Esekiel 22

₁Munnje bođii dát Hearrá sátni: ₂Olmmoš, cuiggot varragávpoga, cuiggot dan! Dieđit dasa makkár fastivuođat doppe dahkkojuvvojit. ₃Daja: Ná cealká Hearrá Ipmil: Gávpot, don mii golggahat vara muvrraidat siskkobealde, du áigi lea boahtán. Don leat duddjon eahpeipmilgovaid ja dahkan iežat buhtismeahttumin. ₄Dat varra maid leat golggahan, lea dahkan du sivalažžan, ja eahpeipmilgovat maid leat duddjon, leat dahkan du buhtismeahttumin. Du maŋimus beaivi lahkona, du jagit leat lohkkojuvvon. Mun bijan eará álbmogiid bilkidit du, mun dagan du buot álbmogiid bogostahkan. ₅Du bilkidit buohkat, ležžet dal guhkkin dahje lahka. Du namma lea duolvaduvvon, moivi lea stuoris.

₆Vuoi du! Israela oaivámuččat geat ásset du siste, geavahit válddiset golggahit vara. ₇Du siste olbmot hiddjidit áhčiset ja eatniset, sordet vierrásiid ja leaskkaid ja givssidit oarbásiid. ₈Don badjelgeahčat dan maid mun lean dahkan bassin, don eahpebasuhat mu sabbahiid. ₉Du siste leat olbmot geat golggahit vara bostalemiin, du siste olbmot dollet oaffarmállásiid váriin, du siste dahkkojuvvojit heahpatlaš dagut. ₁₀ Du siste olbmát veallájit áhčiset áhkáin, du siste sii atnet nissona vaikko son lea buhtismeahttun mánodávddaid geažil. ₁₁Muhtin nuskoša lagamuččas áhkáin, nubbi furroša manjiinis ja heahppášuhttá su, goalmmát veallá oappáinis, áhčis nieiddain. ₁₂Du siste olbmot goddet mávssu ovddas. Don válddát reanttu ja liigevuoittu. Don soarddát iežat lagamučča ja bivddát vearrevuoittu. Muhto mu don leat vajáldahttán, cealká Hearrá Ipmil.

₁₃Mun spežžen gieđaid go oainnán dan vearrevuoittu maid don leat rábidan, ja dan vara mii golgá du siste. ₁₄Bissugo du roahkkatvuohta ja gievravuohta dalle go mun meannudan duinna? Mun, Hearrá, lean sárdnon, ja mun dagan dan. ₁₅Mun biđgen du eará álbmogiid gaskii ja botkkuhan du vieris eatnamiidda, ja mun jávkadan visot du buhtismeahttunvuođa. ₁₆Don heahppášuhttojuvvot buot álbmogiid oaidnut, ja dalle don ipmirdat ahte mun lean Hearrá.

₁₇Munnje bođii dát Hearrá sátni: ₁₈Olmmoš, israellaččat leat šaddan skártan mu čalmmiin. Sii leat buohkat dego veaiki, datni, ruovdi ja ladju šolgenuvnnas, sii leat dego silbaskárta. ₁₉Dan dihte cealká Hearrá Ipmil: Go dii juo lehpet šaddan skártan, de mun čohkken din Jerusalemii. ₂₀Nugo olmmoš čohkke silbba, bronssa, ruovddi, laju ja dani šolgenuvdnii ja bossu dollii vai dat suddet, nu munnai buolli moaristan čohkken din, bijan din uvdnii ja suddadan din. ₂₁Mun čohkken din ja fádden iežan moari dola din vuostá, ja dii suddabehtet dasa. ₂₂Nugo silba suddaduvvo uvnnas, nu diinai suddaduvvobehtet. Dalle dii ipmirdehpet ahte mun, Hearrá, lean golggahan iežan moari din badjelii.

₂₃Munnje bođii dát Hearrá sátni: ₂₄Olmmoš, daja Israela álbmogii: Du eanan ii leat ožžon čázi, dasa ii arván mu moari beaivvi. ₂₅Du oaivámuččat ledje čeargu ja speaddji ledjonat. Sii borre olbmuid, rivvejedje dávviriid ja divrras gálvvuid ja dahke eatnagiid leaskan. ₂₆Báhpat rihkko mu lága ja dahke eahpebassin dan maid mun ledjen dahkan bassin. Sii eai dahkan erohusa basi ja eahpebasi gaskkas, eai oahpahan mii lea buhtis ja mii buhtismeahttun eaige doallan mu sabbahiid. Nu sii heahppášuhtte mu bassivuođa. ₂₇Dan oaivámuččat ledje dego speaddji gumppet. Sii golggahedje vara ja duššadedje olbmuid, vai besse váldit vearrevuoittu. ₂₈Dan profehtat kálkejedje visot dán behtolaš oainnáhusaideasetguin ja gielis einnostusaideasetguin. Sii dadje: “Ná cealká Hearrá Ipmil”, vaikko Hearrá ii lean cealkán maidege. ₂₉Eatnama olbmot rivvejedje ja rievidedje, áŧestedje gefiid ja váivvášiid ja sorde vierrásiid vuoigatmeahttumit. ₃₀Mun ohcen sin gaskkas olbmá hukset muvrra dahje čuoččastit muvralatnjii, vai mun in duššadivčče eatnama, muhto in gávdnan dakkár olbmá. ₃₁Dalle mun gurrejin iežan moari sidjiide ja duššadin sin iežan suhtu dolain. Mun mávssahin sidjiide sin daguid, cealká Hearrá Ipmil.