Esekiel 42

₁Olmmái doalvvui mu davás guvlui olggut ovdašilju davveoassái, dan gámmárviesu lusa mii lei rabas šilju ja vistti guoras. ₂Dan viesu guhkkodat lei davábealde čuođi állana ja dan govdodat lei vihttalogi állana. ₃Viessu lei siskkit ovdašilju oasi guoras man govdodat lei guoktelogi állana, ja olggut ovdašilju geađgeguolbbi guoras. Viessu lei huksejuvvon golmma geardái steallálagaid. ₄Gámmáriid guoras, dan bealde mii lei sisa guvlui, lei logi állana govdosaš ja čuođi állana guhkkosaš váccáhat. Uvssat ledje davás guvlui. ₅Viesu bajimus gámmárat ledje gáržžibut go dan vuolimus ja gaskkamus gámmárat, danin go doppe stealli válddii eambbo saji. ₆Gámmárat ledje huksejuvvon golmma geardái. Gámmáriin eai lean báccit nugo ovdašiljus. Danin bajimus gámmárat ledje gáržžibut go gaskkamus ja vuolimus gámmárat. ₇Gámmáriid ovddas olggut ovdašilju bealde lei muvra. Dan guhkkodat lei vihttalogi állana, ₈danin go olggut ovdašilju gámmárat mat ledje gámmárviesu buohta, ledje vihttalogi állana guhkku. Oktiibuot guhkkodat lei čuođi állana. ₉Gámmáriid uvssat ledje nuorttabealde. Gámmáriidda beasai olggut ovdašiljus, ₁₀dakko gokko ovdašilju muvra álggii.

Maiddái lulábealde ledje gámmárat rabas šilju ja vistti guoras, ₁₁ja daid ovddas lei váccáhat. Gámmárat ledje oaidnit seammalágánat go davábeale gámmárat, ja dat ledje seammá guhkit ja govdadat. Buot daid poarttat, daid huksenmálle ja daid uvssat ledje seammalágánat go dain. ₁₂Lulábeale gámmáriid uvssat ledje nuorttabealde, ja daidda beasai dakko gokko váccáhat muvrra guoras álggii.

₁₃Olmmái dajai munnje: “Davábeale ja lulábeale gámmárat mat leat rabas šilju guoras, leat bassi gámmárat, gos dat báhpat geat besset leat lahka Hearrá, borret allabassi oaffarattáldagaid. Dohko sii galget rádjat allabassi oaffarattáldagaid – borramušoaffara, suddooaffara ja vealgeoaffara – danin go dat lea bassi báiki. ₁₄Dohko báhpat galget guođđit daid biktasiid maid atnet go doaimmahit bálvalusa, ovdal go mannet bassi sajis olggut ovdašilljui, danin go biktasat leat basit. Sii galget gárvodit eará biktasiid ovdal go mannet dan sadjái gos álbmot lea.”

₁₅Go olmmái lei geargan mihtideames tempelsaji ollásit, de son doalvvui mu olggos dan poarttas mii lei nuorttas guvlui, ja mihtidii tempelsaji birramihtu. ₁₆Son mihtidii nuorttabeali mihttostákkuinis, ja dat lei vihttačuođi állana. Dasto son ₁₇mihtidii mihttostákkuin dan davábeale, ja dan guhkkodat lei vihttačuođi állana. Dasto son ₁₈mihtidii mihttostákkuin lulábeale, ja dan guhkkodat lei vihttačuođi állana. ₁₉Son manai oarjjabeallái ja mihtidii dan mihttostákkuin, ja dan guhkkodat lei vihttačuođi állana. ₂₀Son lei dál mihtidan tempelsaji buot njealji almmiguovllus. Dan birra lei muvra mii lei vihttačuođi állana guhku juohke bealde. Muvra earuhii bassi guovllu eará gávpogis.