1Sárdnideaddji, Davida bártni ja Jerusalema gonagasa, sánit.
Buot lea duššálašvuohta
2Duššálašvuođaid duššálašvuohta,
dadjá Sárdnideaddji,
duššálašvuođaid duššálašvuohta,
buot lea duššálašvuohta!
3Mii ávkkiid olbmui lea buot su rahčamušas
beaivváža vuolde?
4Buolva manná ja buolva boahtá,
muhto eanan bissu agálaččat.
5Beaivváš badjána ja beaivváš luoitáda,
de dat gáhččá sadjásis
gos dat fas badjána.
6Biegga bossu lulás ja jorrá davás,
dat jorrá ahte jorrá,
ja jorramiiddásis dat ain máhccá.
7Buot jogat golget merrii,
muhto mearra ii dieva,
ja dan báikái gosa jogat leat golgan,
dasa dat ain golget.
8Buot áššit johtet iežaset váibadeaddji jođu,
olbmo sánit eai máhte cealkit buot.
Čalbmi ii gallán oaidnimis
iige beallji dieva gullamis.
9Mii lea leamaš, dat lea ain,
mii lea dáhpáhuvvan, dat dáhpáhuvvá fas;
ii leat mihkkege ođđasiid beaivváža vuolde.
10Jos lea mihkkege man birra daddjojuvvo:
“Geahča, dát lea ođas”,
de dattetge dat lea leamaš ovdalaš áiggiid,
guhká ovdal min.
11Ii oktage muitte dološ dáhpáhusaid,
ja boahtti buolvvat vajálduhttet dange
mii vel dáhpáhuvvá.
Sárdnideaddji ohcá eallima ulbmila
12Mun, Sárdnideaddji, ledjen Israela gonagas Jerusalemis. 13Mun mearridin guorahallat ja diđoštit viissisvuođain buot mii dáhpáhuvvá almmi vuolde. Dán lossa barggu Ipmil lea addán olbmo giksin. 14Mun gehččen buot mii dáhpáhuvvá beaivváža vuolde: Buot lea duššálašvuohta ja biekka váinnuheapmi.
15Moalkkas ii sáhte šaddat njuolgadin,
dat mii váilu, ii sáhte lohkkojuvvot.
16Mun jurddašin: Mun lean joksan ain eambbo viisodaga, eambbo go oktage gii lea ráđđen Jerusalemis ovdal mu, ja lean vurken váibmosan ollu viisodaga ja dieđu. 17Ja mun mearridin ipmirdit mii lea viisodat ja diehtu, mii lea jallodat ja jierpmehisvuohta, muhto mun lean ipmirdan ahte datge lei biekka váinnuheapmi.
18Gos lea ollu viisodat, das lea ollu váivi,
ja gii lasiha dieđu, dat lasiha bákčasa.
