1Jápma čurot háissodahttá ja suvruda
njálggahájat vuoidasa.
Unnánaš jallavuohta váikkuha
eambbo go viissisvuohta ja gudni.
2Viisá váibmu doalvu lihkkui,
jalla jurdda lihkuhisvuhtii.
3Vaikko doavki vádjolivččii njulges geainnu, de son čájeha buohkaide iežas jallavuođa.
4Jos ráđđejeaddji moaráhuvvá dutnje,
de ale guođe iežat saji:
Mášolašvuohta hehtte stuorra meaddádusaid.
5Lean oaidnán bahás ášši beaivváža vuolde,
su meaddádusa geas lea váldi:
6Jallavuohta beassá boaššumussii,
riggát čohkkájit vuolimusas.
7Mun lean oaidnán šlávaid riidemin heasttaiguin ja oaivámuččaid johtimin juolgásiid dego šlávat.
8Dat gii goaivu rokki, gahččá ieš dasa,
gii gaiku muvrra,
gáskkáhallá gearbmašii,
9gii gággá bajás geđggiid,
sáhttá bártidit barggustis,
gii luoddu muoraid, šaddá vahágii.
10Jos ákšu lea bastteheapme
ja ávju ii leat saddjojuvvon,
de ferte atnit eambbo fámu;
olbmui lea ávkkálaš
atnit barggus viissisvuođa.
11Jos gearpmaš gáskkesta
ovdal lapmuma,
de lapmudeaddji ii oaččo dietnasa.
12Viisá sánit buktet ovdáneami,
muhto jalla njuovčča doalvu hevvui.
13Su sániid álgu lea jallodat
ja ságaid loahppa čielga mielahisvuohta.
14Doavki sárdnu eatnat sániid.
Olmmoš ii dieđe almmatge
mii boahtteáiggis dáhpáhuvvá,
ii oktage sáhte muitalit olbmui,
mii boahtá su maŋŋil.
15Jalla rahčamuš váibada su iežas,
danne go son ii dieđe geainnu gávpogii.
16Vuoi dan eatnama man gonagassan lea bártnáš
ja man oaivámuččat festejit iđida rájes!
17Lihkolaš dat eanan gos
allanálat olmmái lea gonagas
ja man oaivámuččat dollet guossemállásiid
rivttes áigái,
vuohkkasit eaige jugešvuođas.
18Láikkiid ássansajiin bielkkát gahččet.
Gos olmmoš čohkká askálas gieđaid,
de doppe rohpi golgá.
19Guossemállásat dollojuvvojit hávskodahkan,
viidni ávvudahttá eallima,
muhto ruđain buot fidnejuvvo.
20Ale garut gonagasa iežat jurdagiinge,
ale garut riggá velá iežat oađđinlanjasge.
Dasgo almmi loddi doalvu du sániid dohko,
soajáhas dieđiha maid dajat.
