Esekiel 43

₁Olmmái doalvvui mu dan poartta lusa mii lei nuorttas guvlui. ₂Ja mun oidnen: Nuortan bođii Israela Ipmila hearvásvuohta. Dan jietna lei dego stuorra čáziid márra, ja eanan báittii su hearvásvuođas. ₃Oainnáhus maid mun oidnen, lei seammalágán go dat maid mun ledjen oaidnán, go Hearrá bođii duššadit gávpoga, dego dat maid ledjen oaidnán Kebarjoga gáttis. Mun luoitádin eatnamii muđolassii. ₄Hearrá hearvásvuohta manai tempelii dan poartta ráigge mii lea nuorttas guvlui. ₅Vuoigŋa bajidii mu eatnamis ja doalvvui mu siskkit ovdašilljui, ja mun oidnen ahte Hearrá hearvásvuohta devddii tempela. ₆De mun gullen go muhtin sártnui munnje tempelis, ja olmmái lei ain čuožžumin mu bálddas. ₇Jietna dajai: Olmmoš, dát lea mu truvnnu báiki ja mu juolgevuođuid báiki. Dás mun ásan israellaččaid gaskkas agálaččat. Eai israellaččat ieža eaige sin gonagasat daga šat mu bassi nama buhtismeahttumin furrošemiineaset eaige jápmán gonagasaideaset rupmašiiguin. ₈Sii bidje šielmmáideaset mu šielmmá gurrii, ja uksabealláideaset sii ceggejedje mu uksabealláid gurrii, nu ahte dušše seaidni earuhii mu sis. Sii dahke mu bassi nama buhtismeahttumin fasttes daguideasetguin. Danin mun duššadin sin moaristan. ₉Dál sii galget heaitit furrošeames ja váldit gonagasaideaset rupmašiid eret mu luhtte, ja de mun ásan sin gaskkas agálaččat.

₁₀Olmmoš, muital israellaččaide dán tempela birra, vai sii heahpanivčče suttuideaset dihte. Go sii mihtidit dan skovi, ₁₁de sii heahpanit buot dan dihte maid leat dahkan. Čilge sidjiide tempela hámi ja ráhkadusa, uvssaid main beassá sisa ja olggos, ja buot lágaid ja njuolggadusaid mat gusket tempelii. Čále daid sin oaidnut, vai sii doahttalivčče buot lágaid ja njuolggadusaid ja doalašedje daid.

₁₂Dát lea tempela láhka: Oppa dan sadji várrealážis lea bassi.

₁₃Dát leat áltára állanmihtut, go állan lea gieđa guhkit go dábálaš állan: Renne dan birra lei ovtta állana čieŋu ja ovtta állana govddu, ja dan birra lei goartila allosaš ravdalista. Dát lei áltára vuođđu: ₁₄Renne guoras eatnama dásis lei guokte állana vuolit steallái mii lei ovtta állana govddu, ja vuolit steallis bajit steallái mii maiddái lei ovtta állana govddu, lei njeallje állana. ₁₅Áltárárran lei njeallje állana alu, ja das geaigájedje njeallje áltárčoarvvi bajás guvlui. ₁₆Áltárárran lei njealječiegat, guoktenuppelohkái állana guhku ja guoktenuppelohkái govddu. ₁₇Maiddái stealli lei njealječiegat, njealljenuppelohkái állana guhku ja njealljenuppelohkái állana govddu. Ravdalista dan birra lei állanbeale alu, ja renne lei ovtta állana čieŋu miehtá. Áltára boardagat ledje nuorttas guvlui.

₁₈Olmmái dajai munnje: Olmmoš, ná cealká Hearrá Ipmil: Dát leat áltárnjuolggadusat mat leat fámus dan beaivvi rájes go áltár lea huksejuvvon, ja dan alde sáhttá oaffaruššat boaldinoaffariid ja dan ala sáhttá riškkuhit vara. ₁₉Don galggat addit nuorra vuovssá suddooaffarin daidda levilaš báhpaide geat leat Sadoka nális, daidda geat besset leat mu lahka ja bálvalit mu, cealká Hearrá Ipmil. ₂₀Váldde vuovssá vara ja sihko dan njealji áltárčoarvái, stealli njealji čihkii ja miehtá ravdalistta. Nu don buhtistat áltára ja doaimmahat dasa soabahusa. ₂₁Váldde dasto suddooaffarvuovssá ja boaldde dan bassibáikki olggobealde, dan báikkis tempelsaji siste mii lea mearriduvvon dasa. ₂₂Maŋit beaivvi don galggat oaffaruššat suddooaffarin bohká mii lea almmá vigi haga. Dainna áltár buhtistuvvo suttus, nugo dat ovdal buhtistuvvui vuovssá varain. ₂₃Go don leat geargan buhtisteames áltára, de galggat váldit nuorra vuovssá mii lea almmá vigi haga, ja smávvaomiin viercca mii lea almmá vigi haga. ₂₄Don galggat buktit daid Hearrá ovdii. Báhpat galget botkalit sálttiid daid ala ja oaffaruššat daid boaldinoaffarin Hearrái. ₂₅Čieža beaivvi don galggat beaivválaččat oaffaruššat suddooaffarin bohká, ja maiddái nuorra vuovssá ja smávvaomiin viercca, dat buot galget leat almmá vigi haga. ₂₆Čieža beaivvi galgá doaimmahit soabahusa áltára ovddas; dan galgá buhtistit ja vihahit. ₂₇Go dát beaivvit leat vássán, de báhpat, gávccát beaivvi rájes, galget oaffaruššat din boaldinoaffariid ja searvevuođaoaffariid áltára alde. Dalle mun geahčan din beallái, cealká Hearrá Ipmil.