5. Mosesgirji 7

₁Go Hearrá, din Ipmil, doalvu din dan eatnamii maid dii dál lehpet mannamin váldit oapmineattet, de son ádjá din ovddas čieža álbmoga mat leat stuoribut ja gievrrabut go dii: Hetlaččaid, girgašlaččaid, amorlaččaid, kanaanlaččaid, perisselaččaid, hivvelaččaid ja jebuslaččaid. ₂Go Hearrá, din Ipmil, addá daid din gihtii ja dii lehpet časkán daid, de dii galgabehtet vihahit daid duššadeapmái. Allet daga lihtu daiguin alletge árpmit daid. ₃Allet čana daid olbmuiguin fuolkevuođačatnasiid, allet atte nieiddaideattet sin bártniide alletge váldde sin nieiddaid bártniidasadet áhkkán. ₄Sii vedjet giktalit din mánáid gáidat mus ja bálvalit eará ipmiliid, nu ahte Hearrá moarri cahkiida din vuostá, ja son duššada din johtilit. ₅Dahket sidjiide baicce ná: Njeidet sin áltáriid, cuvkejehket sin geađgebácciid, čullet moallun sin ašeračuolddaid ja boldet sin ipmilgovaid. ₆Diihan lehpet Hearrái, Ipmilasadet, basuhuvvon álbmot. Hearrá, din Ipmil, lea válljen din mávssolaš opmodahkanis buot máilmmi álbmogiid gaskkas.

₇Hearrá ii liikon didjiide ja válljen din danin go dii livččiidet álbmogin leamaš stuorit go eará álbmogat – diihan lehpet unnimus buot álbmogiin. ₈Muhto Hearrá ráhkistii din ja dáhtui doallat váli maid lei vurdnon din áhčiide, ja danin son buvttii din gievrras gieđain šlávvaviesus ja besttii din farao, Egypta gonagasa, gieđas. ₉De dihtet dalle ahte dušše Hearrá, din Ipmil, lea Ipmil. Son lea oskkáldas, son doallá iežas lihtu fámus. Duhát bulvii son lea oskkáldas daidda geat ráhkistit su ja dollet su báhkkomiid, ₁₀muhto mávssaha daidda geat vašuhit su. Son ii ájahala duššadeames dan gii vašuha su. ₁₁Dollet dan dihte oskkáldasat lága ja mearrádusaid ja njuolggadusaid maid mun odne attán didjiide.

₁₂Jos dii doahttalehpet dáid njuolggadusaid ja oskkáldasat doallabehtet daid, de Hearrá, din Ipmil, doallá iežas lihtu ja lea oskkáldas, nugo son lea vurdnon din áhčiide. ₁₃Son ráhkista din, buressivdnida din ja dahká din stuorra álbmogin. Son buressivdnida mánáid maid dii oažžubehtet ja šattu maid rádjabehtet, din viinni ja oljju, din gusaid ja sávzaetniid dan eatnamis maid son vuordnumiin lohpidii din áhčiide addit didjiide. ₁₄Dii oažžubehtet eambbo buressivdnádusa go buot eará álbmogat. Din gaskkas ii leat oktage šattohis dievdu, ii sahkuhis nisson iige oapmi. ₁₅Hearrá caggá dus buot buohcuvuođaid. Son ii njoammut dutnje ovttage dain bahás dávddain maid dii dovddaidet dan áiggis go leiddet Egyptas, muhto diktá daid deaividit buot din vašálaččaid. ₁₆Dii duššadehpet buot álbmogiid maid Hearrá, din Ipmil, addá din gihtii. Allet árkkálmastte sin alletge bálval sin ipmiliid, muđui dat šaddet didjiide giellan.

₁₇Dii soaitibehtet jurddašit: “Dát álbmogat leat stuoribut go mii. Mo mii nagodit duššadit daid?” ₁₈Allet goit bala dain, muhto muitet maid Hearrá, din Ipmil, dagai faraoi ja buot egyptalaččaide. ₁₉Muitet daid stuorra geahččalusaid maid oinniidet iežadet čalmmiiguin. Muitet mearkkaid ja oavdduid maid Hearrá, din Ipmil, dagai, ja su gievrras ja bajiduvvon gieđa man vehkiin son buvttii din Egyptas. Seammá ládje Hearrá, din Ipmil, dahká buot daidda álbmogiidda main dii dál ballabehtet. ₂₀Hearrá, din Ipmil, vuolggaha maid dorvvuhisvuođa daid gaskii, dassážii go buohkat geat vel leat báhcán heggii ja leat čiehkádan dus, leat duššan. ₂₁Allet bala, danne go Hearrá, din Ipmil, stuorra ja hirpmus Ipmil, lea dinguin. ₂₂Hearrá, din Ipmil, ádjá daid álbmogiid eret din ovddas maŋistaga. Allet jávkat daid hoahpus, muđui meahcispiret lasket didjiide vahágin. ₂₃Muhto Hearrá, din Ipmil, addá daid álbmogiid din gihtii ja moivašuhttá daid, dassážii go dat duššet. ₂₄Son addá daid gonagasaid din gihtii, ja dii jávkadehpet daid nama eatnama alde. Ii oktage biđe dis; dii duššadehpet daid ovttaheapmin.

₂₅Dii galgabehtet boaldit daid ipmilgovaid. Allet anistuva daid silbbaide ja golliide alletge váldde daid alcceseattet, muđui dat šaddet didjiide giellan, ja Hearrá, din Ipmil, fasttáša daid. ₂₆Allet luoitte maidege fastivuođaid vissoseattet, danin go dalle dii ieža vihahuvvobehtet duššadeapmái oktanaga daiguin. Dii galgabehtet fasttášit dakkár fastivuođaid; daid galgá vihahit duššadeapmái.