Olbmo oassi
1Buot dán mun lean guorahallan, buot dán lean suokkardan: Vanhurskásat ja viisát ja buot maid sii dahket, lea Ipmila gieđas. Ii olmmoš dieđe, leago sus vuordimis ráhkisvuohta dahje vašši. Buot mii boahtá su ovdii, lea duššálašvuohta.
2Oktat vuorbi deaivida buohkaid,
vanhurskása ja ipmilmeahttuma,
buori ja bahá, buhttása ja buhtismeahttuma,
dan gii oaffaruššá ja dan gii ii oaffaruša.
Buori olbmui geavvá nugo suttolažžii,
dasa gii vuordnu seammá láhkái
go dasa gii ballá vuordnumis.
3Buot das mii dáhpáhuvvá beaivváža vuolde, lea bahá dat ahte oktahat vuorbi deaivida buohkaid. Olbmuid váimmu dievva lea bahávuohta, sin siste lea jallavuohta nu guhká go sii ellet, ja de sii čohkkejuvvojit jábmiid lusa.
4Nu guhká go olmmoš eallá, de sus lea doaivu.
Ealli beana lea buoret go jápma ledjon.
5Ealli olbmot dihtet ahte sii jápmet, muhto jábmit eai dieđe maidege. Sidjiide ii leat šat makkárge bálká, ja sin muitu lea vajálduvvan. 6Sin ráhkisvuohta, sin vašši ja sin gáđašvuohta lea vássán, iige sis leat šat goassege mihkkege osiid buot das mii dáhpáhuvvá beaivváža vuolde.
7Bora nappo láibbát iluin
ja juga viinnát arvvohis mielain –
Ipmilhan lea áigá juo
dohkkehan dan maid dagat.
8Lehkoset du biktasat álo vielgadat,
divtte oljju golgat valjis iežat oaivvi ala.
9Návddaš eallima áhkáinat gean ráhkistat,
buot duššálaš eallinbeivviidat
maid Ipmil lea addán dutnje.
Dat lea du oassi dán eallimis,
dan váivvis mainna don váivvidat iežat
beaivváža vuolde.
10Daga olles fámuin buot
maid veaját dahkat,
dasgo jábmiidáimmus,
gosa don leat mannamin,
eai leat dagut, eai ulbmilat,
ii diehtu, ii viissisvuohta.
11Velá dán mun oidnen beaivváža vuolde:
Gilvu ii leat faliid válddis
iige soahti jáluid,
ii láibi viisáid,
ii rikkisvuohta jierpmálaččaid
iige menestupmi dáiddolaččaid:
Áigi ja lihkohisvuohta deaivida
sin buohkaid.
12Olmmoš ii dieđe áiggis
nugo ii guollige mii čuohcá bahás fierbmái,
iige loddi mii čákŋá gillii.
Daid láhkái olmmošge šaddá sálašin,
go su boddu boahtá.
13Mun oidnen maiddái mo sáhttá geavvat stuorimus viissisvuhtiige beaivváža vuolde. 14De lei unna gávpogaš mas ledje unnán olbmot. Veagalaš gonagas fallehii gávpoga, birastahtii dan ja huksii stuorra birastahttinráhkkanusaid. 15Dan gávpogis ásai olmmái gii lei viissis muhto geafi. Son livččii sáhttán gádjut gávpoga viissisvuođainis, muhto ii oktage jurddašan dan geafes olbmá. 16Dalle mun dadjen:
Viissisvuohta lea buoret go givrodat,
muhto geafi viissisvuohta badjelgehččojuvvo
iige oktage guldal su sániid.
17Viisáid jaskes sárdnun lea gievrrat
go jallaid oaivámučča biškun.
18Viissisvuohta lea buoret
go soahtevearjjut.
Okta meaddádus billista ollu buori.
