Esekiel 7

Loahppa lea boahtán, loahppa lea boahtán

eatnama njealji čihkii.

₃Dál du loahppa lea boahtán, Israel,

mun vuolggahan iežan moari du vuostá.

Mun dubmen du du vádjolusa mielde,

mávssahan dutnje buot du fasttes daguid.

₄Mun in árkkálmastte inge árpmit du.

Mun mávssahan dutnje dan

maid don leat dahkan,

buot du fasttes daguid.

Dalle dii ipmirdehpet ahte mun lean Hearrá.

₅Ná cealká Hearrá Ipmil:

Oasehisvuođaid oasehisvuohta!

₆Dat lea boahtán, loahppa lea boahtán.

Dál du loahppa lea boahtán.

₇Heavvu lahkona dutnje,

dat lahkona dutnje, eatnama ássi.

Áigi lea boahtán, beaivi lea lahka,

lea moivi, váriin eai gullo illučuorvasat.

₈Fargga mun golggahan

moarrán du badjelii,

gurren dutnje iežan suhtu.

Mun dubmen du du vádjolusa mielde,

mávssahan dutnje du fasttes daguid.

₉Mun in árkkálmastte inge árpmit du.

Mun mávssahan dutnje

maid don leat dahkan,

buot du fasttes daguid.

Dalle dii ipmirdehpet ahte mun, Hearrá,

lean časkán din.

₁₀Beaivi ránoda, heavvu lea lahka,

dat lea juo boahtimin.

Lágahisvuohta urbu,

čeavli bohciida,

₁₁ipmilmeahttumiid veahkaváldi šaddá

lágahis bahávuohtan.

Sis ii báze ii mihkkege,

ii sin šlámas, ii sin válas,

ii mihkkege báze sin goargatvuođas.

₁₂Áigi lea boahtán, beaivi lea lahka.

Allos oasti illudehko,

allos vuovdi moraštehko.

Moarri deaivida šlámaideaddji joavkku.

₁₃Vuovdi ii beasa šat oaidnit

gálvvu maid vuvddii,

ii oppa eallinagistisge.

Moarri deaivida šlámaideaddji joavkku.

Buohkat masset heakka suttuideaset dihte.

₁₄Dorvvet čuojahuvvojit,

buot lea gárvvis,

muhto ii oktage vuolgge soahtat.

Mu moarri deaivida šlámaideaddji joavkku.

₁₅Olgun miehkki,

siste rohttudávda ja nealgi.

Dat gii lea meahcis gahččá miehkkái,

dan gii lea gávpogis

loahpaha nealgi ja rohttudávda.

₁₆Soapmásat sis besset báhtarussii váriide

dego leagi duvvát,

muhto sii jápmet buohkat,

juohkehaš iežas suttu dihte.

₁₇Buohkaid gieđat njurret,

sin čippit šliddet.

₁₈Horstta sii gisset iežaset birra,

hirbma sis lea gárvun,

heahpat gokčá sin muođuid,

sin oaivvit ráhkejuvvojit báljisin.

₁₉Sii suhppot silbbaideaset gáhta ala,

atnet golliideaset ruskan.

Ii sin gájo golli iige silba

Hearrá moari beaivvi.

Eai sii dainna gallet nealggi

eaige deavdde čoavjjiset.

Aiddo golli ja silba jorralahtii sin.

₂₀Sin hearvás čiŋat bálvaledje čeavlli,

sii ráhkadedje dain alcceseaset

eartnjehas govaid,

fasttes eahpeipmiliid.

Dan dihte mun rievdadan

sin mávssolaš dávviriid fastivuohtan.

₂₁Mun attán daid

vierroolbmuid stajádussan,

eatnama ipmilmeahttumiid sálašin,

ja sii dahket dan eahpebassin.

₂₂Mun jorgalan sis muođuidan,

ja vierroolbmot eahpebasuhit

mu mávssolaš dávvira.

Rievvárat mannet sisa ja eahpebasuhit dan.

₂₃Sii sorbmejit,

danne go dán eatnama dievva

leat varradagut,

ja dán gávpoga dievva lea veahkaváldi.

₂₄Mun buvttán dohko bahámus álbmogiid,

ja dat oamastit sin viesuid.

Mun doaján veagalaččaid čeavlli,

ja sin bassibáikkit eahpebasuhuvvojit.

₂₅Go hirbma boahtá, de sii ohcet bestojumi,

muhto bestojupmi ii leat.

₂₆Boahtá oasehisvuohta

oasehisvuođa maŋŋil,

heavvosáhka heavvosága maŋŋil.

Olbmot ánuhit profehtas oainnáhusa,

báhppa ii máhte oahpistit,

vuorrasat leat ráđehuvvan.

₂₇Gonagas atná morašgárvvuid,

oaivámuš gárvoda suorggahusa,

olbmuid gieđat njurret.

Mun attán sidjiide sin vádjolusa mielde,

mun dubmen sin

nugo sii leat dubmen earáid.