Esekiel 23

₁Munnje bođii dát Hearrá sátni: ₂Olmmoš, de ledje guokte nissona, ovtta eatni nieiddat ₃geat furrošeigga juo nuorran Egyptas: Doppe olbmát čárvvodedje ja guldaledje sudno nieiddačiččiid. ₄Boarráseappo namma lei Ohola ja nuorabu Oholiba. Soai šattaiga mu oapmin ja riegádahtiiga bártniid ja nieiddaid. – Ohola lea Samaria, Oholiba lea Jerusalem.

₅Muhto vaikko Ohola lei mu, de son furrošii ain. Son cahkiidii ráhkisvuođas ráhkisteddjiidasas, assyrialaččaide, daidda soahteolbmáide ₆geaid gárvun ledje purpurbiktasat, daidda eatnanhearráide ja oaivámuččaide, fávrros nuorra olbmáide geat riidejedje heasttačielggis. ₇Sidjiide son gessui fuorrávuođastis, buot daidda Assyria válljobártniide. Son hipmudii sidjiide ja dagai iežas buhtismeahttumin buot sin eahpeipmilgovaiguin. ₈Son elii ain dan fuorráeallima maid lei álggahan Egyptas, gos olbmát ledje veallán suinna go son lei nuorra, čárvvodan su nieiddačiččiid ja furrošan suinna hipmošemiin. ₉Dan dihte mun adden su su ráhkisteddjiid, assyrialaččaid, gihtii, daid geaidda son hipmošii. ₁₀Sii nulle su álás, dolvo su bártniid ja nieiddaid ja godde su mihkiin. Nu sii ollašuhtte su duomu, ja su heajos beaggin šattai várrehussan buot nissoniidda.

₁₁Su oabbá Oholiba oinnii buot dan, muhto son hipmudii vel bahábut go Ohola ja furrošii vel vearrábut go son. ₁₂Son cahkiidii ráhkisvuođas assyrialaččaide. Sii ledje eatnanhearrát ja oaivámuččat, soahteolbmát geaid gárvun ledje hearvás biktasat, buohkat fávrros nuorra olbmát geat riidejedje heasttasealggis. ₁₃Mun oidnen mo son dagai iežas buhtismeahttumin – soai goappašagat meannudeigga seammá ládje. ₁₄Muhto Oholiba furrošii vel vearrábut. Son oinnii seainnis olbmágovaid, čuvgesruoksadiin sárgojuvvon Kaldea olbmáid. ₁₅Dain lei alimiid birra boagán ja oaivvis libardeaddji turbána, ja dain lei vovdnaolbmá ebmos neahku. Dat ledje Babylona bártnit, Kaldea eatnama olbmot. ₁₆Go son oinnii daid, de son dalán hipmošišgođii sidjiide. Son vuolggahii áirasiid Kaldeai, ₁₇ja babylonialaččat bohte su lusa su ráhkisvuođa oađđinsadjái ja dahke su buhtismeahttumin fuorrávuođaineaset. Muhto go son lei dahkan iežas buhtismeahttumin singuin, de su hipmu čáskkai. ₁₈Muhto go son lei rahpan salas sidjiide ja furrošan singuin albmosit, de son šattai munnje ilgadin, nugo su oabbáge lei šaddan. ₁₉Liikká son ain furrošii. Son muittii nuorravuođas beivviid go son furrošii Egyptas, ₂₀ja son hipmošišgođii Egypta fuorráolbmáide geain lei buoža nugo ásenis ja siema dego ores. ₂₁Don áibbašit iežat fuorás nuorravuođa, dan áiggi go Egypta olbmát čárvvodedje ja guldaledje du nieiddačiččiid.

₂₂Dan dihte, Oholiba, cealká Hearrá Ipmil: Mun bođđen du vuostá du ráhkisteddjiid geat dus leat leamaš ja geat šadde dutnje ilgadin. Mun buvttán sin juohke guovllus fallehit du: ₂₃Babylonialaččaid ja kaldealaččaid, Pekoda, Šoa ja Koa olbmáid ja velá buot assyrialaččaid, fávrros nuorra olbmáid, eatnanhearráid ja oaivámuččaid geat buohkat leat ebmos sáŋgárat ja vovdnasoahteolbmát, guđet buohkat riidejit heasttaiguin. ₂₄Ollu vovnnaiguin ja eatnat álbmogiiguin sii fallehit du juohke guovllus, vearjun guhkes ja jorba galbbat ja oaivvis ruovdegahpirat. Mun attán sidjiide válddi dubmet, ja sii dubmejit du iežaset lágaid mielde. ₂₅Mun divttán du dovdat mu balahahkesvuođa, divttán sin moari deaivat dutnje. Sii čuhppet dus njuni ja beljiid, ja dat geat leat báhcán, gahččet miehkkái. Sii dolvot du bártniid ja nieiddaid, ja dat geat leat báhcán, bullet dolas. ₂₆Sii nullet dus biktasiid ja váldet du hearvás čiŋaid. ₂₇Mun loahpahan dan nuoskivuođa ja furrošeami maid don álggahit juo Egyptas. Don it šat áibbaš ráhkisteddjiidat itge muittaš Egypta.

