Ester 5

₁Goalmmát beaivvi Ester gárvodii gonagaslaš gárvvuidis ja loaiddastii siskkit šloahttašilljui, aiddo gonagasa truvdnosále buohta. Gonagas lei čohkkámin truvnnustis sále váldouksii čalmmiid. ₂Go son oinnii dronnet Estera čuožžumin šiljus, de sus njuorai váibmu, ja son čujuhii Estera golleráđđensoppiin mii sus lei gieđas. Ester loaiddastii gonagasa ovdii ja guoskkahii soabbegeaži. ₃Gonagas jearai sus: “Maid don siđat, dronnet Ester? Mii lea du átnumuš? Vaikko bivddášit beali mu riikkas, de don oaččut dan.” ₄Ester vástidii: “Jos dat orru gonagasa mielas buorre, de bohtos gonagas ovttas Hamaniin odne guossemállásiidda maid mun lean lágidan gonagasa gudnin.” ₅Gonagas dajai: “Gáhččet viežžat Hamana, vai moai besse ollašuhttit Estera sávaldaga!”

Dasto gonagas ja Haman bođiiga guossemállásiidda maid Ester lei lágidan. ₆Go soai jugaiga viinni, de gonagas jearai Esteris: “Maid don siđat, mii lea du átnumuš? Vaikko bivddášit beali mu riikkas, de don oaččut dan.” ₇Ester vástidii: “Mu sávaldat ja átnumuš lea dát: ₈Jos dat orru gonagasa mielas buorre ja jos gonagas dáhttu deavdit mu sávaldaga ja átnumuša, de bohtoska gonagas ja Haman maiddái ihttin guossemállásiidda maid mun lágidan dudnuide. De mun dagan nugo don dáhtut, gonagas.”

₉Dan beaivvi Haman vulggii doppe ilus ja buori mielas. Muhto go son oinnii ahte Mordekai čohkkái gonagasa poarttas iige čuožžilan čájehit sutnje gudni, de son moaráskii. ₁₀Son goit doalahalai iežas ja manai ruoktot. De son rávkkai lusas ustibiiddis ja áhkás Sereša. ₁₁Son rámidii sidjiide iežas stuorra riggodaga ja bártniidis eatnatvuođa, ja dan ahte gonagas lei addán sutnje alla árvvu ja alidan su eará oaivámuččaid ja gonagasa virgeolbmáid bajábeallái. ₁₂Haman dajai vel: “Dasa lassin mun lean áidna olmmoš gean dronnet Ester divttii boahtit gonagasain guossemállásiidda maid son lei lágidan. Maiddái ihttážiige mun lean bovdejuvvon su lusa oktan gonagasain. ₁₃Muhto buot dát ii leat munnje galle, nu guhká go mun šattan oaidnit juvddálaš Mordekaja čohkkámin gonagasa poarttas.” ₁₄De su áhkká Sereš ja buot su ustibat dadje sutnje: “Divtte cegget harcamuora, vihttalogi állana alu, ja bivdde gonagasas ihttin ahte Mordekai harccastuvvo dasa. De don beasat mannat gonagasain ilolažžan guossemállásiidda.” Hamana mielas dát lei buorre ráva, ja son divttii cegget harcamuora.