1Mun dadjen váimmustan: Munba geahččalan ilu, návddašan eallima buorrevuođa! Muhto datnai lei duššálašvuohta.
2Boagusteami hárrái mun dadjen:
Dovkodat!
ja ilu hárrái: Maid dat ávkkuha?
3De mun mearridin guossohit iežan viinniin, muhto diktit viissisvuođa goit ráđđet iežan váimmu. Mun dáhtton geahččalit jallavuođa vai beasan oaidnit mii olbmuide lea buoremus dahkat vátna eallinbeivviideaset áigge almmi vuolde.
4Mun álggahin stuorra bargguid: Mun huksejin alccesan viesuid ja gilven viidnegárddiid 5gilvvagárddiid ja hearvagárddiid main šadde buotlágán šattosmuorat, 6ja ráhkadin čáhceládduid vai beasan láktadit vuovddážiid muoraid. 7Mun osten šlávaid ja šlávvanissoniid, ja šlávat riegádedje maiddái mu viesus. Mun ožžon stuorraomiid ja smávvaomiid eambbo go oktage eará gii lei ráđđen ovdal mu Jerusalemis. 8Mun čohkkejin alccesan silbbaid ja golliid, gonagasaid riggodagaid ja provinssaid mávssolaš dávviriid. Mun háhken lávluid ja lávlunissoniid ja olbmá hávskodagaid: Nissoniid ja vel eambbo nissoniid. 9Mun šadden fámolažžan, fámoleabbon go oktage ovdal mu Jerusalemis. Muhto viissisvuođa mun bisuhin. 10Mun in gieldán iežan čalmmiin maidege masa dat anistuvve, inge mun biehttalan váimmustan maidege iluid. Mun illudin buot bargguinan, ja dat lei bálká rahčamušain. 11Muhto go mun geahčadin buot daguid maid mu gieđat ledje dahkan, ja buot váivvi man dihte ledjen rahčan, de mun ipmirdin: Buot lei duššálašvuohta ja biekka váinnuheapmi. Ii mihkkege leat maninge ávkin beaivváža vuolde.
12De mun guorahallagohten viisodaga, jierpmehisvuođa ja jallodaga – maid eará máhttá dahkat dat gii boahtá gonagasa maŋŋil, go dan mii juo ovdal lea dahkkojuvvon? 13Mun gávnnahin ahte viisodat lea jallodaga buoret, nugo čuovgage lea seavdnjadasa buoret, danin go
14viisás leat čalmmit oaivvis,
jalla vádjola seavdnjadasas.
Muhto mun dovddiidin maiddái ahte goappašagaid deaivida seammá vuorbi. 15Mun dadjen váimmustan: Nugo jallii geavvá, nu geavvá munnjege. Manne mun dasto lean leamaš nu earenoamáš viissis? Ja mun dadjen alccesan: Datge lea duššálašvuohta. 16Dasgo viisás ii báze agálaš muitu dađe eambbo go jallasge, dasgo boahtti beivviid buot lea áigá juo vajálduvvan, ja viissis jápmá nugo jallage.
17Ja mun vašuhin eallima, dasgo dat mii dáhpáhuvvá beaivváža vuolde, orui mu mielas leamen bahá, duššálašvuohta ja biekka váinnuheapmi.
18Mun vašuhin buot rahčamušaidan maiguin ledjen váivvidan iežan beaivváža vuolde, danin go mun ferten guođđit daid bohtosiid dasa gii boahtá mu maŋŋil. 19Gii diehtá leago son viissis vai jalla? Ja almmatge son ráđđe buot dan mainna mun lean váivvidan iežan ja maid lean dahkan viissisvuođain beaivváža vuolde. Datge lea duššálašvuohta.
20Ja mun dohppehallen dorvvuhisvuhtii buot rahčamuša dihte mainna ledjen váivvidan iežan beaivváža vuolde. 21Dasgo maiddái dakkár olmmoš gii lea rahčan viissisvuođain, dieđuin ja čehppodagain, ferte guođđit visot dakkárii gii ii leat váivvidan iežas dainna. Datge lea duššálašvuohta ja stuorra bahá.
22Maid oažžu olmmoš buot rahčamušastis ja buot váimmus huovideames mainna son lea váivvidan iežas beaivváža vuolde?
23Almma buot su beaivvit leat dušše bávččas,
juohke dahku lea giksi.
Ii velá ihkkuge su váimmus leat máššu.
Datge lea duššálašvuohta.
24Ii leat olbmui eará buorre go borrat ja juhkat ja gávdnat ilu buot rahčamušain. Mun lean ipmirdan ahte maiddái dat lea Ipmila attáldat. 25Dasgo gii borrá ja gii illuda muđui go dat lea Ipmila attáldat? 26Son addá viissisvuođa, dieđu ja ilu dan olbmui guhte lea su miela mielde, muhto suttolažžii son addá bargun čohkket ja čoaggit, ja maŋŋil son guođđá buot dasa gii lea su miela mielde. Datge lea duššálašvuohta ja biekka doarrideapmi.
