Hosea 14

₁Samaria lea nággáruššan Ipmilis vuostá

ja šaddá soabahit iežas suddovealggi.

Dan olbmát gahččet miehkkái,

dan njuoratmánát cuvkejuvvojit,

dan áhpehis nissonat luddejuvvojit.

₂Israel, jorgal Hearrá, Ipmilat, beallái!

Du suttut leat jorralahttán du.

₃Jorgalehket Hearrá beallái,

váldet sániid mielddádet

ja dadjet sutnje:

“Atte ándagassii buot min suttuid

ja váldde vuostá min buoremus attáldaga:

Mii deavdit lohpádusaideamet.

₄Assyria ii beastte min,

mii eat dorvvas heasttaide

eatge šat daja iežamet gieđaid duodjái:

‘Min ipmil!’

Du luhtte áhčiheapme gávdná

árkkálmastinvuođa.”

₅Mun buoridan sin

sin oskkáldasmeahttunvuođas.

Mun ráhkistan sin oppa váimmus,

mu moarri lea jorgalan sis eret.

₆Mun lean Israelii dego suoldni,

ja dat lieđđu dego liljá,

ruohtastuvvá nugo Libanona sederat.

₇Dan suorggit leabbanit,

dat šaddá čáppisin dego oliivamuorra,

das lea njálgga hádja

nugo Libanona vuovddis.

₈Dan suoivanis olbmot besset fas ássat

ja šaddadit gortni,

sii liđđot dego viidnemuorra

man viidni lea máinnolmas

nugo Libanona viidni.

₉Efraim, mii dahkamušaid dus lea šat

eahpeipmiliiguin?

Mun geahčan du beallái ja gozihan du.

Mun lean dego rudnes sypressa,

mus bohtet du šaddosat.

₁₀Gii lea nu viissis ahte ádde dán,

dárbahassii jierpmálaš fihttet?

Hearrá geainnut leat vuoigadat,

vanhurskásat vádjolit daid,

muhto suttolaččat jorralit.