Logi báhkkoma
1Moses rávkkai čoahkkái oppa Israela ja dajai: Gullet, israellaččat, daid lágaid ja njuolggadusaid maid mun odne almmuhan didjiide. Ohppet daid ja ellet dárkilit daid mielde. 2Hearrá, min Ipmil, dagai minguin lihtu Horebis. 3Son ii dahkan lihtu min áhčiiguin, muhto minguin geat leat dás odne, minguin buohkaiguin geat odne leat eallimin. 4Muođus muhtui Hearrá sártnui didjiide dola siste váris. 5Mun čužžon dalle Hearrá ja din gaskkas ja almmuhin didjiide Hearrá sániid, danne go dii balaidet dolas ehpetge gorgŋon várrái. Ná Hearrá celkkii:
6Mun lean Hearrá, du Ipmil, gii bukten du Egyptas, šlávvaviesus. 7Dus eai oaččo leat eará ipmilat go mun. 8Don it oaččo dahkat alccesat ipmilgova itge makkárge hámi das mii lea badjin almmis, it das mii lea vuollin eatnama alde itge das mii lea čáziin eatnama vuolde. 9Don it oaččo rohkadallat daid itge bálvalit daid, dasgo mun, Hearrá, du Ipmil, lean áŋgiris Ipmil, gii mávssahan áhčiid vearredaguid mánáide gitta goalmmát ja njealját bulvii daidda geat vašuhit mu, 10muhto árkkálmasttán duháhiid go sii ráhkistit mu ja dollet mu báhkkomiid. 11Don it oaččo cealkit duššás Hearrá, Ipmilat, nama, dasgo Hearrá ii ane sivaheapmin dan gii cealká duššás su nama.
12Doala sabbatbeaivvi ja basut dan, nugo Hearrá, du Ipmil, lea gohččon du dahkat. 13Guhtta beaivvi galggat bargat ja doaimmahit buot bargguidat, 14muhto čihččet beaivi lea Hearrá, du Ipmila, sabbat. Dalle don it oaččo bargat maidege, it don iige du bárdni iige du nieida, ii du šlávva iige du šlávvanisson, ii du vuoksá iige ásen, eai du eará oamit iige vieris gii ássá du gávpogiin. Nu du šlávva ja du šlávvanisson oažžu vuoiŋŋastit nugo donge. 15Muitte ahte don ieš ledjet šlávvan Egyptas, ja ahte Hearrá, du Ipmil, buvttii du doppe gievrras ja bajiduvvon gieđain. Dan dihte Hearrá, du Ipmil, lea gohččon du doallat sabbatbeaivvi.
16Gudnejahte áhčát ja eatnát, nugo Hearrá, du Ipmil, lea gohččon du dahkat, vai dutnje geavvá bures ja don oaččut eallit guhká dan eatnamis maid Hearrá, du Ipmil, addá dutnje. 17Don it oaččo goddit. 18Don it oaččo rihkkut náittosdili. 19Don it oaččo suoládit. 20Don it oaččo cealkit vearreduođaštusa lagamuččat vuostá. 21Don it oaččo anistuvvat lagamuččat áhkkái. Don it oaččo anistuvvat lagamuččat vissui itge beldui, it su šlávvii itge šlávvanissonii, it su vuoksái itge su ásenii itge masage mii lea su.
22Dáid sániid Hearrá sártnui didjiide go dii buohkat leiddet čoahkis vári vuolde. Son sártnui daid alla jienain dola, balvva ja seavdnjadasa siste. Eará son ii sárdnon. Son čálii sániidis guovtti geađgetávvalii ja attii daid munnje. 23Go dii leiddet gullan jiena seavdnjadasa siste dan botta go várri bulii dollan, de buot din čeardaoaivámuččat ja vuorrasat bohte mu lusa 24ja dadje: “Hearrá, min Ipmil, lea čájehan midjiide hearvásvuođas ja stuorisvuođas, ja mii leat gullan su jiena dola siste. Odne mii leat oaidnán ahte olmmoš sáhttá gullat Ipmila sárdnumin ja dattetge bissut heakkas. 25Manin mii dalle fertešeimmet jápmit? Duot stuorra dolla boaldá min. Jos mii velá oktii gullat Hearrá, min Ipmila, sárdnumin, de mii jápmit. 26Gii jámolaččaid lea beassan eallit maŋŋil go lea gullan ealli Ipmila jiena dola siste, nugo mii leat? 27Mana don Hearrá, min Ipmila, lusa ja guldal maid son sárdnu. Muital dasto midjiide buot maid Hearrá, min Ipmil, lea sárdnon dutnje, de mii guldalit ja jeagadit.”
28Go Hearrá gulai maid dii sártnuidet munnje, de son celkkii: “Mun lean gullan maid dát álbmot sártnui dutnje. Buot maid sii sárdno, lea riekta. 29Vare sis livččii dakkár miellaláhki ahte sii álo ballet mus ja dollet buot mu báhkkomiid! Dalle sidjiide ja sin mánáide geavvá álelassii bures. 30Gohčo sin máhccat gođiidasaset, 31muhto báze don dása mu ovdii, de mun dieđihan dutnje oppa lága, buot mearrádusaid ja njuolggadusaid. Daid don galggat oahpahit sidjiide, vai sii dollet daid dan eatnamis maid mun attán sidjiide oapmin.”
32Dahket dal oskkáldasat dan maid Hearrá, din Ipmil, lea gohččon din dahkat. Allet spiehkkas olgeš alletge gurut beallái, 33muhto vádjolehket juohke dáfus dan geainnu man Hearrá, din Ipmil, lea gohččon din vádjolit. Dalle dii beassabehtet eallit, didjiide geavvá bures ja dii oažžubehtet ássat guhká dan eatnamis maid váldibehtet oapmineattet.
