Sátneláskkut 31

₁Lemuela, Massa gonagasa, sánit,

maid su eadni oahpahii sutnje.

₂Bártnážan,

don gean mun riegádahtten,

mu lohpádusaid bárdni:

₃Ale golat iežat fámu nissoniidda,

ale juogat dan daidda

geat leat gonagasaid heavvu.

₄Ii heive gonagasaide, Lemuel,

ii heive gonagasaide juhkat viinni

iige ráđđejeddjiide leat váibmil

garra juhkamušaide.

₅Go sii juhket,

de sii vajáldahttet lága

ja botnjet vártnuhis olbmuid

vuoigatvuođa.

₆Garra juhkamuš heive dasa

gii lea duššamin,

viidni dasa gean váimmus

lea bahča moraš,

₇vai son jugadettiin

vajáldahttá váivvášvuođas

iige šat muitte iežas váivviid.

₈Bajit jiena gielaheami beales,

bealuš buohkaid geat leat jorraleamen.

₉Bajit jiena ja dubme vuoigatlaččat,

bealuš gefiid ja váivvášiid.

₁₀Hágas áhkká – gii gávdná su?

Son lea sakka mávssoleabbo

go bearralat.

₁₁Su boadnjá luohttá sutnje ollásit,

son doallá váni guhkkin.

₁₂Son dahká boadnjásis buriid,

ii goassege baháid, nu guhká go eallá.

₁₃Son háhká ulluid ja beallemasaid,

su gieđat barget viššalit.

₁₄Son lea gávpeolbmá skiippaid

láhkásaš,

guhkkin son viežžá eallámuša.

₁₅Son lihkká go ain lea idja,

son addá dáluolbmuide borramuša

ja bálvánieiddaidasas sin oasi.

₁₆Son gávdná buori bealddu

ja oastá dan,

son gilvá viidnegárddi dainna

maid lea dinen.

₁₇Son boahkánastá alimiid fámuin,

son bargagoahtá gievrras gieđaiguin.

₁₈Son muosáha fitnuidis

lihkostuvvat,

su lámpá ii čáskka ihkku.

₁₉Son joraha snáldooaivvi,

son ii luoitte snálddu gieđas.

₂₀Son geige gieđa vártnuhemiide,

son rahpá sala váivvášiidda.

₂₁Go muohta boahtá, de son ii bala,

danin go buohkain su bearrašis

leat ullobiktasat.

₂₂Gokčasiid son gođđá ieš,

su gárvun lea beallemas ja purpur.

₂₃Su boadnjá adnojuvvo árvvus

go son čohkká vuorrasiiguin

gávpotpoarttas.

₂₄Son goarru beallemasbiktasiid

ja vuovdá daid,

son bidjá boahkániid gávpeolbmái.

₂₅Fápmu ja gudni lea su gárvu,

mojunjálmmiid son geahččá boahtteáigái.

₂₆Go son sárdnu, de son sárdnu viisát,

son addá ustitlaš neavvagiid.

₂₇Son goziha buot mii dálus

dahkkojuvvo,

ii son bora láibbi láikin.

₂₈Su mánát máidnot su lihkolažžan,

su boadnjá rámida su:

₂₉“Eatnat nissonat leat čeahpit

ja viššalat,

muhto don leat sis buoremus.”

₃₀Liekkusvuohta beahttá,

čábbodat jávká,

rámiduvvon dat áhkká

gii ballá Hearrás!

₃₁Addet sutnje su barggu bálkká,

rámiduvvos son gávpotpoarttain

daguidis dihte.