Efesos 2

₁Dii leiddet jápmán din rihkkumiid ja suttuid dihte ₂dalle go dii eliidet dán áiggi mielde ja máilmmi vuogi mielde ja jeagadeiddet áimmu fámuid ráđđejeaddji, dan vuoiŋŋa mii dál duddjo jeagohis olbmuid siste. ₃Sin searvvis mii buohkat eliimet ja ollašuhtiimet iežamet luonddu anistumiid nugo min rumaš ja jurdagat dáhtto, ja nu mii leimmet luonddusteamet moari mánát, nugo earátge.

₄Ipmila váibmoláđisvuohta lea goittotge nu valljugas ja son ráhkistii min nu stuorra ráhkisvuođain ahte son ₅dagai min geat leimmet jápmán rihkkumiiddámet dihte, eallin oktanaga Kristusiin. Árpmus dii lehpet bestojuvvon. ₆Ipmil čuoččáldahtii min oktan Kristusiin ja attii midjiidenai saji almmis, ₇vai beassá čájehit boahtti áiggiide man valljugas lea su árbmu ja man stuoris su buorrevuohta, go son attii midjiide Kristus Jesusa. ₈Dasgo árpmus dii lehpet bestojuvvon oskku bokte. Dat ii leat din dahku, muhto Ipmila attáldat. ₉Dat ii leat olbmo daguid veagas, amas oktage iežas rámidit. ₁₀Mii maid leat Ipmila dahku, sivdniduvvon Kristus Jesusis dahkat buriid daguid maid Ipmil álggu rájes lea gárvvistan midjiide, vai mii vádjolivččiimet daid siste.

₁₁Muitet dan dihte ahte dii leiddet báhkinat riegádeamis, ja din gohčodit birračuohpakeahttájin sii geat gohčoduvvojit birračuhppojuvvon olmmožin dan birračuohpahusa dihte mii dahkkojuvvo rupmašii olbmo gieđain. ₁₂Muitet ahte dii dalle eliidet almmá Kristusa haga, Israela álbmoga olggobealde, iige dis lean oassi lihtuide iige daid lohpádusaide, ja dii leiddet máilmmis almmá doaivvu ja Ipmila haga. ₁₃Muhto dál, Kristus Jesusis, lehpet dii geat ovdal leiddet sus guhkkin, boahtán lahka Kristusa vara bokte.

₁₄Kristus lea min ráfi. Son dagai oktan goappašagaid, báhkiniid ja juvddálaččaid, ja njeiddii jápmimiinnis vašálašvuođa muvrra mii earuhii sin. ₁₅Son lea heaittihan lága oktan báhkkomiiguin ja njuolggadusaiguin, vai son ieš dagašii iežas siste dan guoktása oktan ođđa olmmožin, ja nu son duddjo ráfi. ₁₆Ovtta rupmašis son soabahii goappašagaid Ipmiliin go son jámii ruossas, ja nu gottii vašálašvuođa. ₁₇Son bođii gulahit ráfi didjiide geat leiddet guhkkin, ja ráfi sidjiide geat ledje lahka. ₁₈Su bokte sáhttit sihke mii ja dii beassat Áhči lusa ovtta Vuoiŋŋas. ₁₉Dii nappo ehpet leat šat apmasat ehpetge vierrásat, muhto gullabehtet Ipmila bearrašii, seammá álbmogii go bassi olbmot. ₂₀Dii lehpet huksejuvvon apostaliid ja profehtaid vuođu ala, man čiehkageađgi lea Kristus Jesus ieš. ₂₁Sus oppa viessu ovttastuvvá ja šaddá bassi tempelin Hearrás, ₂₂ja su siste maiddái dii huksejuvvobehtet Ipmila vuoiŋŋalaš viessun.