Sátneláskkut 29

₁Olmmái gii lea dávjá ráŋgojuvvon

ja almmatge buoššuda váimmus,

doddjojuvvo fáhkkestaga,

iige leat veahkki.

₂Go vanhurskásat leat ollu,

de álbmot illuda,

go ipmilmeahttun ráđđe,

de olbmot šuhkket.

₃Dat gii ráhkista viissisvuođa,

illudahttá áhčis,

opmodagas skihtarda dat

gii fitná fuoráid luhtte.

₄Vuoigatvuođain

gonagas nanosmahttá eatnamis,

dat gii lasiha vearuid, goarida dan.

₅ Gii dohkkestuvvá nubbái,

lea lebbemin fierpmi su bálgái.

₆Bahás olmmoš sorro iežas suddui,

vuoigatlaš oažžu ávvudit ja illudit.

₇Vanhurskkis atná fuola

váivváša vuoigatvuođas,

ipmilmeahttun ii das beroš.

₈Bilkárat háhttejit oppa gávpoga,

viisát jaskkodahttet moari.

₉Go viisás lea ášši jallain,

de jalla rieibmuda ja boagusta,

iige orrunmáššu šatta.

₁₀Varraváibmilis olbmot vašuhit

láitemeahttuma,

muhto vuoigatlaččat gáhttejit su heakka.

₁₁Doavki luoitá olggos buot iežas moari,

muhto viissis olmmoš steađđá.

₁₂Jos ráđđejeaddji guldala giellásiid,

de son oažžu bálván dušše skealmmaid.

₁₃Váivváš ja givssideaddji

gávnnadeaba;

Hearrá addá čuovgga

goappašagaid čalmmiide.

₁₄Go gonagas dubme gefiid

vuoigatlaččat,

de su truvdnu bissu nanusin.

₁₅Rissi ja bagadus addet viissisvuođa,

huvddahis bárdni

heahppášuhttá eatnis.

₁₆Go ipmilmeahttumat eatnánit,

de suddu lassána,

muhto vanhurskásat besset oaidnit

sin gahččat.

₁₇Bagat bártnát,

de son áhpásmahttá du,

son addá ilu du váibmui.

₁₈Go eai leat profehtat,

de álbmot čádjida,

ávdugas dat gii doallá lága.

₁₉Ii bálvaleaddji leat bagadeames

sániiguin;

son gal ipmirda, muhto ii jeagat.

₂₀Leatgo oaidnán duoldalas olbmo?

Eambbo doaivu lea doavkái go sutnje.

₂₁Jos bálvá jiellahallojuvvo

nuorravuođa rájes,

de loahpas son šaddá nággárin.

₂₂Hohpposlunddot olmmoš

dagaha riiddu,

moarrás olmmái rihkku ollu.

₂₃Čeavláivuohta vuolida olbmo,

vuollegis olmmoš oažžu gudni.

₂₄Gii veahkeha suollaga,

vašuha heakkas,

son gal gullá garuhusa,

muhto orru jávohaga.

₂₅Dat gii ballá olbmuin,

bidjá alccesis giela,

muhto dat gii dorvvasta Hearrái,

lea oadjebas.

₂₆Eatnagat vigget

beassat ráđđejeaddji muođuid ovdii,

muhto olbmo vuoigatvuohta

boahtá Hearrás.

₂₇Vanhurskásat fasttášit vearredahkki,

ipmilmeahttumat fasttášit vuoiggalačča.