1. Mosesgirji 46

₁Nu Israel vulggii ja válddii mielddis visot mii sus lei. Go son joavddai Beer Šebai, de son oaffarušai njuovvanoaffariid áhčis Isaka Ipmilii. ₂Ihkku Ipmil sártnui Israelii oainnáhusas: “Jakob, Jakob!” Son vástidii: “Dás mun lean.” ₃Ipmil celkkii: “Mun lean Ipmil, du áhči Ipmil. Ale bala mannamis Egyptii, dasgo mun dagan du doppe stuorra álbmogin. ₄Mun ieš manan duinna Egyptii, ja mun maiddái buvttán du doppe ruoktot. Ja Josef dahppá du čalmmiid.” ₅De Jakob vulggii Beer Šebas.

Israela bártnit dolvo áhčiset Jakoba ja mánáideaset ja áhkáideaset Egyptii daiguin vovnnaiguin maid farao lei vuolggahan viežžat su. ₆Sii válde mielde omiideaset ja eará opmodaga maid ledje háhkan Kanaanis, ja nu sii bohte Egyptii, Jakob ja oppa su sohka. ₇Jakob doalvvui buot bártniidis ja bártniidis bártniid, nieiddaidis ja bártniidis nieiddaid, oppa sogas mielddis Egyptii.

₈Dát leat dat israellaččat, Jakob ja su bártnit, geat bohte Egyptii: Jakoba vuosttašriegádeaddji lei Ruben. ₉Rubena bártnit ledje Henok, Pallu, Hesron ja Karmi. ₁₀Simeona bártnit ledje Jemuel, Jamin, Ohad, Jakin, Sohar ja Saul, gean eadni lei kanaanlaš. ₁₁Levi bártnit ledje Geršon, Kehat ja Merari. ₁₂Juda bártnit ledje Er, Onan, Šela, Peres ja Serah, muhto Er ja Onan leigga jápmán Kanaanii. Peresa bártnit ledje Hesron ja Hamul. ₁₃Isaskara bártnit ledje Tola, Puva, Jašub ja Šimron. ₁₄Sebulona bártnit ledje Sered, Elon ja Jahleel. ₁₅Dát ledje Lea bártnit geaid son riegádahtii Jakobii Paddan Aramis, ja sin bártnit. Leai lei riegádan maiddái nieida Dina. Dát Jakoba bártnit ja nieiddat ledje golbmalogigolbma.

₁₆Gada bártnit ledje Sifjon, Haggi, Šuni, Esbon, Eri, Arodi ja Areli. ₁₇Ašera bártnit ledje Jimna, Jišva, Jišvi ja Beria, ja sin oabbá lei Serah. Beria bártnit ledje Heber ja Malkiel. ₁₈Dát ledje Silpa mánát, su gean Laban attii nieidasis Leai. Silpa riegádahtii daid Jakobii, guhttanuppelohkái oktiibuot.

₁₉Jakoba áhká Rakela bártnit leigga Josef ja Benjamin. ₂₀Josefii riegádedje Egyptas bártnit Manasse ja Efraim, ja sudno riegádahtii Asenat, Ona báhpa Poti Fera nieida. ₂₁Benjamina bártnit ledje Bela, Beker, Ašbel, Gera, Naaman, Ahiram, Šufam, Hufam ja Ard. ₂₂Dát ledje Rakela bártnit, geaid son riegádahtii Jakobii, oktiibuot njealljenuppelohkái.

₂₃Dana bárdni lei Hušim. ₂₄Naftali bártnit ledje Jahseel, Guni, Jeser ja Šillem. ₂₅Dát ledje Bilha bártnit, su gean Laban attii nieidasis Rakelii. Bilha riegádahtii daid Jakobii, čieža oktiibuot.

₂₆Dat geat bohte Jakobiin Egyptii ja ledje su nális, ledje oktiibuot guhttalogiguhtta olbmo, ja dasa lassin vel su bártniid áhkát. ₂₇Josefa bártnit geat ledje riegádan sutnje Egyptas, ledje guokte. Buohkat Jakoba sogas geat bohte Egyptii ledje čiežalogis oktiibuot.

₂₈Jakob vuolggahii Juda iežas ovdalis Josefa lusa oahppat geainnu Gosenii. Nu sii ollejedje Gosenii, ₂₉ja Josef geassastahtii vovnnaidis ja vulggii dohko áhčis Israela ovddal. Go son oinnii áhčis, de son dollii su birra čeabeha ja čierui guhká su čeabehis. ₃₀Israel dajai Josefii: “Dál mun sáhtán jápmit, go lean oaidnán du muođuid ja dieđán ahte don ealát.”

₃₁Josef dajai vieljaidasas ja oppa áhčis jovkui: “Mun manan farao lusa muitalit ahte mu vieljat ja áhčči geat ásse Kanaanis, leat boahtán mu lusa. ₃₂Mun dajan sutnje ahte dii lehpet oapmegeahččit, ahte dis leat álo leamaš oamit, ja ahte dii lehpet buktán deike smávvaomiideattet ja stuorraomiideattet ja buot opmodagadet. ₃₃Go farao dasto rávká din lusas ja jearrá mii din fidnu lea, ₃₄de vástidehket: ‘Mii, du bálvaleaddjit, leat bargan oapmegeahččin nuorravuođa rájes gitta dán rádjái, nugo min áhčitge.’ Dalle dii oažžubehtet ássat Gosenii, dasgo egyptalaččat atnet oapmegehččiid fastivuohtan.”