Hosea 11

₁Go Israel lei nuorra,

de mun ráhkistin su,

ja Egyptas mun rávken bárdnán.

₂Muhto mađe eambbo mun rávken sin,

dađe eambbo sii gáide mus.

Sii oaffarušše Baal-ipmiliidda,

cahkkehedje oaffardolaid ipmilgovaide.

₃Mun oahpahin Efraima vázzit

ja válden sin sallii,

muhto sii eai ipmirdan

ahte mun buoridin sin.

₄Mun gessen sin

oskkáldasvuođa báttiiguin,

ráhkisvuođa oaraiguin.

Mun ledjen dego olmmoš

gii lokte njuoratmáná niera vuostá,

mun njahken ja adden sidjiide biepmu.

₅Sii máhccet fas Egyptii,

ja Assyria galgá ráđđet sin,

dasgo sii eai dáhto jorgalit.

₆Miehkki stajida sin gávpogiin

ja duššada sin einnostusbáhpaid,

loahpaha buot sin juonaid dihte.

₇Mu álbmot lea jorgalan mus eret.

Sii čurvot buohkat Alimussii,

muhto son ii čuoččáldahte sin.

₈Mo mun sáhtán luoitit du, Efraim,

ja diktit du mannat, Israel?

Mo mun sáhtán dahkat dutnje

nugo Admai,

meannudit duinna nugo Sebojimiin?

Mu váibmu njuorrá,

buot mu árkkálmastinvuohta cahkiida.

₉Mun in golggat buolli moarrán,

mun in šat duššat Efraima.

Dasgo mun lean Ipmil inge olmmoš,

Bassi din gaskkas.

Mun in boađe din lusa hirpmain.

₁₀Sii čuvvot Hearrá,

ja son čeargu dego ledjon.

Go son čeargu, de su mánát

bohtet doama oarjin,

₁₁sii dopmet dego lottit Egyptas,

nugo duvvát Assyrias.

Mun divttán sin máhccat ruoktot,

cealká Hearrá.