Hosea 10

₁Israel lei šattolaš viidnemuorra

mii šaddadii valjis šaddosiid.

Mađe eanet šaddosiid dat šaddadii,

dađe eambbo dat huksii áltáriid.

Mađe buorebut dan eatnamii geavai,

dađe goargadeabbon

dat dagai geađgebácciidis.

₂Dan váibmu lei behtolaš,

dál dasa mávssahuvvo:

Hearrá molle dan áltáriid

ja cuvke dan geađgebácciid.

₃Dál sii dadjet:

“Mis ii leat šat gonagas,

danne go mii eat ballan Hearrás.

Muhto maid gonagas ávkkuhivččii,

maid son sáhtášii dahkat min ávkin?

₄Sárdnot guoros sániid,

vurdnot vearreváliid, dahket lihtuid!”

Duopmu bohciida dego mirkkolaš šattut

bealddu jorgunluottain.

₅Samaria ássit

ballet Bet-Avena gálbbi dihte.

Olbmot dollet dasa morašdoaluid

ja dan báhpat váidalit,

danin go sin hearvásvuohta

lea dolvojuvvon eret.

₆Maiddái dat dolvojuvvo Assyriai

attáldahkan stuorragonagassii.

Efraim oažžu heahpada,

Israel heahpanaddá áigumušainis.

₇Samaria duššá, dan gonagas lea

dego smáhkku čáhcegierragis.

₈Bahávuođa oaffarbáikkit, Israela suddu,

duššaduvvojit.

Bastilislánját ja gáskálasat bohciidit

sin áltáriidda.

Olbmot dadjet váriide: “Gokčet min!”

ja dieváide: “Gahččet min ala!”

₉Israel, don leat suddudan

gitta Gibea beivviid rájes,

ja dan don ain dagat.

Muhto soahti olaha din Gibeas

ja duššada vearredahkkiid.

₁₀Mun bagadan du

nugo anán vuoigadin,

ja álbmogat čoagganit du vuostá,

go don ráŋggáštuvvot guovttegeardásaččat

iežat suttu dihte.

₁₁Efraim lei hárjehuvvon guigu,

gearggus ráidnet gortniid.

Mun sesten dan čáppa čeabeha,

muhto dál mun geassastan dan.

Juda ferte jorgut eatnama,

Jakob šaddá dan hárvet.

₁₂Gilvet vanhurskkisvuođa,

čogget oskkáldasvuođa,

jorgot alcceseattet ođđa eatnama!

Dál lea áigi ohcat Hearrá, vai son boahtá

ja arvviha din badjelii vanhurskkisvuođa.

₁₃Dii lehpet jorgon ipmilmeahttunvuođa,

láddjen bahávuođa,

borran giellása šattuid.

Dii lehpet dorvvastan

soahtevovnnaidasadet

ja ollu soahteolbmáidasadet.

₁₄Soahtešlápma gullo din álbmoga gasku,

ja buot din ladnit billistuvvojit,

seammá láhkái go Šalman billistii

Bet-Arbela soađi beaivvi.

Doppe eatnit cuvkejuvvojedje

oktan mánáideasetguin.

₁₅Nu mun dagan didjiide, Israela álbmot,

din stuorra bahávuođa geažil.

Iđedisgukso áigge Israela gonagas duššá.