Sátneláskkut 30

Ná sártnui dat olmmái:

Ipmil, mun lean váiban,

Ipmil, mun lean vuoimmehuvvan.

₂Mun lean dego jierpmehis ealli,

mus ii leat olbmo ipmárdus.

₃Mun in leat oahppan viissisvuođa,

mun in leat beassan dovdat Basi.

₄Gii manai albmái ja

máhcai doppe?

Gii čohkkii biekka čorpmaidasas?

Gii giesai čázi iežas biktasa sisa?

Gii mearridii eatnama rájáid?

Mii lea su namma,

mii su bártni namma –

almma don dan dieđát?

₅Buot Ipmila sánit leat buhttásat,

son lea daid galba

geat dorvvastit sutnje.

₆Ale lasit maidege su sániide,

amas sivahit du gielástallin.

₇Guokte ášši mun bivddán dus,

ale biehttal daid mus

nu guhká go mun ealán:

₈Doala behtolašvuođa ja giellása

guhkkin mus eret,

ale atte munnje geafivuođa

alege riggodaga.

Atte munnje dan biepmu

mii lea mu oassi,

₉aman gallánit nu ahte biehttalan du

ja dajan: “Gii lea Hearrá?”

dahje gefot nu ahte suoládan

ja heahppášuhtán Ipmilan nama.

₁₀Ale guoddal šláva su isidii,

muđui son garuha du,

ja don ráŋggáštuvvot.

₁₁Muhtun olbmot garuhit áhčiset

eaige buressivdnit eatniset.

₁₂Muhtun olbmot leat buhttásat

iežaset čalmmiin,

vaikko eai leat bassojuvvon

buhtisin duolvvaineaset.

₁₃Muhtun olbmuin leat gorges čalmmit

ja čeavlás geahčastagat.

₁₄Muhtun olbmuin leat miehkit bátnin

ja niibbit oalulin,

vai sii besset borrat vártnuhemiid

eatnamis,

váivvášiid olbmuid logus.

₁₅Varranjammis leat guokte nieidda:

Atte! ja Atte!

Golmmas leat mat eai gallán,

njealjis eai daja goassege:

“De lea doarvái”:

₁₆Jábmiidáibmu,

dahppojuvvon eatniheagga,

eanan mii ii gallán čáziin,

ja dolla mii ii goassege cealkke:

“De lea doarvái.”

₁₇Dat gii geahččá bilkidemiin áhččásis

iige leat gulolaš eadnásis,

das gorssa gáranasat čuggot čalmmiid

ja goaskinčivggat borret daid.

₁₈Golbma leat maid mun in ipmir,

njeallje mat leat munnje

menddo ovddolaččat:

₁₉Goaskima geaidnu almmis,

gearbmaša geaidnu bávtti alde,

skiippa geaidnu gasku ábi

ja olbmá geaidnu nuorra nissona lusa.

₂₀Ná dahká fuorránisson:

Son borada, sihkku njálmmi ja dadjá:

“In mun leat dahkan maidege baháid.”

₂₁Golbma leat mat doarggistahttet

eatnama,

njeallje maid vuolde eanan ii gierdda:

₂₂Šlávva gii šaddá gonagassan,

doavki gii borada gallás,

₂₃hilgojuvvon nisson gii oažžu boatnjá

ja šlávvanisson gii beassá eamidis sadjái.

₂₄Njealjis leat smávvát

eatnama alde,

dattetge viisábut go viisát:

₂₅Gotka ii leat gievra,

almmatge dat čoaggá biepmus geasset.

₂₆Báktemievri ii leat fámolaš,

dattetge dat dahká bieju báktái.

₂₇Rásselohkuin ii leat gonagas,

muhto dat johttájit dohkiid dohkiid.

₂₈Steaččalaggá sáhttá dohppet gieđain,

dattetge dan gávdná gonagasa šloahtas.

₂₉Golmmas lihkadit goargadit,

njealljásis lea gorges johtinláhki:

₃₀Ledjon, gievrramus ealli

mii ii murdil geange ovddas,

₃₁vuoncávaris mii vázzá oaivi ceaggut,

bohkká ovddemussan ealus

ja gonagas gii loaiddasta

soahteveaga ovdii.

₃₂Jos don leat meannudan

jierpmeheamit ja alidan iežat –

jurdilkeahttá dahje dáhtul –

de bija gieđa njálmmi ovdii.

₃₃Jos girtnut lávcca, de šaddá vuodja,

jos bonjat njuni, de boahtá varra,

jos háhttet olbmo, de buollá bealku.