Jesaja 13

₂Bajidehket soahteleavgga báljes várrái,

čurvot olbmuide,

sevvet sin čoahkkanit

oaivámuččaid poarttaide.

₃Mun gohčun vihahuvvon olbmáidan

ollašuhttit iežan moarreduomu,

mun rávkkan soahteolbmáidan,

gorges, ávvudeaddji veagaidan.

₄Gula! Šlápma váriin

dego stuorra soahteveaga šlápma.

Gula! Olbmuid márra,

sii čoahkkanit buot riikkain.

Hearrá, Almmiveagaid Ipmil,

geahčada soahteveagas.

₅Sii bohtet gáiddus eatnamis,

olggumus almmiravddas,

Hearrá ja su moari gaskaoamit.

Sii duššadit oppa eatnama.

₆Fuikot, danne go Hearrá beaivi lea lahka,

dat boahtá heavahussan Buotveagalaččas.

₇Danne njurret buot gieđat,

buot jálluvuohta suddá.

₈Sii suorganit,

ávttat ja bákčasat dohppejit sin

dego riegádahtti nissona.

Ráđeheamit sii gehččet

guhtet guimmiidasaset,

sin ámadajut šovkkodit.

₉Hearrá beaivi boahtá hirpmusin,

moriin ja buolli suhtuin.

Dat dahká eatnama ávdimin

ja duššada das buot suttolaččaid.

₁₀Almmi násttit ja nástegovadagat

heitet báitimis.

Beaivváš lea seavdnjat go dat badjána,

mánnu ii atte čuovggas.

₁₁Mun ráŋggáštan eatnama

dan bahávuođa dihte,

ipmilmeahttumiid

sin vearredaguid geažil.

Mun loahpahan snielis olbmuid čeavlli

ja vuolidan veahkaválddálaččaid

goarratvuođa.

₁₂Mun dagan olbmuid

hárvvibun go buhtis golli,

hárvvibun go Ofira golli.

₁₃Hearrá, Almmiveagaid Ipmila,

moarri doarggistahttá almmi

ja lihkastahttá eatnama sajistis

su buolli moari beaivvi.

₁₄Dego ballán gasellat,

dego sávzzat maid ii oktage čohkke,

sii báhtarit juohkehaš álbmogis lusa,

juohkehaš iežas eatnamii.

₁₅Dat gii dohppehallá, rehttejuvvo,

dat gii juvssahallá,

gahččá miehkkái.

₁₆Uhca mánážat cuvkejuvvojit

sin čalmmiid ovdii,

viesut speddjojuvvojit

ja nissonat rihppojuvvojit.

₁₇Mun hásttuhan

medialaččaid sin vuostá.

Sii eai beroš silbbas

eaige háliduva gollái.

₁₈Sin dávggit njeidet nuoraid.

Sii eai árkkálmastte mánáid,

sii eai árpmit uhcahaččaid.

₁₉Babylonii, riikkaid kruvdnui,

kaldealaččaid čikŋii ja goargatvuhtii,

geavvá seammá ládje go dalle go Ipmil

duššadii Sodoma ja Gomorra.

₂₀Ii oktage ása šat dohko,

dat lea ávdin buolvvas bulvii.

Doppe ii cegge goađi oktage arabalaš,

guođoheaddjit eai divtte ealuid

livvadit doppe.

₂₁Muhto doppe njaŋgájit meahcieallit,

šakálat devdet viesuid.

Doppe orodit skuolffit

ja njuikkodit guolgás meahcigáiccat.

₂₂Ladniin orrot meahcibeatnagat,

šakálat hearvás lanjain.

Babylona áigi lahkona,

dan beaivvit leat lohkkojuvvon.