Hearrá ii árkkálmastte Efraima
1Go Efraim sártnui, de buohkat ballájedje,
son lei oaivámuš Israelis.
Muhto son bálvališgođii Baala,
dat lei su suddu, ja son jámii.
2Dál sii suddudit ain,
leikejit alcceseaset ipmilgovaid silbbas,
duddjojit eahpeipmiliid
nu bures go máhttet.
Muhto duojára duojit dat leat visot.
Daidda dii galgabehtet oaffaruššat,
sii dadjet.
Olbmot cummistit gálbbiid!
3Dan dihte sii šaddet
iđitmierkká láhkásažžan,
sii leat dego suoldni mii johtilit jávká,
dego sáđut maid biegga bossu eret
gordneráidnensajis,
nugo suovva mii badjána reahpenis.
4Muhto mun lean Hearrá, du Ipmil,
gitta Egypta rájes.
Eará ipmil dus ii leat,
earret mu ii leat beasti.
5Mun gehččen du meahcis,
báhkka eatnamis.
6Go don guhtot, de don gallánit.
Go don gallánit, de don čevlot,
ja don vajáldahttet mu.
7Mun lean dutnje dego ledjon,
nugo leopárda mii njágada geaidnoguoras.
8Mun fallehan du dego guovža
mii lea massán čivggaidis.
Mun gaikkodan du ratti,
boran du dego ledjon;
meahci spiret gaikkodit du.
9Mun duššadan du, Israel!
Gii dalle veahkeha du?
10Gos dál lea du gonagas
gii gájošii du ja buot du gávpogiid,
gos buot du ráđđejeaddjit
geat galge ráđđet du?
Donhan dadjet:
“Atte munnje gonagasa ja oaivámuččaid!”
11Mun adden dutnje gonagasa moaristan,
ja suhtustan mun válden su dus eret.
12Efraima vearredahku lea ráddjojuvvon,
su suddu vurkejuvvon.
13Go ávttat bohtet,
de son lea dego mánná
mii ii rievttes áigái dádjat
boahtit goaŧus olggos.
14Galggašingo mun lonistit din
jábmiidáimmu hálddus,
čoavdit din jápmimis?
Gos lea du rohttu, jápmin?
Gos lea du suohtta, jábmiidáibmu?
Árkkálmastin lea čihkkojuvvon mu čalmmiin.
15Efraim lea gildán vieljaidis gaskkas,
muhto Hearrá vuolggaha
báhkka nuorttadaga,
Hearrá biegga bossu guorba meahcis.
Su gáivo guorrana, su ája šaddá goikkisin.
Su dávvirat rieviduvvojit,
buot su mávssolaš gálvvut.
