2. Mosesgirji 24

₁Hearrá celkkii Mosesii: “Gorgŋot mu lusa, don ieš ja Aron, Nadab ja Abihu ja vel čiežalogis Israela vuorrasiin, ja luoitádehket eatnamii ja rohkadallet go lehpet vel guhkkin. ₂Dušše Moses beassá Hearrá lahka, earát eai oaččo lahkanit su. Allos álbmot eisege gorgŋo várrái.”

₃Moses máhcai muitalit álbmogii maid Hearrá lei sárdnon ja mearridan. Álbmot vástidii ovtta jitnii: “Mii dahkat buot maid Hearrá lea sárdnon.” ₄Moses čálii muitui buot maid Hearrá lei sárdnon. Árrat iđedis Moses huksii áltára vári vuollái ja ceggii dan lusa guoktenuppelohkái geađgebácci Israela guoktenuppelohkái čeardda mielde. ₅Son vuolggahii nuorra israellaš olbmáid oaffaruššat boaldinoaffariid ja njuovvat vuovssáid searvevuođaoaffarin Hearrái. ₆Moses válddii beali varas ja leikii lihtiide, ja nuppi beali son riškkuhii áltára ala. ₇De son válddii lihtugirjji ja logai dan álbmogii, ja álbmot dajai: “Mii dahkat buot maid Hearrá lea sárdnon, ja mii jeagadit su.” ₈Moses válddii vara ja riškkuhii dan álbmoga ala ja celkkii: “Dát lea dan lihtu varra maid Hearrá lea dahkan dinguin buot dáid gohččumiid vuođul.”

₉Moses ja Aron, Nadab ja Abihu ja čiežalogis Israela vuorrasiin gorgŋo várrái. ₁₀Sii oidne Israela Ipmila, ja dat man alde son čuoččui, lei dego safira, šearrát dego albmi ieš. ₁₁Son ii geigen gieđa Israela oaivámuččaid vuostá. Sii ožžo geahčadit Ipmila, ja sii borre ja juhke.

₁₂Hearrá celkkii Mosesii: “Goarkŋo mu lusa várrái ja vuordde dáppe, de mun attán dutnje geađgetávvaliid maidda lean čállán lága ja báhkkomiid, vai sáhtát oahpahit daid álbmogii.” ₁₃Moses vulggii bálvváinis Josuain goargŋut Ipmila várrái. ₁₄Vuorrasiidda son dajai: “Vurdet dás, dassážii go moai bohte fas din lusa. Leabahan Aron ja Hur din luhtte. Jos soapmásis lea riidoášši, de mannos sudno lusa.”

₁₅De Moses goarkŋui várrái, ja balva govččai vári. ₁₆Hearrá hearvásvuohta orui Sinaivári alde, ja balva govččai dan guhtta beaivvi. Čihččet beaivvi Hearrá čuorvvui Mosesa balvva siste. ₁₇Israellaččat oidne Hearrá hearvásvuođa várrečohka alde, ja dat lei dego duššadeaddji dolla. ₁₈Moses manai balvva sisa ja goarkŋui várrečohkkii. Son lei doppe njealljelogi beaivvi ja njealljelogi ija.