Hosea 9

₁Ale illut, Israel,

ale ávvut dego eará álbmogat ávvudit!

Don leat leamaš

oskkáldasmeahttun Ipmilasat,

juohke gordneráidnensajis

don leat vuovdalan iežat

ja čohkken bálkká furrodagainat.

₂Danin gordneráidnensadji

ja viidnebohčingárri eai biepma du,

itge don oaččo ođđa viinni.

₃Don it beasa ássat Hearrá eatnamis.

Efraim ferte máhccat Egyptii,

Assyrias dat šaddá borrat

buhtismeahttun biepmu.

₄Dat ii oaččo oaffaruššat viinni Hearrái,

iige buktit njuovvanoaffariid sutnje.

Efraima láibi lea dego morašláibi,

buohkat geat borret dan,

šaddet buhtismeahttumin.

Efraim gallána iežas borramušain,

muhto dat ii boađe Hearrá vissui.

₅Maid dii dahkabehtet bassebeaivvi,

Hearrá ávvubeaivvi?

₆Dat geat báhtarit heavahusas,

gártet Egyptii,

ja Memfis hávdáda sin.

Gáskálasat gokčet sin silbadávviriid,

bastilislánját šaddet sin goahtesajiide.

₇Ráŋggáštusa beaivvit leat boahtán,

mávssaheami beaivvit leat joavdan,

Israel gártá dovdat dan.

“Profehta lea mielahuvvan,

vuoiŋŋa olmmái lea seahkanan!”

Nu lea geavvan danin go

du vearredahku lea stuoris

ja du vašši garas.

₈Profehta lea mu Ipmila álbmoga,

Efraima, goziheaddji,

muhto gielat leat buot su bálgáin,

vašálašvuohta su Ipmila viesus.

₉Dii lehpet vudjon

čiekŋalassii billašupmái

dego gibealaččat dolin.

Ipmil muitá Efraima vearredaguid,

son ráŋggášta dan suttuid.

₁₀Dego viidnemuorjjit meahcis

lei Israel, go mun gávdnen dan.

Go mun oidnen din áhčiid,

de sii ledje mu čalmmiin

nugo fiikonmuora árra šaddosat.

Muhto go sii bohte Baal-Peorii,

de sii bálvališgohte heahpatlaš ipmila

ja šadde seammá fastin

go dat maid sii ráhkistedje.

₁₁Efraima gudni girdila eret dego loddi:

Ii leat šat riegádahttin,

ii áhpehisvuohta, ii sahkaneapmi!

₁₂Vaikko sii vel šaddadivččege mánáid,

de mun dagan sin mánáheapmin.

Ii oktage báze.

Vuoi sin, go mun gáiddan sis!

₁₃Efraim lei gilvojuvvon gieddái,

dat lei oaidnit dego Tyros,

seammá oadjebas,

muhto dál dat šaddá doalvut mánáidis

sorbmejeaddji gihtii.

₁₄Hearrá, atte Efraimii –

maid don dasa attášit?

Atte dan nissoniidda sahkuhis goaŧu

ja goikan čiččiid!

₁₅Buot dan bahávuođa dihte maid sii

dahke Gilgalis,

mun lean vašuhišgoahtán sin.

Sin bahás daguid dihte

mun áján sin eret viesustan.

Mun in sáhte šat ráhkistit sin,

buot Efraima oaivámuččat

leat stuibmideaddjit.

₁₆Efraim lea vihkáduvvan,

dan ruohtas lea goikan,

dat ii šat šaddat šaddosiid.

Ja vaikko eatnit vel riegádahtášedjege,

de mun almmatge gottán

sin goaŧu mávssolaš šattuid.

₁₇Mu Ipmil hilgu Efraima,

danne go dat ii guldalan su.

Dat šaddá vádjolit golgolažžan

álbmogiid gaskkas.