Esekiel 40

₁Lei min fáŋgavuođa guoktelogiviđát jahki, njealljenuppelogát jahki maŋŋil go Jerusalem lei váldojuvvon, jagi álgu, mánu logát beaivi. Aiddo dan beaivvi Hearrá dohppii gieđainis mu ja doalvvui mu ₂oainnáhusas Israela eatnamii. Son bijai mu hui alla várrái man lullevielttis lei juoga mii lei dego gávpot. ₃Son doalvvui mu gávpogii, ja mun oidnen dan poarttas čuožžumin olbmá gii šealgái dego bronsa. Sus lei gieđas beallemasbáddi ja mihttostággu. ₄Olmmái dajai munnje: “Olmmoš, geahčat ja guldal dárkilit, cieggat muitui buot maid mun čájehan dutnje. Aiddo dan várás don leat buktojuvvon deike. Buot maid oainnát, don galggat muitalit israellaččaide.”

₅Mun oidnen ahte tempela birra lei muvrra. Olbmá gieđas lei guhtta állana guhkkosaš mihtidanstággu, ja dan állan lei giehtaloabu govdodaga guhkit go dábálaš állan. Son mihtidii muvrra, ja dat lei ovtta stákku asu ja ovtta stákku alu.

₆De olmmái manai nuorttabeale portii, goarkŋui dan boardagiid ja mihtidii poartašielmmá govdodaga, ja dat lei ovtta stákku govddu. ₇Poartahuksehusa oalgelanjat ledje ovtta mihtidanstákku guhku ja ovtta govddu, ja lanjaid gaska lei vihtta állana. Dan poartalanja šielbmá mii lei tempela guvlui, lei ovtta stákku govddu. ₈De son mihtidii ovdahálla. ₉Dat lei uvssas uksii gávcci állana, ja uksabeallát ledje guokte állana. Dát ovdahálla lei tempela guvlui. ₁₀Nuortapoarttas ledje goappáge bealde golbma oalgelanja, buot ovttamahtosaččat, ja maiddái buot seinniin daid gaskkas ledje ovttahat mihtut. ₁₁Olmmái mihtidii poartaráiggi govdodaga, ja dat lei logi állana govddu. Oktiibuot poartahuksehusa govdodat lei golbmanuppelohkái állana. ₁₂Oalgelanjaid ovddas goappáge bealde lei seaidni mii lei ovtta állana čieŋu. Juohke latnja lei guhtta állana guhku ja guhtta állana govddu. ₁₃Son mihtidii gaskka poartta oalgelanja maŋŋeseainnis dan lanja maŋŋeseaidnái mii lei dan buohta, ja dat lei guoktelogivihtta állana. Uksaráiggit ledje álo buohtalagaid. ₁₄De son mihtidii ovdalanja, ja dat lei guoktelogi állana. Dan birra lei ovdašillju. ₁₅Poartta olgoseainnis lei vihttalogi állana ovdahálla maŋŋeseaidnái. ₁₆Lanjaid maŋŋeseinniid siskkobealde ledje ihkkonat. Maiddái ovdalanja seinniid siskkobealde ledje goappáge bealde čeargalasihkkonat, ja uksabealláin ledje pálbmahearvvat.

₁₇Olmmái doalvvui mu dasto olggut ovdašilljui. Doppe ledje gámmárat ja geđggiiguin gokčojuvvon guolbi šilju birra. Geađgeguolbbis ledje golbmalogi gámmára. ₁₈Vuolit geađgeguolbi poartalanja goappáge bealde lei seammá govdat go poartahuksehus. ₁₉Olmmái mihtidii vuolit poartta siskkobeale ja siskkit ovdašilju olgoravdda gaskka, ja dat lei čuođi állana sihke nuorttas ja davás guvlui.

₂₀Son mihtidii dan poartta guhkkodaga ja govdodaga mii lei davás guvlui ja gokko beasai olggut ovdašilljui. ₂₁Das ledje golbma oalgelanja goappáge bealde, ja daid gaskasaš seainnit ja ovdahálla ledje seammá mahtosaččat go vuosttaš poarttas. Poartahuksehus lei vihttalogi állana guhku ja guoktelogivihtta állana govddu. ₂₂Ovdahálla, ihkkonat ja pálbmahearvvat ledje seammá mahtosaččat go nuorttabeale poarttas. Dánge portii beasai boardagiid main ledje čieža ráhppábáni, ja ovdahálla lei ovdašilju bealde. ₂₃Davvepoartta buohta lei poarta mas beasai siskkit ovdašilljui, seammá ládje go nuorttabealdege. Olmmái mihtidii poarttaid gaskka, ja dat lei čuođi állana.