₂₈Ná cealká Hearrá Ipmil: Mun attán du daid gihtii geaid don fasttášat, daid gihtii geat šadde dutnje ilgadin. ₂₉Fasttášemiin sii fallehit du ja váldet buot mii dus lea, dassážii go don veallát áibbas álásin, du fuorás álásvuohta rabasin ja du nuoskkes furrošeapmi almmusin. ₃₀Nu geavvá dutnje danin go don vihket vierrásiid maŋis ja furrošit sin eahpeipmilgovaiguin.

₃₁Don leat vádjolan oappát geainnu, dan dihte mun attán du gihtii su geara. ₃₂Ná cealká Hearrá Ipmil:

₃₅Ná cealká Hearrá Ipmil: Don vajáldahttet mu, don jorgalit munnje selggiid. Dál don gárttat gillát iežat nuoskivuođa ja furrošeami čuovvumušaid.

₃₆Hearrá celkkii munnje: Olmmoš, dubme Ohola ja Oholiba ja dieđit sudnuide, makkár fastivuođaid soai leaba dahkan. ₃₇Soai leaba rihkkon náittosdili, ja sudno gieđat leat varranaga. Soai leaba furrošan eahpeipmiliiddiskaguin ja leaba velá oaffaruššan daidda biebmun mánáid geaid riegádahtiiga munnje. ₃₈Iige das vel galle: Soai dagaiga mu bassibáikki buhtismeahttumin ja eahpebasuhedje mu sabbahiid. ₃₉Go soai leigga goddán mánáideaskka eahpeipmiliidda, de seammá beaivvi soai bođiiga mu bassibáikái ja eahpebasuheigga dan. Ná soai dagaiga mu tempelis! ₄₀Soai vuolggaheigga velá áirasiid gáiddus eatnamiid olbmáid lusa, geat bohte go ožžo sáni. Sin geažil don ledjet basadan, vuoiddadan čalmmiid ja čiŋadan. ₄₁Don ledjet čohkánan seŋgii maid ledjet láhčán. Dan guoras lei lágiduvvon beavdi man ala don ledjet bidjan mu suovvasiid ja mu oljju. ₄₂Du birra gullui fuolahis olbmuid šlápma. Ollu earáid lassin doppe ledje olbmát geat ledje buktojuvvon meahcis. Sii bidje goappašiid nissoniid gieđaide giehtarieggáid ja oaivái hearvás kruvnnu. ₄₃Dalle mun dadjen dan šliitašuvvan fuorá birra: Dál sii furrošit suinna ja son singuin. ₄₄Olbmát bohte nugo lávejit boahtit fuorá lusa, nu sii bohte Ohola ja Oholiba, daid heahpatlaš nissoniid lusa.

₄₅Muhto vuoigatlaš olbmát dubmejit sudno nugo lávejit dubmet fuorránissoniid ja dakkár nissoniid geat sorbmejit olbmuid. Soaihan leaba rihkkon náittosdili, ja sudno gieđat leat varahuvvan.

₄₆Ná cealká Hearrá Ipmil: Čuoččáldahttos olmmošjoavku sudno vuostá, addojuvvoska soai hirbmii ja stajiduvvot. ₄₇Olmmošjoavku galgá geađgádit sudno ja illastit sudno mihkiin, goddit sudno bártniid ja nieiddaid ja boaldit sudno viesuid. ₄₈Mun loahpahan furrošeami eatnamis. Buot nissonat galget oahppat váldit vára, amaset furrošit dudno láhkái. ₄₉Doai šaddabeahtti vástidit furrošeamisteatte ja gillát ráŋggáštusa das ahte leahppi suddudan eahpeipmiliiddádeguin. Dalle doai ipmirdeahppi ahte mun lean Hearrá Ipmil.