Efesos 3

₁Dan dihte mun, Paulus, gii lean Kristus Jesusa fáŋgan din báhkiniid dihte, sojaldahtán čippiidan. ₂Almma lehpet gullan dan Ipmila áigumuša maid son árpmustis lea almmuhan munnje, ávkin didjiide. ₃Munnje lea almmustusas addojuvvon diehttevassii dát čiegusvuohta, nugo ovdalis juo lean oanehaččat čállán. ₄Go dii lohkabehtet dán, de fuomášehpet man bures mun dovddan Kristusa čiegusvuođa. ₅Dat ii dieđihuvvon olbmuide ovddit buolvvaid áigge, muhto dál Vuoigŋa lea almmuhan Kristusa bassi apostaliidda ja profehtaide ₆ahte maiddái báhkinat leat Jesus Kristusis ožžon oasi seamma árbbis ja leat seamma rupmaša lahtut ja leat oasálaččat lohpádussii evangeliuma bokte. ₇Dán evangeliuma bálvaleaddjin mun lean šaddan dan árpmuattáldaga vuođul maid Ipmil veagalaš fámuinis lea addán munnje.

₈Munnje gii lean heajumus Ipmila bassi olbmuin, lea addojuvvon dat árbmu ahte oaččun sárdnidit báhkiniidda evangeliuma Kristusa suokkardallameahttun riggodaga birra ₉ja almmuhit buohkaide dan bassi áigumuša maid Ipmil guhte sivdnidii buot, lea agálaš áiggiid rájes atnán čiegusvuohtanis. ₁₀Dál Ipmila máŋggalágan viisodat almmustuvvá girku bokte almmiid oaivámuččaide ja fámuide ₁₁Ipmila agálaš áigumuša mielde, maid son ollašuhtii Kristus Jesusis, Hearrásteamet. ₁₂Su siste ja oskkus sutnje mii sáhttit roahkkadit ja luohttevaččat boahtit Ipmila lusa. ₁₃Dan dihte mun ávžžuhan din: Allet hearddohuva daid áŧestusaid geažil maid mun gillán din dihte. Mu gillámuš lea didjiide gudnin.

₁₄Dan dihte mun luoitádan čippiid ala Áhči ovddas, ₁₅su gean mielde buot mii gohčoduvvo áhččin almmis ja eatnama alde lea ožžon nama. ₁₆Vare son iežas valljugas hearvásvuođa rikkisvuođas attášii din siskkáldas olbmui fámu ja givrodaga iežas Vuoiŋŋas, ₁₇vai Kristus ásašii din váimmus oskku bokte. Vare ráhkisvuohta livččii din vuođđu ja ruohtas, ₁₈ja vare dii ja buot bassi olbmot áddešeiddet Kristusa ráhkisvuođa govdodaga ja guhkkodaga, allodaga ja čikŋodaga, ₁₉ja oahpašeiddet dovdat Kristusa ráhkisvuođa, mii manná buot dieđu badjel. Dalle oppa Ipmila dievasvuohta deavdá din. ₂₀Son guhte fámuinis duddjo min siste, sáhttá dahkat sakka eambbo go maid mii sáhttit rohkadallat ja áddet, ₂₁sutnje lehkos gudni girkus ja Kristus Jesusis buot buolvvaid čađa, álo ja agálašvuhtii. Amen.