Juohke áššis lea mearreáigi
1Juohke áššái lea mearreáigi,
áigi lea juohke dahkui almmi vuolde.
2Áigi lea riegádit ja áigi jápmit,
áigi lea gilvit ja áigi gaikut eatnamis,
3áigi goddit ja áigi dálkkastit,
áigi gaikkodit ja áigi hukset,
4áigi čierrut ja áigi boagustit,
áigi moraštit ja áigi dánsut,
5áigi bálkut geđggiid
ja áigi daid čohkket,
áigi fátmmastit ja áigi
orrut fátmmaskeahttá,
6áigi háhkat ja áigi massit,
áigi rádjat ja áigi bálkestit,
7áigi rahtat ja áigi goarrut oktii,
áigi orrut jávohaga ja áigi sárdnut,
8áigi ráhkistit ja áigi vašuhit,
áigi soahtái ja áigi ráfái.
9Mii ávkkiid lea rahčamušas dasa gii bargá? 10Mun lean geahčadan buot váivves barggu maid Ipmil lea addán olbmuide. 11Álggus juo son lea dahkan visot buorrin ja bidjan dan bissut gitta agálašvuhtii, muhto olmmoš ii ipmir Ipmila daguid, ii daid álggu iige loahpa. 12Mun ipmirdin ahte olbmos ii leat eará lihkku go leat ilus ja návddašit eallima buriid. 13Juo datge lea Ipmila attáldat ahte olmmoš oažžu borrat ja juhkat ja leat ilus buot rahčamušaidis gaskkas.
14Mun dieđán ahte buot maid Ipmil dahká,
bissu agálaš áigái.
Dasa ii leat lasiheamoš
iige das leat geahpedeamoš.
Ipmil lea dahkan dan nu,
vai olbmot ballet sus.
15Mii lea dál, dat lea leamaš ovdalge,
ja mii šaddá, datge lea leamaš juo ovdal.
Ipmil buktá oidnosii dan mii lea jávkan.
Buot manná ovtta sadjái
16De mun oidnen vel beaivváža vuolde
vuoigatvuođa saji ja das vearrivuođa,
dubmensaji ja dasge vearrivuođa.
17Mun jurddašin: Ipmil dubme riekta, sihke vuoigatlaš olbmo ja vuoigatmeahttun olbmo, danin go juohke áššis ja dagus lea iežas áigi.
18Ja mun dadjen váimmustan: Nu dáhpáhuvvá olbmuid geažil. Ipmil geahččala sin, vai sii ipmirdit ahte sii leat elliid láhkásaččat. 19Olbmuid vuorbi ja elliid vuorbi lea ovttalágáš: Nugo olbmot jápmet, nu jápmet eallitge, ovttalágáš vuoigŋa lea dain buohkain. Olbmuin ii leat mihkkege buoretvuođaid elliid ektui. Buot lea duššálašvuohta.
20Buot manná ovtta sadjái:
Buot lea šaddan muolddas
ja buot šaddá fas muoldan.
21Gii diehtá, badjánago olbmo vuoigŋa bajás ja vuodjugo elliid vuoigŋa vuolás, eatnama guvlui?
22Mun ipmirdin ahte olbmui ii leat mihkkege buoret go illudit daguidis dihte, dat lea su oassi. Gii divttášii su máhccat geahččat dan mii dáhpáhuvvá su maŋŋil?
