1. Mosesgirji 8

₁Dalle Ipmil muitái Noa ja buot meahcielliid ja šibihiid mat ledje suinna árkkas, ja son bijai biekka bossut badjel eatnama, ja čáhci coahkugođii. ₂Čiekŋalasa ádjagat ja almmi dahpaldagat dahppojedje, heittii arvimis ₃ja čáhci coagui maŋistaga eatnama alde. Čuođivihttalogi beaivvi geažes čáhci lei uhccánan nu ollu ₄ahte čihččet mánu čiežanuppelogát beaivvi árka bisánii Araratváriide. ₅Ja čáhci uhccánii ahte uhccánii gitta logát mánu rádjái. Logát mánu vuosttaš beaivvi ihtigohte várrečohkat.

₆Go vel njealljelogi beaivvi ledje vássán, de Noa rabastii árkka ihkkona maid son lei dahkan, ₇ja luittii gáranasa girdit. Dat girddašii duohkot deike dassážii go čáhci lei goikan eatnama alde. ₈Dasto Noa luittii duvvá girdit vai beassá oaidnit, jogo eanan lei ihtán čázi vuolde. ₉Muhto duvvá ii gávdnan seaivunsaji gokko livččii vuoiŋŋastan, ja dat máhcai su lusa árkii, dasgo čáhci govččai ain oppa eatnama. Son geigii gieđa ja válddii duvvá lusas árkii. ₁₀De son vurddii vel čieža beaivvi ja luittii fas duvvá árkkas. ₁₁Go duvvá eahkedisveaiggi máhcai su lusa, de das lei njunis varas oliivamuorralasta. Das Noa árvidii ahte čáhci lei cohkon eatnamis. ₁₂Son vurddii velá ain čieža beaivvi ja luittii fas duvvá girdit, iige dat šat máhccan su lusa.

₁₃Vuosttaš mánu vuosttaš beaivvi dan jagi go Noa devddii guhttačuođi jagi, čázit eai šat gokčan eatnama. De Noa válddii árkka dáhki eret ja oinnii ahte eanan lei goikan. ₁₄Nuppi mánu guoktelogičihččet beaivvi eanan lei goikkis. ₁₅De Ipmil celkkii Noai: ₁₆“Vuolgge árkkas oktan áhkáinat, bártniidatguin ja manjiidatguin. ₁₇Doalvvo olggos buot elliid mat leat du luhtte, buot heakkalaččaid, lottiid, šibihiid ja buot njoammuid mat lihkadit eatnama alde. Giđđudehkoset dat ja lehkoset šattolaččat ja lassánehkoset eatnama alde.” ₁₈De Noa vulggii árkkas oktan bártniidisguin, áhkáinis ja manjiidisguin. ₁₉Ja buot eallit, njoammut ja lottit, buot mat lihkadit eatnama alde, vulge árkkas šlájaideaset mielde.

₂₀Noa ráhkadii áltára Hearrái, válddii buhtis elliid ja buhtis lottiid ja oaffarušai daid boaldinoaffarin áltára alde. ₂₁Go Hearrá havssii soažžudeaddji hája, de son celkkii váimmustis: “Mun in šat goassege garut eatnama olbmo dihte, vaikko olbmo váimmu jurdagat leat bahát nuorravuođa rájes. Mun in šat goassege heavat buot mii eallá, nugo dál dahken.