Esekiel 8

₁Lei guđát jahki, guđát mánu viđát beaivi. Mun ledjen čohkkámin iežan viesus, ja Juda vuorrasat ledje mu luhtte. Dalle mu dohppii Hearrá giehta. ₂Mun oidnen muhtuma geas lei olbmo hápmi. Alimiin vulos guvlui son lei oaidnit dego dolla, ja su alimiin bajás guvlui oidnui dego báitin mii šealggui vilges golli láhkái. ₃Son geigii juoidá mii lei gieđa hápmásaš, ja dohppii mu vuovttaide, ja vuoigŋa loktii mu eatnama ja almmi gaskii ja doalvvui mu Ipmila oainnáhusas Jerusalemii. Vuoigŋa doalvvui mu siskkit ovdašilju davvepoartta uksaráiggi ovdii, dasa gokko lea govva mii boktá Hearrá moari. ₄Ja das lei Israela Ipmila hearvásvuohta, seammalágánin go mun ledjen oaidnán dan leagis.

₅Son celkkii munnje: “Olmmoš, geahča davás guvlui.” Nu mun gehččen davás guvlui ja oidnen poartta davábealde áltára, ja poartaráiggi guoras lei govva mii lei boktán Hearrá moari. ₆Son celkkii munnje: “Olmmoš, oainnátgo maid sii dahket? Israellaččat dahket dáppe nu fasttes daguid ahte mun ferten gáidat guhkás iežan bassibáikkis. Muhto don beasat oaidnit vel vearrát fastivuođaid.”

₇Son doalvvui mu ovdašilju uksaráiggi ovdii, ja mun oidnen muvrras ráiggi. ₈Son dajai munnje: “Olmmoš, gaikko muvrra ja mana čađa.” Mun gaikon muvrra, ja mun oidnen uvssa. ₉Son dajai: “Mana sisa ja geahča daid eartnjehas fastivuođaid maid sii doppe dahket.” ₁₀Mun mannen sisa, ja doppe mun oidnen buotlágáš fasttes diŋggaid, njoammuid ja šibihiid govaid, ja buot israellaččaid eahpeipmilgovaid mat ledje sárgojuvvon seinniide birra buot. ₁₁Govaid ovddas čužžo čiežalogi Israela vuorrasa, ja sin gaskkas čuoččui Jaasanja, Šafana bárdni. Juohkehaččas lei suovaslihtti gieđas, ja njálggahájat suovvasiid balva loktanii áibmui. ₁₂Dasto son celkkii munnje: “Olmmoš, oainnátgo maid Israela vuorrasat dahket seavdnjadasas, iešguhtege iežas eahpeipmila gámmáris? Sii dadjet: Hearrá ii oainne min, Hearrá lea hilgon dán eatnama.” ₁₃Son celkkii munnje: “Don beasat oaidnit sin dahkamin vel vearrát fastivuođaid.”

₁₄Son doalvvui mu dan poartta uksaráiggi ovdii mii lea davás guvlui ja mas beassá Hearrá tempelii. Doppe čohkkájedje muhtun nissonat ja čirro Tammusa. ₁₅Son celkkii: “Olmmoš, oainnátgo? Don beasat oaidnit fastivuođaid, vel vearrábuid.”

₁₆Son doalvvui mu Hearrá tempela siskkit ovdašilljui. Das, Hearrá tempela uksaráiggi guoras, ovdalanja ja áltára gaskkas, ledje sullii guoktelogivihtta olbmá. Sii ledje selggiid Hearrá tempelii, ja sin muođut ledje nuorttas guvlui. Sii gopmárdalle nuorttas guvlui ja rohkadalle beaivváža. ₁₇Son celkkii munnje: “Olmmoš, oainnátgo? Iige Juda álbmogii leat galle dahkat dákkár fastivuođaid dáppe, sii dahket maiddái veahkaválddi miehtá eatnama ja leat máŋgii moaráhuhttán mu. Geahča, mo sii nahkehit viidnemuora oavssi njuni ovdii! ₁₈Mun áiggun meannudit suhtustan, mun in árkkálmastte inge árpmit sin. Vaikko sii čurvvošedje munnje man alla jienain ihkinassii, de mun in gula sin.”