₂₄Dasto olmmái doalvvui mu lulábeallái, ja doppege lei poarta. Son mihtidii dan, ja dan uksabeallát ja ovdahálla ledje seammá mahtosaččat go eará poarttain. ₂₅Poartta ja ovdalanja goappáge bealde ledje ihkkonat, seammalágánat go eará poarttain, ja oppa poartahuksehus lei vihttalogi állana guhku ja guoktelogivihtta állana govddu. ₂₆Dohko beasai boardagiid main ledje čieža ráhppábáni, ja ovdahálla lei siskkit ovdašilju guvlui. Poartta uksabealláid goappáge bealde ledje pálbmahearvvat. ₂₇Maiddái dáppe lulábealde lei poarta mas beasai siskkit ovdašilljui, ja go olmmái mihtidii dáid poarttaid gaskka, de dat lei čuođi állana.

₂₈Olmmái doalvvui mu lullepoarttas siskkit ovdašilljui. Son mihtidii poartta, ja dat lei seammá mahtosaš go eará poarttat. ₂₉Dan lanjat, daid gaskasaš seainnit ja ovdahálla ledje seammá mahtosaččat go eará poarttain. Poartta ja ovdahálla goappáge bealde ledje ihkkonat. Oppa poartahuksehus lei vihttalogi állana guhku ja guoktelogivihtta állana govddu. ₃₀Guđege ovdahálla guhkkodat lei guoktelogivihtta állana ja govdodat vihtta állana. ₃₁Dát ovdahálla lei olggut ovdašilju guvlui, dan uksabealláin ledje pálbmahearvvat, ja dohko beasai boardagiid main ledje gávcci ráhppábáni.

₃₂Dasto olmmái doalvvui mu siskkit ovdašilju nuortaportii ja mihtidii dan, ja dat lei seammá mahtosaš go eará poarttat. ₃₃Oalgelanjat, daid gaskasaš seainnit ja ovdahálla ledje seammá mahtosaččat go eará poarttain. Poarttas ja ovdahállas ledje ihkkonat goappáge bealde. Oppa poartahuksehus lei vihttalogi állana guhku ja guoktelogivihtta állana govddu. ₃₄Ovdahálla lei olggut ovdašilju guvlui, dan uksabealláin goappáge bealde ledje pálbmahearvvat, ja dohko beasai boardagiid main ledje gávcci ráhppábáni.

₃₅Olmmái doalvvui mu dasto davveportii ja mihtidii dan, ja dat lei seammá mahtosaš go eará poarttat. ₃₆Oalgelanjat, daid gaskasaš seainnit ja ovdahálla ledje seammá mahtosaččat go eará poarttat, ja poarttas ledje ihkkonat juohke bealde. Oppa poartahuksehus lei vihttalogi állana guhku ja guoktelogivihtta állana govddu. ₃₇Ovdahálla lei olggut ovdašilju guvlui, dan uksabealláin goappáge bealde ledje pálbmahearvvat, ja dohko beasai boardagiid main ledje gávcci ráhppábáni.

₃₈Poartta ovdalanjas beasai gámmárii gos boaldinoaffarat doidojuvvojedje. ₃₉Ovdalanjas ledje goappáge bealde guokte beavddi maid alde njuvve boaldinoaffariid, suddooaffariid ja vealgeoaffariid. ₄₀Olgun, ovdalanja davvepoartta goappáge bealde, ledje guokte beavddi. ₄₁Beavddit maid alde oaffarat njuvvojuvvojit, ledje nappo gávcci, njeallje beavddi poartta siskkobealde ja njeallje olggobealde. ₄₂Boaldinoaffara várás ledje njeallje geađggis čullojuvvon beavddi mat ledje beannot állana guhku, beannot állana govddu ja ovtta állana alu. ₄₃Huksehusa sisa ledje seinniide giddejuvvon gieđa govdosaš hildut. Daid ala biddjojuvvojit biergasat maid atnet go njuvvet boaldinoaffariid ja njuovvanoaffariid. Oaffarbiergu biddjojuvvui bevddiid ala.

₄₄Siskkit poarttaid olggobealde siskkit ovdašiljus ledje guokte gámmára, nubbi lei davvepoartta guoras lulás guvlui ja nubbigis lullepoartta guoras davás guvlui. ₄₅Olmmái dajai munnje: “Dat gámmár mii lea lulás guvlui, lea daid báhpaid várás geat doaimmahit tempelbálvalusa. ₄₆Dat gámmár mii lea davás guvlui lea daid báhpaid várás geat doaimmahit áltárbálvalusa. Sii leat Sadoka nális, dat Levi bártniin geat ožžot loaiddastit Hearrá ovdii doaimmahit bálvalusa.”

₄₇Olmmái mihtidii ovdašilju, ja dat lei čuođi állana guhku ja čuođi állana govddu, njealječiegat. Tempela ovddas lei áltár. ₄₈Son doalvvui mu tempela ovdahállii ja mihtidii dan uksabealláid, ja dat ledje guktot vihtta állana. Uksa lei njealljenuppelohkái állana govddu, ja dan goappáge beale seainnit ledje golbma állana govddu. ₄₉Ovdahálla lei guoktelogi állana govddu ja guoktenuppelohkái állana guhku. Dohko beasai boardagiid main ledje logi ráhppábáni. Uksabealláid guoras ledje báccit, okta goappáge bealde.