Habakkuk 3

₂Hearrá, mun lean gullan du beaggima,

mun lean oaidnán du daguid.

Daga minnai áigge daguid

maid dahket ovdal,

suova min oaidnit daid.

Muitte iežat árbmugasvuođa,

vaikko leatge moaris.

₃Ipmil boahtá Temanis,

Bassi almmustuvvá Paranváris. Sela

Su hearvásvuohta gokčá almmi,

su máidnun deavdá eatnama.

₄Báitin lea dego iđedisguovssu

mii lea ožžon sus suotnjariiddis,

dasa su fápmu lea čihkkojuvvon.

₅Su ovddas manná rohttudávda,

suohtta čuovvu su lávkkiid.

₆Go son čuoččasta, de eanan sparaida,

go son geahčasta, de álbmogat doarggistit.

Agálaš várit luoddanaddet,

dološ dievát vudjot čoahkkái.

Son manná dološ áiggiid geainnuid.

₇Mun oainnán Kušana gođiid duššamin,

Midjana goahteloavdagiid doarggisteamen.

₈Moaráhuvvágo Hearrá jogaide?

Leatgo don suhttan deanuide,

čuohcágo du moarri áhpái,

go don vuoját heasttaidatguin,

manat ovdan vuoitovovnnaidatguin?

₉Don válddát dávggi,

don gallehat dan njuolaiguin. Sela

Don luottut eatnama jogaiguin,

₁₀várit doarggistit du ovddas.

Ráššu šávgu, mearračiekŋalas márrá

ja lokte báruid allagassii.

Beaivváš vajáldahttá badjánit

₁₁ja mánnu loaiddasta orrunsadjásis

du šealgu njuolaid dihte,

du álddagasti sáitti báitima geažil.

₁₂Suhtus don váccát eatnama badjel,

moaris don duolmmat álbmogiid.

₁₃Don vuolggát beastit iežat álbmoga,

beastit vuidojuvvon bártnát.

Don cuvket ipmilmeahttuma viesu dáhki,

dagat su dálu vuođđudusa

báljisin bávtti rádjái. Sela

₁₄Don ráiggat su oaivámuččaid oaivvi

njuolaiguin,

go sii bahkkejit ovdan biđget min,

go sii illudit dego beasašedje borrat

vártnuheami čihkosis.

₁₅Heasttaidatguin don vuoját ábi rastá,

badjel máraideaddji goarveskávvaliid.

₁₆Mun gullen dan,

ja mu siskkildas doarggistii,

mu baksamat rabaidedje,

mu dávttit guohcagedje,

mu juolggit doarggistedje.

Lotka mun datte vuorddán

lihkuhisvuođa beaivvi.

Dat beaivi deaivida álbmoga

mii áŧesta min.

₁₇Fiikonmurrii eai luotkan urbbit,

viidnemuorat eai šaddat murjjiid,

oliivamuorat eai atte šattu,

bealddut eai atte biepmu,

rinddis eai leat sávzzat

eaige oapmegođiin gusat.

₁₈Muhto mun illudan Hearrás,

ávvudan Ipmilis, mu beastis.

₁₉Hearrá, mu Ipmil, lea mu fápmu.

Son dahká mu fallin dego sarvvaáldu

ja diktá mu viehkat alážiin.