5. Mosesgirji 8

₁Dollet oskkáldasat oppa dan lága maid mun odne attán didjiide, vai beassabehtet eallit ja eatnánit ja váldit oapmineattet dan eatnama maid Hearrá vuordnumiin lohpidii din áhčiide. ₂Muitet mo Hearrá, din Ipmil, lea oahpistan din meahcis njealljelogi jagi. Son bagadii din ja geahččalii din vai beassá diehtit, áigubehtetgo dii doallat su báhkkomiid vai ehpet. ₃Son bagadii din nelggiin ja biepmai din mannain maid ehpet dii eaige din áhčitge dovdan. Son dáhtui oahpahit didjiide ahte olmmoš ii eale dušše láibbis, muhto juohke sánis mii boahtá Hearrá njálmmis. ₄Dan njealljelogi jagis din biktasat eai nohkan eaige din juolggit bohtanan. ₅Ipmirdehket dalle ahte Hearrá, din Ipmil, bagada din nugo olmmái bagada iežas bártni. ₆Dollet Hearrá, Ipmileattet, báhkkomiid, nu ahte vádjolehpet su geainnuid ja ballabehtet sus.

₇Hearrá, din Ipmil, doalvu din dan buori eatnamii gos leat jogažat ja ádjagat ja gos čiekŋalasa čázit golggiidit legiin ja váriin, ₈nisu ja bivggi, viidnemuora, fiikonmuora ja granáhtaehpelmuora, oliivamuora ja honnega eatnamii. ₉Dan eatnamis dii ehpet dárbbaš eallit vátnivuođas iige dis váillo mihkkege. Dan eatnama geađggit leat ruovdi, ja dan váriin dii sáhttibehtet boltut veaikki. ₁₀Go dii dalle borrabehtet gallás, de máidnot dalle Hearrá, Ipmileattet, go son lea addán didjiide dan buori eatnama. ₁₁Váruhehket vajáldahttimis Hearrá, Ipmileattet. Dollet su báhkkomiid, njuolggadusaid ja lágaid maid mun odne attán didjiide. ₁₂Go dii borrabehtet gallás ja huksebehtet čáppa viesuid ja ássabehtet dain, ₁₃go din gusat ja sávzzat eatnánit, go didjiide čoggo silba ja golli ja buot din opmodat lassána, ₁₄de váruhehket čeavlumis ja vajáldahttimis Hearrá, Ipmileattet, gii buvttii din Egyptas, šlávvaviesus. ₁₅Son oahpistii din čađa stuorra ja hirpmus meahci gos ledje dievva mirkogearbmašat ja skorpiovnnat, čađa čázehis goikeeatnama. Son divttii čázi golggiidit garra bávttis, ₁₆ja meahcis son attii didjiide manna borrat, biepmu maid din áhčit eai dovdan, danne go son dáhtui bagadit ja geahččalit din ja maŋimustá atnit didjiide buorrevuođa. ₁₇Allet gátte ahte dii lehpet iežadet fámuin ja iežadet gievrras gieđain háhkan alcceseattet dan riggodaga. ₁₈Muitet ahte Hearrá, din Ipmil, addá didjiide fámu háhkat riggodaga, danin go dán beaivvige son bisuha lihtu maid dagai din áhčiiguin ja maid nannii váliin.

₁₉Muhto jos dii vajáldahttibehtet Hearrá, Ipmileattet, ja vádjolehpet eará ipmiliid maŋis ja bálvalehpet ja rohkadallabehtet daid, de mun duođaštan didjiide odne ahte dii duššabehtet. ₂₀Nugo álbmogat maid Hearrá duššada din ovddas, nu diige duššabehtet, jos dii ehpet gula Hearrá, din Ipmila.