1. Mosesgirji 6

₁Go olbmot lassánišgohte eatnama alde, ja sidjiide riegádedje nieiddat, ₂de ipmiliid bártnit oidne ahte olbmuid nieiddat ledje čábbát, ja sii válde sis áhkkán daid geaid atne buoremussan. ₃Hearrá celkkii: “Mu eallinvuoigŋa ii oro olbmos agálaččat, dasgo son lea oažži. Lehkos su eallináigi čuođiguoktelogi jagi.”

₄Daid beivviid ja vel maŋŋilge ledje stuorra gievrrat eatnama alde, danin go ipmiliid bártnit elle olbmuid nieiddaiguin, ja sii riegádahtte sidjiide mánáid. Sii ledje dološ áiggi sáŋgárat, beakkálmas olbmát. ₅Hearrá oinnii ahte olbmo bahávuohta lei stuoris eatnama alde ja ahte su váimmu hutkkit ja jurdagat ledje álo ja ovtto bahát. ₆Dalle Hearrá gáđai bahččagit ahte lei dahkan olbmo eatnama ala. ₇Ja Hearrá celkkii: “Mun duššadan eatnama alde olbmuid geaid lean sivdnidan, ja oktan singuin buot šibihiid ja njoammuid ja almmi lottiid. Dasgo mun gáđan go lean dahkan daid.” ₈Muhto Noa gávnnai árpmu Hearrá čalmmiin.

₉Dát lea Noa ja su soga muitalus. Noa lei vuoigatlaš ja láitemeahttun iežas buolvva gaskkas, ja son vádjolii Ipmiliin. ₁₀Noai riegádedje golbma bártni: Sem, Ham ja Jafet. ₁₁Eanan billašuvai ain eambbo Ipmila čalmmiid vuolde ja veahkaváldi devddii eatnama. ₁₂Go Ipmil geahčadii eatnama, de son oinnii ahte oppa eanan lei billašuvvan, danin go olbmot golahedje eallimeaset bahávuođas. ₁₃Ipmil celkkii Noai: “Mun lean mearridan duššadit buot mii eallá, danne go olbmot leat deavdán eatnama veahkaválddiin. Mun áiggun duššadit sin oktan eatnamiin. ₁₄Hukse alccesat árkka gofermuoras, daga dasa lanjaid ja bihkkat dan siskkil ja olggul. ₁₅Hukse árkka ná: Dan guhkkodat galgá leat golbmačuođi állana, govdodat vihttalogi állana ja allodat golbmalogi állana. ₁₆Hukse árkii dáhki ja bija dan állanveardde állut. Hukse árkii golbma gearddi ja bija dan gilgii uvssa. ₁₇Mun divttán dulvvi gokčat oppa eatnama ja duššadit buot heakkalaččaid almmi vuolde, buot mas lea eallinvuoigŋa. Buot mii lea eatnama alde, duššá. ₁₈Muhto duinna mun dagan lihtu. Don galggat mannat árkii, don ja du bártnit, du áhkká ja du bártniid áhkát oktan duinna. ₁₉Váldde buot heakkalaččain árkii guokte juohke šlájas, varrása ja njiŋŋelasa, vai dat bissot heakkas oktan duinna. ₂₀Lottit, šibihat ja eatnama njoammut, guokte ealli guđege šlájas bohtet du lusa, vai dat bissot heakkas. ₂₁Čohkke fárrui buotlágán borramušaid, vai dutnje ja buot earáide livččii biebmu.” ₂₂Noa dagai buot aiddo nugo Ipmil lei gohččon su dahkat.