Esekiel 11

₁Vuoigŋa loktii mu ja doalvvui mu Hearrá tempela nuortapoartta lusa, dan poartta mii lea nuorttas guvlui. Poartta uksaráiggi guoras ledje guoktelogivihtta olbmá. Sin gaskkas mun oidnen Jaasanja, Assura bártni, ja Pelatja, Benaja bártni, geat gulaiga álbmoga oaivámuččaide. ₂Hearrá celkkii munnje: “Olmmoš, dát leat dat gávpoga olbmát geat hutket vearrivuođa ja addet bahás ráđiid. ₃Sii dadjet: ‘Ii leat vuos dárbu hukset viesuid. Gávpothan lea báhti ja mii leat biergu.’ ₄Dan dihte profehtastala, olmmoš, profehtastala sin vuostá!” ₅Dalle bođii mu badjelii Hearrá vuoigŋa, ja son gohčui mu dadjat: “Ná cealká Hearrá: Mun dovddan din ságaid, israellaččat, mun dieđán maid dii jurddašehpet. ₆Dii lehpet sorbmen ollugiid dán gávpogis ja deavdán gáhtaid jábmiiguin. ₇Dan dihte cealká Hearrá Ipmil: Gottáhallan olbmot geaid dii lehpet čobmen deike, leat biergu, ja din gávpot lea báhti, muhto din mun doalvvun dáppe eret. ₈Miehkis dii ballabehtet, ja miehki mun geigen din vuostá, cealká Hearrá Ipmil. ₉Mun doalvvun din eret gávpogis, attán din vierroolbmuid gihtii ja ollašuhtán din duomu. ₁₀Dii gahččabehtet miehkkái, Israela ráji alde mun dubmen din. Dalle dii ipmirdehpet ahte mun lean Hearrá. ₁₁Gávpot ii šatta didjiide báhtin ehpetge dii šatta dasa biergun. Israela ráji alde mun dubmen din. ₁₂Dalle dii ipmirdehpet ahte mun lean Hearrá, dii geat ehpet doahttalan mu báhkkomiid ehpetge doallan mu lágaid, muhto doalaidet birasálbmogiiddádet lágaid.”

₁₃Go mun ledjen profehtastallamin, de jámii Pelatja, Benaja bárdni. Dalle mun luoitádin muđolassii ja čurvon alla jienain: “Vuoi, Hearrá! Áiggutgo don duššadit buohkaid geat vel leat báhcán Israelis?”

₁₄Munnje bođii dát Hearrá sátni: ₁₅Olmmoš, ná dadjet Jerusalema ássit du vieljaid ja fulkkiid birra ja oppa Israela álbmoga birra: “Sii leat guhkkin Hearrás. Midjiide dát eanan lea addojuvvon árbin ja opmodahkan.” ₁₆Dan dihte cealkke: Ná cealká Hearrá Ipmil: Mun lean dolvon sin guhkás álbmogiid gaskii ja biđgen sin vieris eatnamiidda, muhto sii leat goit sáhttán bálvalit mu dain eatnamiin maiddái leat šaddan. ₁₇Dan dihte cealkke: Ná cealká Hearrá Ipmil: Mun čohkken din álbmogiid siste, buvttán din dain eatnamiin gosa dii lehpet biđgejuvvon ja attán didjiide Israela eatnama.

₁₈Go sii leat máhccan, de sii jávkadit buot fasttes govaid ja visot eartnjehas vieruid. ₁₉Mun attán sidjiide ođđa váimmu ja deavddán sin ođđa vuoiŋŋain. Mun válddán sin rattis geađgeváimmu ja attán sidjiide oažževáimmu, ₂₀vai sii doahttalit mu báhkkomiid, dollet mu lágaid ja ellet daid mielde. Dalle sii leat mu álbmot, ja mun lean sin Ipmil. ₂₁Muhto daidda geat ain doallánit fasttes govaidasaset ja eartnjehas vieruidasaset, mun mávssahan sin daguid, cealká Hearrá Ipmil.

₂₂Kerubat bajidedje soajáideaset. Jorrit bohte kerubaid mielde, ja Israela Ipmila hearvásvuohta lei kerubaid badjel. ₂₃Hearrá hearvásvuohta badjánii gávpogis ja orustii dan várrái mii lea gávpogis nuorttas. ₂₄Vuoigŋa loktii mu ja oainnáhusas maid Ipmila vuoigŋa attii dat doalvvui mu Kaldeai, daid eret dolvojuvvon olbmuid lusa. ₂₅Mun muitalin sidjiide buot maid Hearrá lei diktán mu oaidnit.