Esekiel 9

₁1Mun gullen su čuorvumin alla jienain: “Dál deaivida ráŋggáštus dan gávpoga. Váldos juohkehaš gihtii duššadanvearjju!” ₂Dalle bohte guhtta olbmá bajit poartta luhtte, dan mii lea davás guvlui, ja juohkehaččas lei gieđas soahteákšu. Sin gaskkas lei olmmái gii lei gárvodan beallemasbiktasiid ja geas ledje boahkánis čállinbiergasat. Sii bohte ovdan ja čuoččastedje bronsaáltára gurrii. ₃Israela Ipmila hearvásvuohta badjánii kerubaid badjelis gos dat lei leamaš, ja sirdásii tempela uvssa buohta. Hearrá čuorvvui olbmái gii lei gárvodan beallemasbiktasiid ja geas ledje čállinbiergasat boahkánis, ₄ja celkkii sutnje: “Mana Jerusalema čađa, oppa gávpoga čađa ravddas nubbái, ja daga mearkka daid olbmuid gállui geat šuhkket ja vuobaidit buot daid fastivuođaid dihte mat doppe dahkkojuvvojit.” ₅Ja daidda earáide son dajai mu gullut: “Mannet su maŋis gávpoga čađa ja sorbmejehket árkkáškeahttá ja árpmitkeahttá. ₆Goddet boarrásiid ja nuorra olbmáid, nieiddaid, mánáid ja nissoniid, duššadehket sin, muhto allet guoskka oktiige geas lea mearka gállus. Álget mu tempelis.” Nu sii álge álbmoga vuorrasiin, dain olbmáin geat ledje tempela ovddas. ₇Son celkkii olbmáide: “Dahket tempela buhtismeahttumin, devdet ovdašiljuid gottáhallan olbmuiguin. Mannet dasto gávpogii ja sorbmejehket doppe.” ₈Sii dahke nu, ja mun báhcen dasa okto. Mun luoitádin muđolassii ja čurvon: “Vuoi, Hearrá! Áiggutgo don duššadit buot mii vel lea báhcán Israelis, go don ná golggahat moarát Jerusalema badjelii?” ₉Son vástidii: “Israela ja Juda suddovealgi lea hui stuoris. Varra golgá eatnamis ja gávpoga dievva lea lágahisvuohta. Sii dadjet: ‘Hearrá lea hilgon min eatnama, ii Hearrá beroš mis.’ ₁₀Danne mun in árkkáš inge árpmit. Mun mávssahan sidjiide sin daguid.”

₁₁Olmmái gii lei gárvodan beallemasbiktasiid ja geas ledje čállinbiergasat boahkánis, máhcai ja muitalii: “Mun lean dahkan dan maid don gohččot.”