Efesos 4

₁Mun gii lean fáŋgan Hearrá dihte, ávžžun nappo din vádjolit dohkálažžan dan rávkojupmái mainna lehpet rávkojuvvon. ₂Lehket álo ustitlaččat, vuollegaččat ja guhkesmielalaččat, nu ahte gierdabehtet guhtet guimmiideattet ráhkisvuođas. ₃Áŋgiruššet várjalit Vuoiŋŋa oktavuođa dainna ráfiin mii čatná din oktii: ₄okta rumaš ja okta Vuoigŋa, nugo dii oktii rávkojuvvuidet ovtta doivui. ₅Lea okta Hearrá, okta osku, okta gásta, ₆okta Ipmil ja buohkaid Áhčči, son guhte lea badjel buot, duddjo buohkaid bokte ja lea buohkain.

₇Iešguhtiige mis lea addojuvvon dat árbmu nu mo Kristus lea mihtidan guhtiige. ₈Dan dihte celkojuvvo: Son manai bajás allagassii ja válddii fáŋggaid, son attii olbmuide attáldagaid. ₉Go son manai bajás, iigo dat mearkkaš ahte son vuos njiejai eatnama vuolimus báikkiide? ₁₀Son guhte njiejai vulos, manai maiddái buot almmiid bajábeallái, vai son deavddášii buot. ₁₁Son bijai muhtumiid apostalin, muhtumiid profehtan, muhtumiid evangelistan, muhtumiid báimmanin ja oahpaheaddjin, ₁₂vai sii ráhkkanahttet bassi olbmuid bálvalussii ja dainna lágiin huksejit Kristusa rupmaša. ₁₃Go mii buohkat dasto ollet oskku oktavuhtii ja dovdat Ipmila Bártni, de mii leat ollesolbmot, Kristusa dievasvuođa olles agis, ₁₄ja dalle mii eat leat šat mánát eatge juohkelágan oahpaid biekkaid dolvvodeames eatge gávvilis olbmuid fillemis ja čádjidahttimis. ₁₅Dalle mii baicce vádjolit duohtavuođas ja ráhkisvuođas ja juohke dáfus šaddat oktan Kristusiin guhte lea oaivi. ₁₆Son ovttastahttá oppa rupmaša, mii dollojuvvo čoahkis buot suonaiguin, ja juohke lahttu dahká dan doaimma mii dasa lea mearriduvvon, ja nu rumaš stuorru ja ráhkaduvvo ráhkisvuođas.

₁₇Mun ávžžun din duođas Hearrá nammii: Allet šat eale báhkiniid láhkái! Sin jurdagat leat duššálaččat, ₁₈sin jierbmi sevnnjodan, ja dat eallin maid Ipmil addá, lea sidjiide amas, danne go sii eai dovdda su ja sin váibmu lea buššon. ₁₉Sii leat šaddan heaboheapmin, sii leat válljen furrošit ja leat buhtismeahttumat ja hátnásat. ₂₀Muhto dán láhkái dii ehpet leat oahppan dovdat Kristusa, ₂₁jos dii muđui lehpet gullan su birra, jos didjiide lea oahpahuvvon dat duohtavuohta mii Jesusis lea. ₂₂Dii ehpet šat oaččo eallit nugo ovdal, muhto galgabehtet nuollat iežadet boares olbmo mii behtolaš anistumiidis dihte duššá. ₂₃Dii galgabehtet ođasmuvvat vuoiŋŋa ja miela dáfus ₂₄ja gárvodit ođđa olbmo mii lea sivdniduvvon Ipmila gova láhkásažžan, ja eallit vuoigatlaš ja duohta eallima bassivuođas.

₂₅Dan dihte hilgot giellása ja sárdnot duođa guhtet guoibmáseattet, miihan leat guhtet guimmiideamet lahtut. ₂₆Jos moaráhuvvabehtet, de allet suddut. Allet divtte beaivváža luoitádit din moari badjel. ₂₇Allet atte saji beargalahkii. ₂₈Suola ii oaččo šat suoládit, muhto galgá bargat ja dahkat juoga buriid gieđaidisguin, vai sus lea maid addit daidda geat leat dárbašis. ₂₉Allet divtte guohca ságaid boahtit njálmmisteattet, muhto sárdnot dakkára mii lea ávkkálaš, mii duddjo buori ja lea dárbbašlaš, vai dat lea buressivdnádussan daidda geat gullet. ₃₀Allet moraštahte Ipmila Bassi Vuoiŋŋa gean dii lehpet ožžon seailan lonástusa beaivvi várás. ₃₁Hilgot buotlágan bahčavuođa, suhtu, vaši, riidaleami ja bilkideami, buot bahávuođa. ₃₂Lehket baicce gaskaneattet ustitlaččat ja váibmoláđđásat ja addet ándagassii guhtet guimmiidasadet, nugo Ipmil lea addán didjiide ándagassii Kristusa dihte.