Habakkuk 2

₁Mun áiggun fáktet,

čuožžut várdobáikkistan ja várdát.

Mun dáhtun diehtit

maid son sárdnu munnje,

maid son vástida mu váidalussii.

Čále oainnáhusa

távvaliidda nu čielgasit,

ahte dan lea álki lohkat.

₃Oainnáhus vuordá mearriduvvon áiggi,

dat sárdnu loahpa birra,

dat ii gielis.

Jos dat ádjána, de vuordde,

dat ollašuvvá vissásit iige beahte.

₄Geahča, biegga doalvu behtolačča,

muhto oskkáldasvuohta gádju

vanhurskása.

₅Riggodat lea behtolaš.

Čeavlás olmmoš ii olat dan maid dáhttu.

Dego jábmiidáibmu son caggá njálmmi,

dego jápmin son ii leat galleheames.

Son njámasta lusas buot álbmogiid

ja čohkke alccesis olmmoščearddaid.

₆Dat bilkidit su hiddjádussániiguin

ja lávlot:

Vuoi du gii rikkut earáid opmodagain

– man guhká? –

ja oamastat alccesat pántagálvvuid!

₇Fáhkka du velggolaččat čuožžilit,

sii morihit ja doarggistahttet du,

ja don ieš šattat sin sálašin.

₈Nugo don leat speadjan

eatnat álbmogiid,

nu dat mat leat báhcán

spedjet du dan vara dihte

maid don leat golggahan,

du veahkaválddi dihte

eatnamiidda ja gávpogiidda

ja buot daid ássiide.

₉Vuoi du gii čohkket

rieviduvvon opmodaga vissosat

ja dagat beasi allagassii,

vai beasat gádjut iežat lihkuhisvuođas!

₁₀Du áigumušat heahppášuhttet du viesu.

Don leat duššadan eatnat álbmogiid,

ja nu leat rihkkon iežat heakka.

₁₁Muvrra geađggit čurvot,

ja bielkagearddi hirssat vástidit.

₁₂Vuoi du gii hukset gávpoga

varradaguiguin

ja vuođđudat dan vearrivuođain!

₁₃Hearrá, Almmiveagaid Ipmil,

lea cealkán:

Álbmogiid rahčamušat gártet dollii,

duššas olbmuid čearddat

barget váibamassii.

₁₄Hearrá hearvásvuođa dovdamuš

deavdá eatnama

nugo čáhci deavdá meara.

₁₅Vuoi du gii jugahat lagamuččat,

seaguhat mirkko juhkamuššii

ja oaivvahuhtát su,

vai beasat oaidnit su álásin.

₁₆Don gallehuvvot heahpadiin

itge gudniin.

De juga dal donge

ja čájet iežat ovdaliikki!

Dál don šattat máistit dan lihtis

maid Hearrá geige dutnje,

ja heahpat gokčá du gudni.

₁₇Veahkaváldi maid dahket Libanonii,

deaivida du iežat,

ja elliid givssideapmi duššada dunai,

danne go don golggahit olbmuid vara

ja dahket veahkaválddi eatnamiidda,

gávpogiidda ja buot daid ássiide.

₁₈Mii ávkkiid lea ipmilgovas

go dan lea duojár vadjan,

dahje leikejuvvon govas,

behtolaš oahpisteaddjis,

vaikko duojár gal luohttá duodjásis

ja dahká gielahis ipmiliid?

₁₉Vuoi du gii dajat murrii: “Gohccá!”

ja jávohis geađgái: “Lihka!”

Máhtášiigo dat addit rávvagiid?

Dat lea gal skoađastuvvon

golliin ja silbbain,

muhto vuoigŋa das ii leat.

₂₀Hearrá lea iežas bassi tempelis,

oro jávohaga su muođuid ovddas,

oppa eanan!