohkehačča gii čuovvulii Baal-Peora. ₄Muhto dii geat leiddet oskkáldasat Hearrái, Ipmilasadet, lehpet buohkat eallimin odne.

₅Mun oahpahan didjiide lágaid ja njuolggadusaid, nugo Hearrá, mu Ipmil, lea gohččon mu dahkat. Dii galgabehtet doallat daid dan eatnamis maid lehpet dál mannamin váldit oapmineattet. ₆Doahttalehket ja dollet daid, vai eará álbmogat oidnet din viissisvuođa ja jierpmálašvuođa. Go sii gullet buot dáid lágaid, de sii dadjet: “Dát stuorra álbmot lea duođaid viissis ja jierpmálaš álbmot.” ₇Guđe eará stuorra álbmoga ipmilat leat seammá lahka iežaset álbmoga go Hearrá, min Ipmil? Son lea min lahka álo go mii čuorvut su. ₈Ja guđe stuorra álbmogis leat nu vuoigatlaš lágat ja njuolggadusat go dát láhka maid mun attán didjiide odne?

₉Muhto váruhehket vajáldahttimis dan maid lehpet oaidnán iežadet čalmmiiguin. Atnet dan muittus nu guhká go eallibehtet, ja oahpahehket dan mánáidasadet ja mánáideattet mánáide. ₁₀Allet vajáldahte dan beaivvi go čuoččuidet Hearrá, din Ipmila, muođuid ovddas Horebis, go son celkkii munnje: “Čohkke álbmoga mu ovdii! Mun divttán sin gullat iežan sániid, vai sii ohppet ballat mus nu guhká go ellet, ja vai sii oahpahit dáid mu sániid maiddái mánáidasaset.” ₁₁Dalle dii loaiddasteiddet lagabuidda ja čuoččasteiddet vári vuollái. Várri bulii njuovččadollan gitta almmi rádjái, ja lei seavdnjat, obbadálki ja mierká. ₁₂Hearrá sártnui didjiide dola siste. Dii gulaidet sániid, muhto ehpet oaidnán maidege hámiid; dii gulaidet dušše su jiena. ₁₃Son almmuhii didjiide lihtus sániid, logi báhkkoma maid galgabehtet doallat, ja čálii báhkkomiid guovtti geađgetávvalii. ₁₄Hearrá gohčui mu dalle oahpahit didjiide buot lágaid ja njuolggadusaid, vai dii doallabehtet daid dan eatnamis maid lehpet dál mannamin váldit oapmineattet.

₁₅Dii ehpet oaidnán maidege hámiid dalle go Hearrá sártnui didjiide dola siste Horebis. Dan dihte váruhehket ₁₆ráhkadeames makkárge govvabácci dahje eará ipmilgova mas lea olbmá dahje nissona hápmi ₁₇dahje meahcielliid dahje almmi lottiid hápmi ₁₈dahje eatnama heakkalaččaid hápmi dahje čázi guliid hápmi. ₁₉Go dii bajidehpet čalmmiid almmi guvlui ja geahččabehtet beaivvážii, mánnui ja násttiide, oppa almmi vehkii, de allet fillehala rohkadallat ja bálvalit daid. Daid Hearrá, din Ipmil, lea guođđán eará álbmogiidda. ₂₀Muhto din Hearrá buvttii Egypta šolgenuvnnas, vai dii šaddabehtet su iežas álbmogin, nugo dii dál lehpetge.

₂₁Hearrá moaráhuvai munnje din dihte ja vuortnui ahte mun in oaččo mannat Jordana rastá inge beasa dan buori eatnamii maid Hearrá, din Ipmil, addá didjiide opmodahkan, ₂₂muhto jámán Jordana dán beallái. Muhto dii oažžubehtet mannat Jordaneanu rastá ja váldit oapmineattet dan buori eatnama. ₂₃Váruhehket vajáldahttimis dan lihtu maid Hearrá, din Ipmil, lea dahkan dinguin, alletge ráhkat alcceseattet ipmilgova, danin go dan Hearrá, din Ipmil, lea gieldán dis. ₂₄ Hearrá, din Ipmil, lea duššadeaddji dolla, son lea áŋgiris Ipmil.

