1. Mosesgirji 7

₁Hearrá celkkii Noai: “Mana oppa joavkkuinat árkii, dasgo mun lean oaidnán ahte dán buolvvas leat dušše don vanhurskkis mu muođuid ovddas. ₂Váldde buot buhtis elliin čieža bára, varrásiid ja njiŋŋelasaid, muhto buot buhtismeahttun elliin váldde guokte, varrása ja njiŋŋelasa. ₃Váldde maid almmi lottiin čieža bára, varrásiid ja njiŋŋelasaid, vai daid nálli bisošii heakkas eatnama alde. ₄Dasgo čieža beaivvi geažes mun vuolggahan eatnama ala arvvi mii bistá njealljelogi beaivvi ja njealljelogi ija. Mun heavahan eatnama alde buot maid lean sivdnidan.” ₅Noa dagai buot nugo Hearrá lei gohččon su dahkat.

₆Noa lei guhttačuođijahkásaš go dulvi govččai eatnama. ₇Noa manai árkii oktan bártniidisguin, áhkáinis ja bártniidis áhkáiguin, vai dulvi ii duššadivčče sin. ₈Buhtes ja buhtismeahttun eallit, lottit ja visot eallit mat lihkadit eatnamis, ₉manne bárralagaid, varrásat ja njiŋŋelasat, Noa lusa árkii, nugo Ipmil lei cealkán sutnje. ₁₀Go čieža beaivvi ledje vássán, de bohte dulvečázit eatnama ala.

₁₁Dan jagi go Noa lei guhttačuođijahkásaš, nuppi mánu čiežanuppelogát beaivvi, rahpasedje buot čiekŋalasa ádjagat ja almmi dahpaldagat. ₁₂Stuorra arvi šoalai eatnama ala njealljelogi beaivvi ja njealljelogi ija. ₁₃Aiddo dan beaivvi Noa ja su golbma bártni Sem, Ham ja Jafet, su áhkká ja su golbma manji manne árkii. ₁₄Sin lassin árkii manne buotlágán fuođđut, šibihat, smávva eallit mat lihkadit eatnama alde ja buot lottiid ja eará soajálaččaid šlájat. ₁₅Noa lusa árkii bohte buot heakkalaččat báraid báraid, buot mas lei eallinvuoigŋa, ₁₆juohke šlájas varis ja njiŋŋelas, nugo Ipmil lei cealkán Noai. Ja Hearrá dahpai uvssa Noa maŋis.

₁₇Nu bođii dulvi eatnama ala njealljelogi beaivvis. Čáhci dulvvai ja bajidii árkka, ja dat loktanii bajás eatnamis. ₁₈Dulvvai hui sakka ja čázit gokče eatnama, ja árka rievddai čáhcegierragis. ₁₉Ja dulvvai ahte dulvvai, nu ahte čázit gokče velá alimus váriidge mat ledje almmi vuolde. ₂₀Čáhci dulvvai nu ahte dat lei vihttanuppelohkái állana badjel váriid. ₂₁Dalle heavvanedje buot heakkalaččat mat lihkadit eatnama alde, lottit, šibihat, fuođđut ja buot smávva eallit mat guđaidit eatnama alde, ja buot olbmot. ₂₂Buot goikeeatnama eallit jápme, buot main lei eallinvuoigŋa. ₂₃Nu Hearrá heavahii buot heakkalaččaid eatnama alde, olbmuid ja šibihiid, njoammuid ja almmi lottiid; buot daid son heavahii. Dušše Noa ja dat geat ledje suinna árkkas, elle. ₂₄Ja čázit dulve eatnama badjel čuođivihttalogi beaivvi.