1Vuolggat láibbát čázi badjel,
áiggi guhkkodahkii don oaččut dan fas.
2Juogat čiehčasii, velá gákcásiige
dan mii dus lea
– ithan don dieđe makkár lihkohisvuođat
vedjet deaividit eatnama.
3Go balvvat leat dievvan,
de dat golggahit arvvi eatnamii,
ja go muorra gahččá
lulás guvlui dahje davás,
de gosa muorra gahččá, de das dat orru.
4Dat gii biekkaid dárko, ii šatta gilvit,
gii balvvaid várdá, ii šatta láddjet.
5Nugo don it dieđe biekka geainnu itge dan mo dávttit šaddet áhpehis nissona goŧŧui, nu uhccán don áddet Ipmila daguid, su gii dahká visot.
6Gilvve gilvagiiddát iđedis
alege divtte iežat gieđa
vuoiŋŋastit eahketbealláige.
Ithan don dieđe, menestuvvágo dutnje dát vai dot, dahje šaddágo guktuid háviid ovtta buorre.
Nuorravuohta ja boarisvuohta
7Čuovga lea buorre,
čalmmiide lea hávski oaidnit beaivváža.
8Jos olmmoš oažžu eallit ollu jagiid,
de illudehkos son buot daidda,
muhto muitos maid ahte sevdnjes beaivvit
šaddet eatnat.
Buot mii boahtá, lea duššálašvuohta.
9Illut, nuorra olmmoš,
dan botta go leat nuorra,
leage ilus ja duhtavaš eallima iđedis!
Vádjol váimmot geainnuid
ja čuovo čalmmiidat hálidusa,
muhto muitte ahte Ipmil bidjá du vástidit
buot das maid dagat.
10Gáidat morraša váimmustat
ja gillámuša rupmašisttát!
Nuorravuohta ja iđedisroađđihan
lea fargga vássán.