₂₅Go didjiide dasto leat riegádan mánát ja mánáid mánát ja dii lehpet sajáiduvvan eatnamii, de váruhehket dahkamis dakkár issoras dagu ahte ráhkadehpet muhtunlágán ipmilgova. Jos dii ráhkadehpet ipmilgovaid, de dii dahkabehtet dan mii lea bahá Hearrá, din Ipmila, čalmmiin, ja moaráhuhttibehtet su. ₂₆Mun válddán odne almmi ja eatnama duođašteaddjin go cealkkán ahte dii fargga duššabehtet dan eatnamis maid lehpet mannamin váldit oapmineattet Jordana nuppe bealde. Dii ehpet beasa eallit doppe guhká, muhto duššabehtet. ₂₇Hearrá biđge din álbmogiid gaskii, ja dis báhcá duššefal uhca jovkkoš daid álbmogiid gaskii maid sisa Hearrá doalvu din. ₂₈Doppe dii bálvalehpet ipmiliid maid olbmogieđat leat duddjon, muorraipmiliid ja geađgeipmiliid mat eai oainne, eai gula, eai bora eaige havsse. ₂₉Muhto doppe dii dasto ohcabehtet Hearrá, din Ipmila, ja gávdnabehtet su, jos ohcabehtet su vuoigadit ja olles váimmus. ₃₀Go buot dát deaivida din boahttevaš beivviid, de dii áŧestusasteattet máhccabehtet Hearrá, din Ipmila, lusa, ja gullabehtet su jiena. ₃₁Dasgo Hearrá, din Ipmil, lea váibmoláđis Ipmil. Ii son hilggo din iige divtte din duššat. Son ii vajáldahte lihtu maid dagai din áhčiiguin ja maid nannii váliin.

₃₂Guorahallet doložiid, muittašehket áiggiid mat ledje guhká ovdal din beivviid, gitta dan beaivvi rájes go Ipmil sivdnidii olbmuid eatnama ala. Leago gostege almmi vuolde dáhpáhuvvan mihkkege ná stuorráid, leago mihkkege dákkáriid beaggán ovdal? ₃₃Leago oktage álbmot gullan Ipmila sárdnumin dola siste? Ja almmatge dii lehpet bisson heakkas! ₃₄Dahje leago oktage ipmil arvan boahtit váldit alccesis olles álbmoga nuppi álbmoga gaskkas nugo Hearrá, din Ipmil, lea dahkan? Dii beasaidet iežadet čalmmiiguin oaidnit mo son ráŋggáštii egyptalaččaid, dagai ovdduid ja mearkkaid, soađai singuin ja buvttii din bajiduvvon gieđas ja stuorra hirbmatlaš daguidis fámuin eret Egyptas? ₃₅Buot dán dii oaččuidet oaidnit vai diehtibehtet ahte Hearrá lea Ipmil ja earret su ii leat oktage eará. ₃₆Almmis son divttii din gullat iežas jiena vai beassá bagadit din, ja eatnama alde son divttii din oaidnit iežas stuorra dola, ja dii gulaidet su sániid dola siste. ₃₇Danne go son ráhkistii din áhčiid ja válljii sin náli, de son ieš buvttii din Egyptas stuorra fámuinis. ₃₈Son ádjá din ovddas álbmogiid mat leat stuoribut ja gievrrabut go dii, son doalvu din sin eatnamii ja addá dan didjiide opmodahkan, nugo dál dáhpáhuvvá.

₃₉Danin dii odne galgabehtet diehtit ja vurket váibmui ahte Hearrá lea Ipmil badjin almmis ja vuollin eatnama alde, ja earret su ii leat oktage eará. ₄₀Doahttalehket su lágaid ja báhkkomiid maid mun odne attán didjiide, vai didjiide ja din nállái geavvá bures, ja vai dii oažžubehtet eallit guhká dan eatnamis maid Hearrá, din Ipmil, addá didjiide agálaš áigái.

₄₁Dasto Moses válljii Jordana nuorttabealde golbma gávpoga, ₄₂vai daidda oažžu báhtarit dat gii goddá olbmo vahágis ja almmá su ovdal vašutkeahttá. Dat gii báhtara dakkár gávpogii, beassá eallit. ₄₃Rubenlaččaide son válljii Besera mii lea alážis meahcis, gadlaččaide Ramota Gileadis ja manasselaččaide Golana Bašanis.

₄₄Dát lea dat láhka maid Moses gulahii israellaččaide. ₄₅Dát leat dat mearrádusat, lágat ja njuolggadusat maid Moses almmuhii israellaččaide, go sii das maŋŋil go ledje vuolgán Egyptas ₄₆ledje boahtán Jordana nuorttabeallái dan leahkái mii lea Bet-Peora buohta amorlaččaid gonagasa Sihona eatnamis. Sihon lei ráđđen Hešbonis, muhto son lei vuoittáhallan Mosesii ja israellaččaide go sii ledje boahtimin eret Egyptas. ₄₇Sii ledje váldán oapmin su eatnama ja maiddái Bašana gonagasa Oga eatnama. Israellaččat ledje váldán buot eatnamiid mat gulle dan guovtti amorlaš gonagassii Jordana nuorttabealde: ₄₈ eatnama mii ollá Aroera rájes Arnonjohkaleagi ravddas gitta Sirjonvárrái dahjege Hermonii, ₄₉ja oppa Jordanleagi nuorttabeali gitta Arabameara ja Pisga vilttiid rádjái.