Ester 4

₁Go Mordekai gulai mii lei dáhpáhuvvan, de son gaikkodii biktasiiddis, gárvodii horstta ja botkkuhii gunaid vuovttaidasas, vulggii vázzit miehtá gávpoga ja bajidii stuorra ja bahča bárguma. ₂Son bisánii gonagasa poartta šilljui, dasgo ii oktage gii lei gárvodan morašbiktasiid, beassan sisa gonagasa šlohttii. ₃Juohke provinssas gosa gonagasa sátni ja gohččun bođii, juvddálaččat šadde stuorra morrašii. Sii fástudedje, čirro ja luibme, ja eatnagat ođđe seahkaid ja gunaid alde. ₄Go bálvánissonat ja hoavvaolbmát muitaledje dán dronnegii, de son dohppehalai ballui. Son vuolggahii biktasiid vai Mordekai gárvodivččii daid horstta sadjái, muhto son ii váldán daid vuostá. ₅Dalle Ester rávkkai lusas Hataka, hoavvaolbmá gean gonagas lei bidjan su bálvaleaddjin, ja gohčui su mannat Mordekaja lusa gullat mii lei dáhpáhuvvan ja maid son oaivvildii. ₆Hatak vulggii ja deaivvai Mordekaja gávpoga márkanšiljus gonagasa poartta ovddas. ₇Mordekai muitalii buot mii lei dáhpáhuvvan, ja man ollu silbba Haman lei lohpidan addit gonagasa dávvirgámmárii, jos son beassá duššadit juvddálaččaid. ₈Mordekai attii Hatakii geardduhusa dan reivves mii lei čállojuvvon Susas ja mas lei mearrádus duššadit juvddálaččaid, vai son čájeha dan Esterii ja muitala sutnje buot. De Mordekai bivddii Hataka ávžžuhit dronnega mannat gonagasa lusa átnut árpmu iežas álbmogii.

₉Hatak máhcai muitalit Esterii maid Mordekai lei dadjan. ₁₀Dalle Ester gohčui Hataka mannat Mordekaja lusa ja dadjat: ₁₁“Buot gonagasa virgeolbmát ja provinssaid álbmogat dihtet ahte jos guhtege, olmmái dahje nisson, manná gonagasa siskkit šloahttašilljui bovdekeahttá, dalle lágas lea sutnje dušše okta ráŋggáštus: jápmin. Dušše jos gonagas geige golleráđđensoappis su guvlui, de son birgeha heakkas. Muhto dál mun in leat bovdejuvvon gonagasa lusa golmmalogi beaivái.”

₁₂Go Mordekai gulai maid Ester lei dadjan, ₁₃de son gohčui vástidit sutnje ná: “Ale gátte ahte don leat áidna juvddálaš gii beasat eallit, danne go don ásat gonagasa šloahtas. ₁₄Jos don dán áiggi orut jávohaga, de juvddálaččaide gal boahtá veahkki ja gáddjojupmi eará sajis, muhto don oktan áhčát sogain duššat. Ja gii diehtá, jos don leat beassan dronnegin aiddo dákkár áiggiid várás.”

₁₅Dalle Ester gohčui vástidit Mordekajii: ₁₆“Rávkka čoahkkái buot Susa juvddálaččaid fástudit mu dihte. Allet bora alletge juga golmma beaivái ja golmma idjii. Maiddái mun ja mu bálvánissonat fástudit seammá láhkái. De mun vuolggán gonagasa lusa, vaikko dat leage lága vuostá. Jos mun ferten jápmit, de mun jámán.” ₁₇Mordekai vulggii ja dagai aiddo nugo Ester lei gohččon.