Hosea 2

₂Mannet etniineattet rievtti ovdii,

áššáskuhttet su,

dasgo son ii leat mu áhkká,

inge mun leat su boadnjá.

Jávkadehkos son

fuorrágeahčastaga ámadajus,

nuoskivuođa čiččiidis gaskkas.

₃Muđui mun nuolahan su

seammá álásin

go son lei dan beaivvi go riegádii,

dagan su ávdin meahci láhkásažžan,

goikkisin dego jakŋa eanan,

guođán su goikat jámas.

₄Su mánáid mun in árpmit,

dasgo sii leat fuorrámánát.

₅Sin eadni lea furrošan,

sin riegádahtti lea meannudan heahpatlaččat.

Son lea dadjan: “Mun dáhtun viehkat

ráhkisteddjiidan maŋŋái.

Sii addet munnje láibbi ja čázi,

ullobiktasiid ja beallemasgárvvuid,

oljju ja viinni.”

₆Dan dihte mun dahpan

su geainnu bastilislánjáiguin,

ceggen su ovdii muvrra,

nu ahte son ii dádjat bálgáidasas.

₇Go son dasto viegaha ráhkisteddjiidis,

de son ii jovssa daid,

son ohcá daid, muhto ii gávnna.

Dalle son dadjá: “Mun máhcan

vuosttaš boadnján lusa,

su luhtte mus lei buoret dilli go dál.”

₈Son ii ipmir ahte mun

adden sutnje gortni, viinni ja oljju.

Mun adden sutnje dan valjis silbba ja golli

maid sii geavahedje Baalii.

₉Dan dihte mun in šat atte

gortniidan go daid áigi boahtá,

in ođđa viidnán go lea dan áigi.

Mun válddán ulluidan ja beallemasaidan

gokčamis su álásvuođa.

₁₀Mun nuolahan su álás

su ráhkisteddjiid čalmmiid ovddas,

iige oktage sáhte gádjut su mu gieđas.

₁₁Mun loahpahan buot su ilu,

su ávvudemiid, mánočalbmebeivviid

ja sabbatbeivviid,

buot su basiid.

₁₂Mun billistan su viidnemuoraid

ja fiikonmuoraid

maid birra son lea dadjan:

“Dat lea máksu maid mu

ráhkisteaddjit leat addán munnje.”

Mun dagan daid rohtun,

ja meahcieallit borret daid.

₁₃Mun ráŋggáštan su daid beivviid dihte

go son cahkkehii oaffardola Baal-ipmiliidda,

čiŋadii suorbmasiiguin ja viđjjiiguin

ja čuovui ráhkisteddjiidis.

Mu son vajáldahtii,

cealká Hearrá.

₁₄Dan dihte mun geasuhan su,

doalvvun su meahccái

ja sártnun suinna ustitlaččat.

₁₅Doppe mun lohpidan addit

sutnje fas su viidnegárddiid,

ja Akorleahki šaddá doaivvu poartan.

Doppe son vástida munnje

dego nuorravuođastis,

nugo dalle go son vulggii Egyptas.

₁₆Dan beaivvi, cealká Hearrá,

son dadjá munnje: “Mu boadnjá!”

itge šat “Mu Baal!”

₁₇Mun jávkadan Baal-ipmiliid

namaid su njálmmis,

dat eai šat beakke.

₁₈Dan beaivvi mun dagan

álbmogasan ávkin

lihtu meahci elliiguin, almmi lottiiguin

ja eatnama njoammuiguin,

ja dávggi ja miehki ja soađi

mun jávkadan eatnamis,

nu ahte sii besset eallit oadjebassan.

₁₉Mun gihládan du,

válddán oapminan agibeaivái,

mun čanan du alccesan

vanhurskkisvuođa čatnasiiguin

vuoigatvuođas,

ráhkisvuođas ja árbmugasvuođas.

₂₀Mun čanan du alccesan oskkáldasvuođas,

ja don dovddat Hearrá.

₂₁Dan beaivvi mun vástidan, cealká Hearrá,

mun vástidan albmái,

ja albmi vástida eatnamii.

₂₂Eanan vástida gordnái ja viidnái ja oljui,

ja dat vástidit Jisreelii.

₂₃Mun gilvván Israela alccesan

dán eatnamii

ja árpmihan Lo Ruhama,

mun cealkkán Lo Ammii:

“Don leat mu álbmot!”

Ja son vástida munnje: “Mu Ipmil!”