Efesos 6

₁Mánát, lehket gulolaččat vánhemiidda Hearrá dihte, danin go dat lea vuoigat. ₂Gudnejahte áhčát ja eatnát lea vuosttaš báhkkon masa gullá lohpádus: ₃vai dutnje geavvá bures ja oaččut eallit guhká eatnama alde. ₄Áhčit, allet háhtte mánáideattet moarrái, muhto bajásgesset ja rávvejehket sin Hearrá dáhtu mielde.

₅Šlávat, jeagadehket din eatnanlaš isidiid baluin ja doarggistemiin ja duohta váimmuin, nugo jeagadehpet Kristusa. ₆Allet guoktiluššamiin vikka dohkket olbmuide, muhto ollašuhttet oppa váimmus Kristusa bálvaleaddjin Ipmila dáhtu. ₇Doaimmahehket bargguideattet áŋgirit dego bálvalivččiidet Hearrá ehpetge olbmuid. ₈Muitet ahte juohkehaš gii dahká buriid, oažžu das bálkká Hearrás, leažžá dal friddja dahje šlávva. ₉Dii isidat, meannudehket seammá láhkái šlávaideattetguin ja heitet áitimis. Diihan diehtibehtet ahte dis ja sis lea almmis seammá Hearrá, ja son ii geahča olbmo hápmái.

₁₀Loahpas: Šaddet gievran Hearrás ja su veagalaš fámus! ₁₁Gárvodehket Ipmila vearjjuid, vai nagadehpet bihtit beargalaga gávvilis juonain. ₁₂Dasgo mii eat soađa oačči ja vara vuostá, muhto oaivámuččaid ja válddiid vuostá, dán seavdnjadasa máilmmi hearráid vuostá ja gomuvuođa bahávuođa vuoigŋaveagaid vuostá. ₁₃Gárvodehket dan dihte Ipmila vearjjuid, vai bahás beaivvi veadjibehtet vuostehágostit ja bissut čuoččat, go lehpet ollašuhttán buot. ₁₄De bissot nanusin, boahkánastet iežadet duohtavuođain ja gárvodehket vanhurskkisvuođa ruovdegárvvu ₁₅ja gámahehket julggiid geargatvuođain sárdnidit ráfi evangeliuma. ₁₆Dollet álo oskku galbba mainna nagodehpet čáskadit bahágasa buolli njuolaid. ₁₇Váldet maiddái bestojumi oaivesuoji ja Vuoiŋŋa miehki, mii lea Ipmila sátni.

₁₈Dahket dan rohkadallamiin ja átnumiin. Rohkadallet álelassii Vuoiŋŋas. Gohcet ja bissot nanusin go rohkadallabehtet buot bassi olbmuid ovddas. ₁₉Rohkadallet maiddái mu ovddas, vai munnje addojuvvojit rievttes sánit gulahit roahkkadit evangeliuma čiegusvuođa ₂₀man áirras mun lean, dál giddagasas. Rohkadallet ahte mun oččošin roahkkatvuođa sárdnut nugo galggan.

₂₁Vai diige dieđášeiddet makkár dilis mun lean ja mo mus manná, de Tykikos muitala didjiide buot. Son lea min ráhkis viellja ja oskkáldas bálvaleaddji Hearrás. ₂₂Mun vuolggahan su din lusa muitalit iežamet dili ja arvvosmahttit din.

₂₃Ráfi ja oskku ráhkisvuohta lehkos didjiide, vieljat, Ipmil Áhčis ja Hearrá Jesus Kristusis. ₂₄Árbmu lehkos buohkaiguin geat ráhkistit min Hearrá Jesus Kristusa su nohkameahttunvuođas.